افتح الباب وادخل لعالم البرمجة (متخافوش يا أحباب من اللي ورا الباب)

[ياسر خليل أبو البراء]

السلام عليكم ورحمة الله وبركاته

كيف حالكم إخواني الكرام في المنتدى الغالي؟

 

لقيت نفسي نفسي (نفسي الأولى غير التانية ..) نفسي الأولى يعني أنا - وأعوذ بالله من كلمة أنا - ، ونفسي التانية يعني حاجة أتمنى أعملها .. المهم لقيت نفسي أعمل حاجة مختلفة .. بشكل مختلف .. بأسلوب مختلف يكون فيه عنصر التشويق والإثارة والبساطة مجتمعين في نفس الوقت.

كتير مننا أول ما يسمع كلمة البرمجة والأكواد يتخض وكأن الموضوع مستحيل ...أبدا كل الحكاية إننا بنبدأ غلط مش بناخد الخطوات الصحيحة لتعلم البرمجة.

 

لو عايز تتعلم البرمجة ونفسك بجد تبدأ تتمكن فيها خليك معايا ، هنقضيها رغي شوية وهزار شويتين ، وجد مش كتير ... ايه رأيكم؟

نبدأ على بركة الله ..

أول حاجة بعد ما تنصب الأوفيس وتفتح الإكسيل تلاقي اللي انت عايزه مش موجود

طيب نظهره إزاي ؟؟ ببساطة فيه زر أوفيس فوق شمال هتضغط عليه وتضغط Excel Options هتلاقي نافذة فيها خيار اسمه

Show Developer tab in the Ribbon

يعني إظهار التبويب ، وهتلاقي جنبه مربع تحط فيه علامة صح

مبروك الخطوة الأولى

 

واحد هيقولي عندك اقف أول خطوة فشلت فيها ..هقوله ربنا ما يحرمنا من الفشل لأن الفشل أول طريق النجاح ..

هقولك لو ملقتش اللي بحكي عليه يبقا اصدار الأوفيس مختلف أنا شغال على 2007 ، وحضرتك على 2010 أو 2013 (بالنسبة ل 2003 والله ما أنا معبره كفاية عليه لحد كدا) ... بالنسبة لـ 2010 و 2013 بيكون من قائمة File ثم Options ثم من القايمة الشمال فيه Customize Ribbon وفي الناحية اليمين هتلاقي قائمة بالتبويبات وجنب كل تبويب علامة صح اللي يعجبك علم عليه صح واللي ميعجبكش ارميه في الزبالة...

 

 

 

المهم هتلاقي التبويب اللي هيفتح لنا الباب لعالم البرمجة .. دا كان المفتاح    للدخول

 

نخش لتاني حاجة المفتاح عشان يفتح معاك لازم تحط عليه شوية زيت ، يعني لازم تضبط إعدادات الماكرو عشان الأكواد تشتغل معاك تمام

من التبويب الجديد انقر على Macor Security هيفتح معاك نافذة بتختار منها آخر خيار Enable all macros وبتعلم علامة صح على الخيار اللي جنبه مربع Trust access to VBA

الحمد لله خلصنا من النقطة الأولى والتانية ...

ننتقل لنقطة جديدة :

 

هيظهر التبويب في الآخر .. جمد قلبك واشرب ديو وافتح الباب لمحرر الأكواد اضغط على Visual Basic من التبويب المذكور

أو لو بتحب تتعامل مع الكيبورد اضغط Alt + F11

كدا الباب الحمد لله فتح .. لو أول مرة تدخل على محرر الأكواد متتخضش واحدة واحدة هبندا نتعلم كل اللي موجود .. المهم محدش يستعجلني عشان أنا مستعجل

 

النافذة دي اسمها نافذة المشروع Project window يعني الإكسيل بيتعامل مع المصنف إنه مشروع .. والمشروع مكون من 3 شيتات اللي بنسميهم أوراق العمل Sheet1 و Sheet2 و Sheet3 بس في 2013 الحمد لله بيكون الوضع الافتراضي شيت واحد بس (أصلي بتخنق من حتة 3 شيتات ع الفاضي بحس إن الملف كبير ع الفاضي وكل اللي يلزمني للعمل بشكل مبدئي هو شيت ولما أحب أضيف جديد مش هيكون أمر صعب)

المهم مع أوراك العمل بنلاقي الكائن المسمى بالمصنف WorkBook ودا اللي بيحوي التعابين كلها أقصد الأكواد ..

