الدالة MOD وعد الخلايا التي تحتوي على أرقام زوجية أو أرقام فردية

[ياسر خليل أبو البراء]

السلام عليكم ورحمة الله وبركاته

إخواني وأحبابي في الله

ارتأيت أن أقدم موضوع بسيط في مضمونه ولكنه مفيد في جوهره حيث سيفيد في أمور أخرى

أقدم لكم الدالة MOD وتطبيق عملي عليها لكي تستوعبوا الدالة بشكل جيد

الدالة ببساطة شديدة تعطي باقي القسمة ..

مثال1 : لو عندك أولاد وجبتلهم 8 تفاحات ، والأولاد نايمين (نوم العوافي) ..فيهم واحد صحي .. يبقا ايه مصير الـ 8 تفاحات ، الحمد لله الـ 8 في خبر كان .. هيتبقى كام تفاحة .. طبعاً ولا تفاحة

=MOD(8,1)

الـ 8 دول التفاحات ، والواحد (العيل المفجوع اللي أكلهم) ..طبعاً باقي التفاحات يساوي صفر .. لقد التهمهم الوحش الصغير التهاماً

الناتج =صفر

************************

مثال2 : لو صحي اتنين من الأولاد على الـ 8 تفاحات ، كل واحد هياكل 4 ، والباقي بردو صفر ..

=MOD(8,2)

الناتج = صفر

************************

مثال3 : دلوقتي هنفترض إن فيه 3 أولاد هما اللي صحيوا .. والـ 8 تفاحات موجودين ..

الأول هياخد 3 والتاني 3 والتالت 2 (دا بقا مش هيسيب إخواته في حالهم إلا لما يدب معاهم خناقة وسلك إنت يا معلم)

الباقي من القسمة بعد ما الـ 8 تفاحات اتوزعوا 2 .. لأن الأخير اتعكنن عليه ومخدش غير اتنين فرفض الاتنين (التفاحتين) وفضل إنه يعملها زعلة

=MOD(8,3)

الناتج = 2

************************

مثال4 : دلوقتي هنفترض أن 4 اولاد صحيوا والـ 8 تفاحات مودجوين

كدا كل واحد هياخد اتنين ويا دار مدخلك شر .. والباقي من القسمة يساوي صفر .. التفاح بح يا بوحة

=MOD(8,4)

الناتج = صفر

************************

مثال5 والأخير عشان تعبت من العيال دي .. دلوقتي الـ 5 أولاد صحيوا ومفيش أولاد تاني متخافوش (إحنا منظمين النسل)  .. الأودلا هيقسموا عليهم التفاح بالعدل طبعاً ..كل واحد هياخد تفاحة وبس .. بس كدا التفاح لسه باقي منه 3 ..(دول بقا من نصيب الأب التعبان الشقيان اللي طالع عينه ليل نهار)

يبقا الباقي من القسمة يساوي 3

=MOD(8,5)

الناتج = 3

************************

ممكن آخر مثال نستخدم المعادلة بهذا الشكل وتدينا نفس النتيجة

=INT(8/5)*(8-5)

معلش طولت عليكم في الأمثلة .. بس الأمثلة دي عشان نفهم كويس الدالة وإزاي يكون الناتج لما يكون عندنا شيء وعايزين نوزعه .. الدالة بتعطينا باقي التوزيعة دي أي باقي القسمة

 

ننتقل لتطبيق عملي على الدالة

هنكتب الأرقام التالية في النطاق D7:D12 ... نكتب الأرقام 10 - 3 - 33 - 15 - 18 - 17 (دول 6 أرقام ..فيهم أرقام فردية وأرقام زوجية)

والمطلوب إننا نعد الأرقام الفردية والأرقام الزوجية ..

أول شيء نروح نحدد النطاق D7:D12 اللي فيه الأرقام المطلوب عدها .. ونروح لصندوق الاسم ونسمي النطاق بأي اسم وليكن Rng ..

يمكنك الإطلاع على النطاقات المسماة من خلال التبويب Formulas ثم Name Manager >>

 

نيجي في أي خلية ونكتب المعادلة التالية

=SUMPRODUCT(--(MOD(Rng,2)=1))

مش هشرح المعادلة مرة واحدة ..إحنا هنفصصها .. وربنا يعينا إن شاء الله

أولاً نفهم الدالة Sumproduct بشكل مبسط على إنها بتتعامل مع مجموعة خلايا مرة واحدة .. مش خلية واحدة بس .. اللي بيسموها صفيف .. صفيف يعني مجموعة من الخلايا .. وطبعاً لأننا هنعد الأرقام الفردية والزوجية داخل نطاق معين من الخلايا فهنستخدم هنا الدالة Sumproduct عشان تجمع النتائج ، وهنعرف إزاي هنجمع بعد شوية

 

لما نحب نفصص شيء بنقطعه حتت ونرميه للقطط .. تمام تمام ..متضحكش !! أيوا زي ما بقولك كدا ..إحنا نقطعه وبعدين نجمعه

نمسك الأقواس من جوا الأول ..أول جزء هنشوفه الجزء ده

MOD(Rng,2)

روح لشريط المعادلات وحدد بالماوس الجزء دا بس ... واشغط بعدها F9 من لوحة المفاتيح ..هتلاقي الإكسيل ترجم لك الجزء دا بس وقالك النتيجة أهي

