هل يمكن تحويل معادلات هذا الملف إلى أكواد؟؟

[أحمد مرجان]

أساتذة وعباقرة المنتدى السلام عليكم ورحمة الله

أنا أعانى من مشكلة أتمنى حلها وهي أننى لدى ملف رئيسي يقوم باستيراد بيانات الأجازات للعاملين (بشكل معين كالدفتر)، وبالطبع مع تكرار رقم العامل واسمه بملف الأجازات أكثر من مرة أضطررت لاستخدام دالة Vlook2all لالتقاط البيانات منه، المشكلة أنه مع كثرة أسماء العاملين والتى تصل إلى أكثر من 2000 عامل أصبح الملف ثقيل جدا فى حجمه وعند حفظه، فهل يمكن الحل عن طريق الأكواد بدلا من المعادلات؟؟ وشكرا جزيلا... 

Vlook2all to VBA.rar

[ياسر خليل أبو البراء]

أخي الكريم مرجان

الملف الرئيسي مش مفهوم بالنسبة لي أو ممكن تقول مفهوم بس مش عاجبني أو ممكن تقول إني مش عارف أتعامل مع 546 عمود !!!

العناوين الموجودة في الملف الرئيسي هل هي للشهور ...لأيام كل الشهور ؟؟ هل ستكون لسنة محددة ؟؟ أن أنها عامة ؟؟ الأفضل إنها تكون لسنة واحدة لأن كل سنة بتختلف أحيانا عن السنة اللي قبليها عشان ممكن تكون السنة كبيسة وممكن تكون عادية

أنا بفكر بصوت عالي بس ..ممكن اللي بفكر فيه يكون بعيد عن طلبك لكن أنا بحاول أشوف فكرة تبقا شاملة للملف ككل

سؤال ..الملف الرئيسي هيكون فيه رقم العامل واسمه والقسم دول ثوابت يعني بيتكتبوا بالايد ؟ ولا رقم العامل بس هو اللي ثابت؟

 

من الآخر الملف الرئيسي لو ممكن يتغير شكله لشكل أفضل دا هيكون أيسر في العمل ..

بصراحة معنديش تصور للشكل بس بحاول الاقي تصور ..

تقبل تحياتي

[ياسر خليل أبو البراء]

ولو العناوين هي لأيام السنة فرضا ..لأيام السنة كلها فكيف يصل عدد الأعمدة إلى 546 عمود ..المفروض يكون 365 أو 366 + الثلاثة أعمدة الأساسية

اعذرني للتدقيق في الملف فهذا من شأنه أن يساعد على تحسين الأداء إذا أردت

ولكي يسهل على من يريد المساعدة ..

[أحمد مرجان]

أستاذ ياسر بعد التحية الأعمدة اللى بعد AH أنا المفروض خافيها ده أولا بس قصدت أظهرها علشان اللى يحمل الملف من السادة الأعضاء يفهم معادلاته ماشية ازاى وماكنش قدامى غير الشكل ده خصوصا وان رقم العامل ممكن يتكرر اكثر من مرة والاجازة ممكن تبقى متصلة وممكن تبقى متقطعة
الملف خاص بأجازات شهر4 فقط كل الحكاية انى عملته على شكل تفريدة انا متأكد ان ليها حل عند حضرتك ان شاء الله

تم تعديل أبريل 24, 2015 بواسطه أحمد مرجان

[أحمد مرجان]

أستاذنا الجليل ياسر الاعمدة مالهاش علاقة بأيام السنة اطلاقا الاعمدة عبارة عن 31 عمود عشان احتمال لو الاجازة متصلة 31 يوم مضروبا فى عدد 16 علشان احتمال لو اسم العامل ورقمه تكررا لحوالى 16 مرة فى ملف الأجازات علما بان رقم العامل واسمه والقسم ثوابت

تم تعديل أبريل 24, 2015 بواسطه أحمد مرجان

[أحمد مرجان]

UP

[ياسر خليل أبو البراء]

مجرد سؤال .. هل التعامل سيكون مع الأعمدة لحد AH فقط ؟

إذا كان الأمر كذلك ما فائدة الأعمدة المتبقية ؟

لابد من فهم الملف جيداً أخي أحمد واعذرني لكثرة الأسئلة

أريد أن يتم الأمر بشكل واضح حتى لا نضطر للعمل أكثر من مرة

[أحمد مرجان]