طيب محدش سألني ايه المنطقة الرمادي دي ومالها ضلمة ليه كدا؟ أنا أقولك عشان إنت تنورها .. اضغط دبل كليك على Sheet1 مثلا في نافذة المشروع هتلاقيها نورت والحمد لله استعداد لبداية الاحتفال

بس فيه نقطة الأكواد لو اتكتبت هنا هتأثر على الورقة دي بس ...

في الحتة اللي نورت الصق الكود اللي جاي ده وأفضل تكتبه بايدك عشان أنا شايف ايدك بتترعش وخايف .. قلت لك جمد قلبك الموضوع بسيط

 

نبدأ بكود كدا سهل ولذيذ

Sub Hello_Officena()

MsgBox "Hello Officena!"

End Sub

أول كلمة Sub يعني ابدأ صب اللي عندك .. لا غلط .. معناها إجراء فرعي Subroutine يعني بينفذ مهمة محددة.

وفي آخر الكود End Sub عشان القفلة (لو فاكرين شعبان عبد الرحيم بيقول ايه في الآخر بس خلاص دي القفلة بتاعته) هنا بقا دي القفلة بتاعت الإجراء الفرعي..

طيب ايه Hello_Officena دا اسم الإجراء ودا له قواعد أول حاجة مينفعش يبدأ برقم 77Hello_Officena

ولا ينفع يكون فيه مسافة زي كدا Hello Officena بس ممكن لو حبينا بدل المسافة بحط Underscore اللي هي بتيجي بـ Shift + العلامة اللي على يمين الصفر اللي في الأرقام اللي فوق مش الأرقام اللي ف لوحة الأرقام ..

وبردو فيه حاجات محرمة في اسم الإجراء زي علامة # أو $ أو % أو & أو % أو النقطة أو الفاصلة أو أو ..

بقولكم ايه كفاية كلام عن اسم الإجراء .. لو كان فيه حاجة غلط في الاسم هيطلع لك رسالة خطأ تعرف إن فيه حاجة مش مظبوطة!!

 

طيب السطر اللي في النص دا هو دا الكود .. الإجراء أو المهمة المراد تنفيذها .. بتبدأ بكلمة MsgBox ودي اختصار للكلمة Message Box أي صندوق الاسم ..... والله انا سرحت بس مش همسح اللي بكتبه خلي الكلام يكون تلقائي .. ودي بنكتب وراها الرسالة اللي عايزين نظهرها .. وطبعا فيه مسافة بعد الكلمة والكلام اللي هو الرسالة دا نص فنحطه بين أقواس تنصيص " " .. واحد برق لي عينه بيقولي بتتعمل إزاي دي قول لأقتلك .. هقوله حاضر يا باشا هقولك دي بتيجي إزاي .. اضغط على Shift وبعدين حرف الطاء بس خلاص .. طبعا أقواس التنصيص في أول النص وفي آخره مهو لازم القفلة.

نجرب نشغل الكود إزاي .. فيه أكتر من طريقة يا إما تضغط على مثلث لونه أخضر فوق في شريط الأدوات الموجود في محرر الأكواد .. مش عاجبك شكل المثلث الأخضر خلاص روح لقائمة Run واضغط أول أمر .. لو انت تلميذ ذكي هتعرف الطريقة التالتة من التانية .. هسيبكم تقولوها إنتو ..مش عارفين !! طيب هقول أنا وخلاص اضغط على F5 من لوحة المفاتيح بس بشرط يكون مؤشر الماوس واقف في الكود..

لما نشغل الكود دا اللي هيظهر لي

وبكدا أكون وصلتكم وفتحت لكم الباب .. لو عايزين نكمل قولوا كمل مش عايزين .. يبقا كفاية لحد كدا ويا كود ما يقربش منك حد .. ونعمل بالمثل الفلاحي اللي بيقول : ابعد عن الكود وادعي عليه!