{0;1;1;1;0;1}

النتائج دي عددها 6 اللي هي عدد الخلايا اللي بنتعامل معاها .. وظهرت كدا بسبب الدالة Sumproduct

الأرقام دي نتائج للدالة MOD اللي فهمنها من شوية

يعني الرقم مقسوم على 2 .. فخد رقم رقم وجرب : أول رقم 10 / 2 = 5 يبقا مفيش باقي للقسمة يبقا ناتج الدالة يساوي صفر
الرقم 3 لما نقسمه على 2 يتبقا 1 ..
كمل إنت باقي الأرقام

معنى الكلام ده إن الأرقام الزوجية لما نقسمها على 2 مش هيتبقا شيء ..يبقا ناتج الدالة يساوي صفر أما الأرقام الفردية فناتج باقي القسمة يساوي 1

 

وهي دي الأرقام اللي ظاهرة أمامي 0 - 1 - 1 - 0 - 1

لحد كدا تمام .. قول تمام يا عبد السلام

ندخل على الجزء التاني ..هنحدد من شريط المعادلات الجزء ده

{0;1;1;1;0;1}=1

وهنا استخدمنا علامة يساوي .. كأننا بنختبر شرط .. يعني كل رقم من الأرقام على اليسار هل يساوي 1 أم لا ..؟؟ لو كان يساوي واحد يبقا النتيجة TRUE ولو كان يساوي صفر يبقا النتيجة False ... نضغط F9 واتأكدوا بنفسكم من صحة كلامي .. دوس يا معلم متخافش

{FALSE;TRUE;TRUE;TRUE;FALSE;TRUE}

راجع النتائج بنفسك

 

نيجي دلوقتي ونحدد الجزء ده

--({FALSE;TRUE;TRUE;TRUE;FALSE;TRUE})

ونضغط F9 من  لوحة المفاتيح ..هنلاقي النتائج بالشكل ده

{0;1;1;1;0;1}

رجعت الأرقام تاني .. ودي فايدة الشرطتين اللي بعد قوس الدالة Sumproduct ، الشرطتين بيحولوا القيم True و False إلى 1  و 0 ..

وفي نهاية المطاق عشان أنا تعبت تصبح المعادلة بهذا الشكل

=SUMPRODUCT({0;1;1;1;0;1})

لما نحدد الجزء ده هيطلع لنا الناتج 4 ..أي عدد الأرقام الفردية يساوي 4

 

لعد الأرقام الزوجية هنغير شيء واحد بس في المعادلة ألا وهو الشرط بدل ما كان 1 نخليه صفر .. ودمتم

 

وأخيراً دعماً لصاحب الموضوع يرجى تحميل الملف (ستمر بسلسلة من الروابط الدعائية حوالي 5 روابط ) .. وطبعاً دا اختياري مش إجباري لأنك ممكن ببساطة تستغنى عن الملف المرفق لأنه بسيط جداَ .. ويمكنك تطبيقه بسهولة جداً ... ولكن إذا كان وقتك يسمح ادعمني بدقيقة واحدة من وقتك

 

حمل الملف من هنا

 

وأخير تقبلوا وافر تقديري واحترامي

 

[أبو حنــــين]

جميل جدا

شرح وافي و كافي و صافي  و منو  ما في  . . . . يلا  عوافي

[أبوبسمله]

جزاك الله كل خير يا ابوالبراء على الشرح السلسل والسهل الممتنع

بارك الله فيك

تقبل تحياتى ياغالى

[ياسر خليل أبو البراء]

أخي العزيز ..إبراهيم أحمد

شرفني مرورك العطر بالموضوع .. بارك الله فيك

أخي الحبيب أحمد الفلاحجي

وجزيت خيراً بمثل ما دعوت لي .. مشكور على مرورك العطر بالموضوع

تقبلوا تحياتي

[أبو قاسم]

ماشاء ألله عليك والشرح الحلو اللي يدخل المخ بدون مقدما  (سهل الهضم  ) جزاك الله خير

[ياسر خليل أبو البراء]

الحمد لله أن نال الشرح إعجابك أخي الكريم أبو قاسم .. وأرجو أن تكون قد استفدت بشكل كبير من الموضوع وأن يفتح لك وللأعضاء آفاقاً جديدة في التعلم

تقبل تحياتي

[توكل]

يا عم حملنا الملف وإن بتستاهل مش دقيقة وحدة بس أنتا بتستاهل نديلك كل وقتنا على الفوائد يلي بنحصلها من مواضيعك التي أقل ما يقال عنها أنها رائعة جزاك الله خير الجزاك وجعل ذلك العلم في صحائف حسناتك وغفر الله لك ولوالديك.

دمت بخير.

[ياسر خليل أبو البراء]

أخي العزيز توكل

بارك الله فيك على مرورك العطر بالموضوع وعلى كلماتك الطيبة في حقي ، فجزاك الله كل خير

والحمد لله أن نال الموضوع إعجابك واستفدت منه بإذن الله

غفر الله لي ولك ولكل أعضاء المنتدى ولكل المسلمين في مشارق الأرض ومغاربها

تقبل وافر تقديري واحترامي

[جلال الجمال_ابو أدهم]

استاذذذذذذذذذذذذذذذذذ ما شاء الله
جزاك الله خيرا

[ياسر خليل أبو البراء]

وجزيت خيراً أخي الفاضل جلال ... بارك الله فيك