أستاذى الجليل

الأعمدة حتى AH هى الأيام الخاصة بالشهر وهي التى ظهرت فيها الأجازات بشكل تفريدي على مدار الشهر والتى تم استيرادها من ملف الأجازات، أما بقية الأعمدة فتظهر فيها عدد أيام الأجازة وتاريخها (وهي التى يمكن اخفائها) لتظهر فيما بعد فى الأعمدة الخاصة بالأيام، لو حضرتك نظرت الى المعادلات الخاصة بأعمدة الأيام من D حتى  AH ستجد الأعمدة المتبقية ظاهرة فيها وأنا أصلا لا أريدها ولكن المشكلة فى أن الأجازة فى ملف الأجازات المرفق قد تكون متصلة لمدة ستة أيام تاريخ بداية الأجازة يوم 4/2 وانتهائها 4/7 على سبيل المثال فأنا أريدها تظهر بشكل متصل فى الخلايا الخاصة بتلك الأيام أمام الشخص، وهو ما نجحت بفضل الله فى عمله، كما أن رقم العامل قد يظهر فى ملف الأجازات أكثر من مرة (افترضت أن الحد الأقصى للتكرار 16 مرة) أنا عارف ان الموضوع معقد لكن برده عارف ان الامكانيات العقلية سوف تتغلب بفضل الله على تلك المشكلة

[ياسر خليل أبو البراء]

الرجاء الصبر جاري العمل على الملف لكنه سيستغرق بعض الوقت وقول ربنا يسهل

[أحمد مرجان]

أنا بجد شاكر لحضرتك صبرك معايا وخد وقتك يا أستاذنا جزاك الله خيرا وجعلك عونا لى ولأمثالى

[ياسر خليل أبو البراء]

الأخ الفاضل أحمد مرجان

جرب الملف التالي وإن شاء المولى يفي بالغرض

 

Grab Data From CLosed Workbook YasserKhalil.rar

[أحمد مرجان]

اللهم صلي على النبي، بسم الله ماشاء الله عليك يا أستاذ، بجد مش عارف أقولك ايه انت حلتلى مشكلة ماكنتش متوقع انها ممكن تتحل، بارك الله فيك يا أستاذنا... 

[ياسر خليل أبو البراء]

الأخ الحبيب أحمد مرجان

لكم أسعدتني كلماتك ، ونصيحة مني لا تيأس أبداً لأن كلمة مستحيل خلقت للضعفاء ، فلا تكن ضعيفاً وحاول ولو بلغت محاولاتك الآف المرات ، فالفشل لا يعني أن تخسر المحاولات ولكن الفشل هو أن تكف عن المحاولات

 

الواحد بقا حكيم ومش واخد باله ههههههه

الحمد لله أن تم المطلوب على خير ، وأرجو أن تكون قد استفدت أقصى استفادة من الموضوع ، وأخيراً تقبل تحياتي

[أحمد مرجان]

أستاذ ياسر السلام عليكم ورحمة الله

من فضلك هل يمكن التعديل فى الكود لو افترضنا أن ملف  الأجازات به أكثر من شيت بالاضافة الى شيت شهر4 بمعنى أنه يتضمن شهور أخرى فى شيتات منفصلة بالاضافة الى شيت شهر4

وشكرا جزيلا

[ياسر خليل أبو البراء]

بص عشان أريحك وتريحني صمم الملف بالشكل الذي تريده ثم ارفق الملف للعمل عليه

ولازم تكون أوراق العمل متشابهة تماماً لأنه سيكون هناك حلقة تكرارية لكل ورقة عمل . وبلاش الأعمدة اللي ملهاش لازمة !! ههههههه

546 عمود يا راااااااجل!!

[أحمد مرجان]

هههههههههههههه نفس الملف (بس من غير أعمدة زايدة) أنا بس كل الحكاية اى زودت شيتين لشهرين تانيين فى ملف الأجازات لما جربت أخد نفس النتيجة لشهر 4 حدث خطأ (أنا عارف انى عامل مشكلة بس هتعمل ايه بقى دى أخرة العشم ههههههههههههه)

Grab Data From CLosed Workbook YasserKhalil.rar

تم تعديل أبريل 25, 2015 بواسطه أحمد مرجان

[ياسر خليل أبو البراء]

على فكرة ومتشتغربش .. أنا مش فاهم ايه المطلوب ؟؟

يا أخي الحبيب حاول يكون هدفك واضح ..

املا بعض البيانات كلف نفسك شوية وقت ،  ووضح المطلوب بإدراج بعض النتائج حتى تتضح الفكرة ..

كل اللي إنت عملته نسخت ورقة العمل مرتين وفضيت محتوياتها دي نقطة

نقطة تانية المطلوب مع الأوراق الجديدة ..هتترحل لفين هو دا بردو مربط المعزة (أقصد الفرس)

.........

تقبل تحياتي

[أحمد مرجان]

يا أستاذنا الفاضل أنا كل الحكاية عايز الملف الرئيسي يشتغل نفس شغله ويفضل ياخد بياناته من شيت شهر 4 حتى لو كان معاه شيتات تانية فى نفس الملف بتاع الأجازات بس مش أكتر...