والسلام عليكم

سبحانك اللهم وبحمدك .. نشهد أن لا إله إلا أنت ..نستغفرك ونتوب إليك

كان معكم على الهواء مباشرة أخوكم أبو البراء من ملعب أوفيسنا .. إلى اللقاء مع مباراة جديدة وأهداف جديدة وشيقة

دمتم بود

 

 

======================================

======================================

السلام عليكم

نرجوا وضع ردود الشكر والاعجاب

على الرابط ادناه

هنا

 

======================================

======================================

تم تعديل نوفمبر 27, 2014 بواسطه عبدالله باقشير

[ياسر خليل أبو البراء]

الحلقة الثانية

ونبدأ حلقة جديدة من حلقات مسلسل افتح الباب يا عبد التواب ..

اتعلمنا المرة اللي فاتت إزاي ندخل على محرر الأكواد وإزاي نضيف كود واتعرفنا على نافذة المشروع ..

دلوقتي جه الوقت اللي لازم تعرف فيه الهيكلة العامة للتعامل مع الأكواد .. يعني ايه ؟

هضرب مثال ليتضح المقال :

أنا ساكن في عمارة كبيرة (العمارة زي تطبيق الإكسيل Application) دي العمارة بتاعتنا

وساكن في شقة فيها (الشقة دي هي WorkBook المصنف يعني ..

والشقة عندي فيها 3 أوض (أوضة 1 - أوضة 2 - أوضة 3 ) دي زي أوراق العمل اللي عندنا Sheet1 و Sheet2 و Sheet3

جوا كل أوضة فيه مجموعة أشياء أو بنسميها كائنات Objects بس حاجات صغيرة.. مثلا فيه تلاجة .. والتلاجة طبعا واخدة حيز من الفراغ بنسميه نطاق Range يعني النطاق ده جوا الأوضة اللي جوا الشقة اللي في العمارة

يبقا ممكن نبرمج التلاجة : أيوا صحيح !!

هنحدد مكانها ..

عمارة.شقة.أوضة(1).تلاجة.فتح

بالإكسيل تكون بالشكل ده :

Application.ThisWorkbook.Sheets(1).Range("A1").Select

بكدا نكون عرفنا هيكلة الكائنات الموجودة عندنا Objects ..

في السطر اللي فات بدأنا بالعمارة أقصد التطبيق متبوعاً بنقطة Period ثم حددنا الشقة أقصد المصنف Workbook وهنا أشرنا للمصنف الحالي ThisWorkbook، وبعدين حددنا الأوضة اللي هي الشيت Sheets (1) ثم أخيرا التلاجة أقصد النطاق المراد العمل عليه وهو هنا الخلية A1 بهذا الشكل Range("A1) .

>>> وأخيرا .. بعدما وصلنا للتلاجة هنعمل ايه ؟ أكيد هنفتحها عشان نشوف أي حاجة نشربها بعد الكلام الكتير ده الواحد ريقه نشف اللي يبل ريقكم .. أيوا نفتح دا فعل والفعل في اللغة العربية نعرفه إزاي .. لما نحط قبليه كلمة (أن) يعني لو قلنا (أن يفتح) كدا فيه معنى واضح .. أما لو قلنا كلمة حجم وحطينا قبليها (أن حجم) دي ملهاش معنى ، فبالتالي كلمة يفتح فعل أما كلمة حجم فدي اسم أو صفة (كدا معلمي اللغة العربية هيبلغوا عني إني بدي دروس في العربي) !!

يرجع مرجوعنا لموضوعنا إحنا ليه شرحنا الفعل لأن الفعل في البرمجة بيساوي كلمة Method يعني لما نشوف كلمة Method دي نربطها بحدث الفعل

تلاجة.فتح

يعني لو جربنا السطر اللي فات ووقفنا في خلية بعيدة شوية ونفذنا الكود هيحدد الخلية A1 .. مبروك عليكم السطر الأول من الأكواد

الفعل هنا أو الـ Method اسمه Select وترجمتها حدد .. أي أننا قمنا بالإشارة لكل الكائنات وصولا إلى الخلية A1 ثم نأمر الكود بتحديد النطاق.

ناخد مثال مهم أوي عشان نفهم الـ Method بشكل أكبر

Application.Quit

هنا لما اكتب الكائن Application وبعدين أكتب النقطة هلاحظ حاجة في غاية الأهمية .. ايه هيا؟

محرر الأكواد بيقدم مساعدة لينا (ودي عشان الجماعة اللي بيقولوا المشكلة في اللغة .. خلوا بالكم) بيظهر لنا قايمة شبه القايمة المنسدلة بس مش منسدلة فيها كلمات كتيرة ..

وهنلاقي شكلين : الشكل الأول عمنا بيل جيتس بيشاور بصبعه على ورقة والشكل التاني علامة شبه الطوبة الخضرا ..

الشكل الأول بنسمية الخاصية Property وهنشرحها بالتفصيل كمان شوية ، والشكل التاني الطوبة الخضرا ربنا يجعل حياتكم خضرا ومزهزهة هي دي الـ Method أو الفعل

طيب هعرف إزاي إذا كانت كلمة Quit دي Method ولا Proerty ببساطة بص على شكلها هتلاقي علامة الطوبة الخضرا اللي قلنا عليها يعني كلمة Quit دي Method

وطبعا الحتة اللي فاتت للجماعة اللي مش بيعرفوا إنجليزي زي حالاتي ، أما بالنسبة للي بيعرفوا إنجليزي فيبصوا لكلمة Quit هيلاقوا معناها اخرج ودا فعل يعني Method>

يبقا خلاصة الكلام السطر اللي فات بيعطي أمر للخروج من التطبيق.

نقطة تانية في غاية الأهمية لما نلاقي نفسنا مش عارفين حروف الكلمة اللي بنكتبها .. بعد النقطة ولما تظهر القايمة بكتب أول حرف أو حرفين في الكلمة اللي أنا عايزها ، وبعدينباستخدام الأسهم فوق وتحت أقف على الكلمة اللي عليها العين والنن واضغط TAB من لوحة المفاتيح اللي تحت حرف الذال يا رجالة (أنا عارف إن فيه ناس هتدور دلوقتي على حرف الذال ومش هتلاقيه . بصوا في لوحة المفاتيح أيوا بصوا .. فوق شمال فوق شمال فوق شمال تحت زر Esc هتلاقي حرف الذال ، وتحت الذال هتلاقي Tab عليها سهمين سهم متجه لليسار وآخر لليمين .. لو ملقتش السهمين قوم حالا رجع لوحة المفاتيح للراجل اللي إنت اشتريت منه دا نصب عليك) المهم لما نضغط Tab هنلاقي الكلمة اتكتبت لوحدها .. يا سلام ونعم الكلام ونعم المساعدة شكرا يا بيل !!

ممكن أريح ايدي شوية عشان والله ايدي تعبت !!!

----------------------------------------------

طيب دي الـ Method فيه حاجة تانية اسمها Property ودي ترجمتها خاصية (وتشمل زي ما قلنا الاسم أو الصفة)

تلاجة.حجم

حجم دي هي خاصية التلاجة Property فلو حبينا نضع قيمة لحجم التلاجة

تلاجة.حجم = 10 قدم

نلاحظ إن الخاصية ليها قيمة وعشان نضع قيمة ليها بنحط علامة يساوي متبوعة بقيمتها

ناخد مثال على الخاصية Property عشان عارف إنتو تهتو مني ... ركزوا يا شباب!

Application.Caption= "Officena"

طبعا إحنا عارفين شريط العنوان بيكون فيه اسم الملف أو المصنف متبوعا بشرطة - وبعدين اسم التطبيق Excel

طيب لو حبينا نخليه باسم منتدانا الحبيب يبقا ننفذ السطر اللي فوق

الكلمة اللي جات ورا Application اللي هي كلمة Captionدي خاصية من خواص التطبيق مش فعل يا مستر حمدي .. وطالما إنها خاصية فبنحدد ليها قيمة بعلامة يساوي (واحد هيعمل فيها مركز طيب إحنا نسينا علامة يساوي مع Quit أقولك الفعل مش بيتحدد له قيمة ، القيمة بتكون مع الخاصية أو الاسم أما الفعل له حاجات تانية اسمها بارامترات .. متخرجنا برا الموضوع)

المهم بنحدد قيمة للخاصية وليكن مثلا كلمة Officena وطبعا دي نص ، وعرفنا من المرة اللي فاتت إن النصوص توضع بين أقواص تنصيص " " .. اللي مش عارف يرجع يراجع من الأول أنا مش بحب أكرر المعلومة أكتر من 100 مرة ..