تم تعديل أبريل 25, 2015 بواسطه أحمد مرجان

[ياسر خليل أبو البراء]

والله إنت بتهزر

يعني كل الدوشة دي على الحتة دي ...طيب ما توضح كدا من البداية ..

والله إنت نرفزتني ..بس ميهمكش ملحوقة هنغرمك عشا ودا العشم بردو .

الموضوع مش صعب على الإطلاق فقط هتغير كلمة ActiveSheet في الكود ، باسم الشيت Sheets وبعديها فنتح قوس وأقواس تنصيص ونكتب اسم الشيت وبعدين نقفل أقواس التنصيص والقوس ..

أنا افترضت إن مفيش غير شيت واحد ...عشان كدا بطلب إن اللي يرفق ملف يكون مطابق للملفات الأصلية عشان تكون الامور واضحة

 

Grab Data From CLosed Workbook YasserKhalil.rar

[أحمد مرجان]

هههههههههههههههه ياباشا انت تأمر  باللى عايزه ربنا يخليك لينا ويسامح الى ينرفذك، مرة تانية قصدى تالته بص هو انا مش فاكر بالظبط انا عايز أشكرك للمرة الكام، المهم متشكرين يا أستاذ ياسر 

[ياسر خليل أبو البراء]

أخي الحبيب أحمد مرجان

شكرك لوحده مش كفاااااااااية .. متحاولش تهرب من عزومتي عندك ع العشا ..ودا العشم بردو إنك توافق على العشا

المهم جربت الملف الأخير ، وهو دا المطلوب إن شاء الله ؟

تقبل تحياتي

[أحمد مرجان]

هو المطلوب يا أستاذ ياسر وياباشا مش عشاء بس ده فطار وغداء وعشاء مايجوش حاجة فى دعاء أدعيهولك فى ظهر الغيب هههههههههههههه بس طبعا بجانب العشاء جزاك الله خيرا يا أستاذ ياسر

[هاني بدر]

السلام عليكم ورحمة الله وبركاته

عزيزي الأستاذ ياسر جزاك الله خيراً على كل ماتقدمه من جهد وصبر بالرحب والسعة المعهودة فيك

وارجو من زميلنا الفاضل ان يفكر ملياً في تغيير مقومات ملفه الاساسية

بما يسهل من العمليات الأساسية المطلوبة لاى ملف

من تسجيل البيانات الى اجراء العمليات الحسابية بعد التبويب وصولا الى المخرجات

لذا اقترح عليك زميلي العزيز الأستاذ احمد

أولا :ان تكون كل هذه العمليات في ملف واحد

 ثانياً :الاستغناء عن وضع قالب محدد لعرض البيانات فيه مثلما هو موجود بالملف لما يقارب ال 550 عمود

فلتكن هناك صفحة للتعريفات الأساسية

من أسماء الموظفين واكوادهم والاقسام الموجودة في المنشاة وأسماء الوظائف  ..... الخ

ولتكن هناك صفحة واحدة يتم تسجيل فيها اجازات الموظفين بتواريخها ولن تتعدى 10 أعمدة وترحيلها الى ما يمكن تسميته بقاعدة بيانات الموظفين

وأخيرا صفحة لعرض التقارير المطلوبة حسب اى متغير يخطر ببالك خلال الفترة المطلوبة

تحياتي

 

 

 

[أحمد مرجان]

طبعا شكرا للأخ الفاضل هانى على اقتراحه وأنا أسعى جاهدا لتنفيذه قدر المستطاع لكن فيه مشكلة يا أستاذ هانى وهى أن ملف الأجازات ليس خاص بي وانما يرد لي من ادارة أخرى وهي الأجازات عن طريق شبكة وبالتالي أنا مضطر لتكييف عملى وفقا لطبيعة عمل الادارات الأخرى وبأى شكل وشكرا...

تم تعديل أبريل 25, 2015 بواسطه أحمد مرجان

[هاني بدر]

السلام عليكم ورحمة الله وبركاته

اخي الكريم الاستاذ احمد

اعتذر على التاخر في الرد واشكرك ايضاً على الايضاح

ولكن حتى لو ان هناك ملفات يتم تحديثها او تغذيتها عن طريق الانترنت

فمن الممكن تسهيل الامر

بعمل ماكرو في الملف الرئيسي يقوم باستيراد كافة البيانات من الملف ( الانترنت ) في بداية عمل الملف الرئيسي

وجعل كافة البيانات موجودة في ملف واحد وهو الرئيسي ومن ثم بداية التشغيل بتسجيل التغيرات واستخراج التقارير المطلوبة

هذا في اعتقادي سيغنيك عن عمل معادلات عن طريق

Links

تقبل تحياتي