لو نفذنا بقا السطر اللي فات هنلاقي شريط العنوان اتغير (يا حلااااااااوة)

واحد هيقولي طيب إزاي نكتب الأسطر اللي إنت نازل دش فيها أقولك فيه قايمة اسمها Insert اختار منها Module أو فيه علامة في شريط الأدوات جنب علامة الإكسيل على يمينها علطول اختار منها Module

,وضع فيها الأسطر المراد تنفيذها يرجى مراعاة حاجتين الأسطر مبتكونش عريانة كدا لازم نغطيها بلحاف وبطانية يعني اللحاف Sub وبعدين اسم الإجراء ، والبطانية End Sub

ونحاول عشان نقدر نتعلم صح نبص كويس قبل تنفيذ الكود وبعده

يعني في المثال الأخير بص لشريط العنوان هتلاقي Excel مشرف في العنوان ، وبعد تنفيذ الكود هتلاقي Officena هي اللي نورت ...

وإلى لقاء في حلقة جديدة من حلقات افتح الباب

أسأل المولى عزوجل أن ينفع بهذا الرغي جموع المسلمين وأن يكون شاهدا لي لا علي ..

[ياسر خليل أبو البراء]

الحلقة الثالثة

طبعا واحد هيقولي ارحم نفسك .. كفاية كدا النهاردة ..!! أقولك ايه النهاردة أجازة وبعدين أنا عايز أخلص الشوية اللي دايما بنطول فيهم عشان نبدأ نتعلم جديد .. مش كل اما دورة تبدأ تلاقي الموضوع يبقا زي الفل وياخد وقته في البدايات والأساسيات وفجأة الدورة تتقطع ..

هنتكلم شوية في الحلقة دي عن تسجيل الماكرو .. واحد رفع ايده وبيقول أيوا أنا متمكن فيها (أقوله كتر خيرك !) بس أنا مش عايزك متمكن .. إحنا بس هنستفيد من حكاية التسجيل دي في أمور معينة .. واحد تاني هيرفع ايده ويقول طيب أنا أقدر أعمل الكود بالشكل اللي أنا عايزة من غير ما يكون عندي فكرة بالأكواد ووجع الدماغ هقوله إنت صح وغلط .. صح من جهة وغلط من جهة .. بس مش هناقش الموضوع ده

المهم نبدأ نشوف ايه حكاية التسجيل دي..

قبل ما نبدأ نتعلم إزاي نخلي نافذة الإكسيل ونافذة محرر الأكواد جبنا إلى جنب خلي عينك ع الاتنين ..!!

نفتح الاتنين (بلاش الجمعه عشان أجازة الموظفين) نفتح النافذتين وبعدين نفعل نافذة الإكسيل ونضغط على علامة الويندوز اللي ف لوحة المفاتيح اللي ما بين CTRL و ALT في الناحية الشمال .. لو ملقتهاش يبقا إنت مرجعتش لوحة المفاتيح اللي قلت لك رجعها أو رجعتها بس نصب عليك تاني !!

بنضغط على زر الويندوز + سهم شمال مثلا .. ونروح نفعل النافذة التانية ونضغط على زر الويندوز + سهم يمين . بحيث تكون النافذتين جنب بعض عشان نتأمل في جمالهم وهما جنب بعض كدا زي عريس وعروسة ..

في محرر الأكواد : هندرج موديول جديد أو مش شرط .. وفي الإكسيل هنروح للتبويب Developer طبعا خلاص عرفنا إزاي نوصله ونضغط على Record Macro قبل ما نضغط منستعجلش نبص الأول على الشكل المرفق مع الأمر هنلاقي علامة دايرة حمرا ولو ركزنا في شريط الحالة اللي في أسفل تطبيق الإكسيل هنلاقي نفس العلامة .. معنى كدا إن تسجيل الماكرو متاح في التبويب وفي شريط الحالة (أضف إلى معلوماتك)

لما نضغط عليه هنلاقي نافذة طلعت لنا بنسجل فيها اسم الماكرو واتعرفنا شروط الاسم ..وممكن نعمله اختصار وأنا مش بحب الحركة دي لأن الإكسيل ملياااااااااان اختصارات فممكن يحصل تعارض ما بين اختصارات الإكسيل والاختصار اللي سيادتك هتعمله .. إحنا شوية وهنتعلم إزاي نربط الكود بزر لتشغيله من داخل الإكسيل أو ورقة العمل أفضل.

وبعدين بيقولك هتخزنه فين وأنا أفضل تتركه زي ما هو This Workbook لو فتحت القايمة دي هتلاقي فيه مصنف باسم Personal.XLSB ودا بيكون مكانه في البارتشن C: وبيكون مخفي وممكن تظهره عن طريق التبويب View ثم Unhide هتلاقي اسم المصنف موجود ممكن تظهره ..أنا بقا لا أحب أظهره ولا أخفيه أنا بحذفه عشان بيضايقني بظهوره في محرر الأكواد في نافذة المشروع .. دا مجرد ارتياح شخصي وطبعا إنت ليك كامل الحرية في حذفه أو عدم حذفه عشان ممكن شركة مايكروسوفت تزعل مني

عموما المصنف دا لزمته ايه .. المصنف معمول إنك تخزن فيه الأكواد الخاصة بك عشان تقدر تنفذها في أي مصنف مفتوح بدون إدراج الكود مرة أخرى (بس يا سلام بقا لو أكوادك كلها اللي بتستعملها محفوظة فيه ومعندكش منها نسخة تانية وفجأة الكهربا تقطع ودا مبيحصلش كتير في مصر والحمد لله تلاقي الويندوز سقط والحمد لله أكوادك في خبر كان )

عموما هي ميزة بس أنا شايفها مش ميزة .. بالنسبة لمسار المصنف دا بيكون في :

C:\Users\Administrator\AppData\Roaming\Microsoft\Excel

طبعا Administrator دا اسم المستخدم بيختلف من جهاز للتاني .. روح للمسار ده هتلاقي المصنف احذفه وريح بالك (ليك مطلق الحرية)

أنا طبعا شرحته بالتفصيل أهو رغم إني مش بستخدمه بس عشان محدش يقول إني قصرت ...

آخر حاجة وصف الكود واللي هتكتبه هنا هيظهر لك على شكل تعليق .. بصراحة دي بقا رغم إن فيه كتير بيطنشها بس أنا شايف إنها مهمة .مهم جدا توثق أكوادك بتعليقات عشان تقدر بعد فترة لو حبيت تعدل على الأكواد تكون الأمور واضحة بالنسبة لك .. هتقولي أنا اللي كاتب الكود وحافظ كل كبيرة وصغيرة فيه ... يتهيأ لك والله أنا ساعات أندمج في كتابة كود بشكل معين وبعد فترة أحتاج للكود تاني أقوم أروح للكود الاقي نفسي تايه رغم إني أنا اللي كاتبه ومطبقه قبل كدا .. التوثيق مهم صدقوني ..

المهم بيظهر التعليق في الكود بلون أخضر .. طيب إزاي أعمل تعليق طبعا بيكون بالضغط على ' طبعا اللي نظرهم ضعيف مشافوش .. لما يكون اتجاه الكتابة إنجليزي نضغط حرف الطاء اللي بعد العلامة دي بيتم تجاهله تماما يعني متقلقش مش هيتنفذ الأمر لو كان قبله علامة ' دي ..

جمد قلبك واضغط أوك هتبدأ عملية التسجيل (وطبعا مننساش المايك والكاميرا يكونوا راكبين في الجهاز وكله تمام بس المشكلة إننا مش محتاجينهم اخلعهم تاني يا مراد بلاش وجع قلب)

اضغط أوك ولاحظ علامة التسجيل اللي قلنا عليها من بدري هنلاقيها اتغيرت لشكل مربع صغير لونه أزرق اللي هو دليل إن التسجيل شغال .. العلامة موجودة زي ما قلنا في التبويب وفي شريط الحالة كمان (بيل جيتس مش حارمنا من حاجة أبداً)

طيب واحد هيقولي خلص ابدأ تسجيل عشان الوقت هيتحسب في التسجيل هقوله متقلقش التسجيل بيكون لكل حركة إنت بتعملها ملهاش علاقة بالوقت ...

طيب نعمل ايه ؟ فكروا معايا أنا بحاول الاقي فكرة .. قول إنت يا جمال ..

جمال رد وقال : حدد الخلية اللي فيها اسمي وخلي المحاذاة لليمين .. الخلية اللي فيها اسم جمال هي A3 مثلا ننقر عليها بزر الماوس الأيسر (تعليم تقليدي) يا عم حدد الخلية بس خلاص

وبعدين من التبويب Home نعمل محاذاة لليمين (اللي ميعرفش يسأل اللي جنبه)

نسيت أقولكم على أهم حاجة (منك لله يا جمال نسيتني كنت عايز أقول ايه) .. عنينا وإحنا نسجل على محرر الأكواد (إنتو نسيتو إن النافذتين مفتوحتين ولا ايه ) عشان نشوف سعادته شغال إزاي ..

نبدأ تاني نحدد الخلية A3 واحد هيقولي مفيش حاجة حصلت هقولك عشان إنت واقف في المكان الغلط .. لما بنيجي نسجل الماكرو بيتم إضافة موديول جديد يعني ارجع تاني خطوة لورا واضغط على موديول 2 اللي تم إدراجه من غير ما تاخد بالك.. دبل كليك عليه عشان تتابع من الأول ..

معلش يا جماعة أنا مركز على حكاية المتابعة دي عشان تقدروا تستفيدوا من التسجيل

نحدد الخلية A3 هوب اقف عندك

Range("A3").Select

السطر دا اتكتب لوحده يا سلام سلام دا أحلى كلام ولا في الأحلام .. بيكتب لوحده يا عمر .!!

طيب نحدد خلية تانية هنلاقي السطر اللي فات اتغير وأصبح A4 ايه الحكاية هي الأسطر مش بتفضل ثابته .. أقولك آه بتفضل ثابتة لكن الشغل بيكون على خلايا محددة يعني إنت حددت A3 وبعد شوية غيرت رأيك وحددت A4 هتلاقي محرر الأكواد غير رأيه عشان مينفعش يشتغل على اتنين في نفس الوقت إلا إذا حددتهم مع بعض

نروح للتبوبيب Home وركز عينك على محرر الأكواد هتلاقي

    With Selection
        .HorizontalAlignment = xlRight
        .VerticalAlignment = xlCenter
        .WrapText = False
        .Orientation = 0
        .AddIndent = False
        .IndentLevel = 0
        .ShrinkToFit = False
        .ReadingOrder = xlContext
        .MergeCells = False
    End With

كل دا تم إضافته لما دوست على محاذاة لليمين .. طيب جرب بقا إنت اعمل شوية تنسيقات هتلاقي الدنيا بقت هيصة .. طبعا دا كله ميلزمناش أقصد الأسطر الكتير دي كلها

أنا يهمني المفيد وبس ..يعني ممكن أختصر الكود اللي فات أقولك آه وبسطر واحد بس مش بدا كله بالشكل ده

Range("A3").HorizontalAlignment = xlRight

شفتوا بقا إني أشطر من التسجيل .. طبعا دا اللي يأكد كلامي في الأول إنه مينفعش نستخدم التسجيل بشكل دائم وبردو منستغناش عنه ..طيب ايه الفايدة إننا بندور على اللي يهمنا ونبدأ نكتبه بطريقتنا ..

طبعا اتعلمنا إزاي نشير إلى الكائن Range بنفتح بعديه قوس وعلامة تنصيص ومننساش بردو نفس القفلة بس علامة التنصيص الأول وقفلة القوس ..معلش أصل الجو برد شوية عليه..

بعد كدا بنتبعه بنقطة ونكتب الخاصية Property طبعا خلاص استوعبتوها كويس HorizontalAlignment معناها محاذاة أفقية وطبعا قلنا إن الخاصية بيتحدد ليها قيمة وهنا القيم معروفة المحاذاة بتكون إما لليمين (ربنا يجعلنا من أهل اليمين) XlRight وإما توسيط وإما محاذا لليسار XlCenter (واحد متوقع إني هقول ربنا لا يجعلنا من أهل الشمال .. بس أنا هكسفه ومش هقولها) XlLeft >> أظن كدا بقا الكود واضح .. يعني التسجيل اللي اتعمل في 12 سطر (أراهن فيه ناس هتعد ورايا) عملناه في سطر واحد ..بس أنا استفدت ايه إني أقدر أطلع الكلمات اللي عايزاها وأشكلها زي ما أنا عايز ..

يعني خلاصة الكلام في الحلقة دي إحنا اشتغلنا خبازين (خدنا العجينة اللي هي الماكرو المسجل .. وشكلناها بمهارة عشان تقدر تطلع بالشكل اللي إحنا عايزينه )

وإلى لقاء مع رغي جديد ..

الواجبات : قم بتسجيل ماكرو حدد فيه النطاق من A1:B10 وخلي نوع الخط أي نوع ترغبه وحجم الخط 14 ولون الخط أزرق بلاش الأحمر عشان واحد هيقولي ايه حكايتك مع اللون الأحمر وخلي عريض Bold يعني وخلي المحاذاة الأفقية توسيط .. وطبعا اللي هيجيب الواجب تسجيل ماكرو مش هقبله منه ..

أنا عايزك تختصر الأسطر الكتير اللي هتظهرلك في أسطر قليلة ...

في رعاية الله

كان معكم أخوكم أبو البراء من فرن أوفيسنا (يلا ورورني مين هياكل العيش طازة)

[ياسر خليل أبو البراء]

الحلقة الرابعة

طبعا أنا ايدي بتترعش وأنا بكتب كلمة الحلقة (الرابعة) ، دا عشان رقم 4 بقا من المحرمات في مصر .. وربنا يستر ومحدش يبلغ عننا!!

فيه نقطة معينة في الشرح تعمدت إن أسيبها عشان حبيت إن حد يسألني عليها بس للأسف محدش سألني ، ودا معناه إن اللي بيتابع الحلقات مجرد متلقي يعني مش فعال .. أو فعال وخايف إنه يسأل لأحسن أضربه .. متخافوش مش بضرب ولا بحب الضرب وبحب اللي يسألني ، حتى لو كان السؤال تافه .. لإن السؤال هو طريق المعرفة .. ومن غير السؤال مش هنتعلم !!

النقطة اللي بتكلم عليها حفظ الملف اللي فيه أكواد .. محدش فيكم جاتله رسالة زي دي؟

طبعا النقطة دي كان لازم نشرحها ولازم تسألوا عليها .. طبعا أول ما بتفتح الإكسيل وتشتغل عليه بيكون الملف الافتراضي xlsx .. وطول مفيش أكواد بتتم عملية الحفظ بشكل طبيعي ، أما لو كتبت إجراء فرعي أو بمجرد كتابة اسم إجراء فرعي بس حتى لو كان جواه فاضي مفيهوش أكواد ، وجيت تحفظ هتلاقي الرسالة دي ، لأن صيغة الملف اللي بيحتوي على ماكرو مختلفة عن الصيغة العادية ، بتكون الصيغة xlsm.

طيب نعمل ايه ؟ أكبر غلطة إنك تضغط Yes مش أي حد يقولنا نعم نقوله ماشي غلط .. هنا لو ضغطت Yes هيحفظ الملف بدون أكواد .. لازم تتمرد وتضغط No وتحدد اسم الملف في حقل File Name أظن دي كلنا عارفينها ، وفي الحقل التالي فيه قايمة منسدلة بنختار منها تاني اختيار Excel Macro-Enabled ، وبكدا نقدر نحفظ الملف اللي فيه أكواد . طبعا هتلاقي ملف تاني موجود في المكان اللي فيه الملف الأول بس الصيغة مختلفة .. الحمد لله حفظنا الملف اللي هنشتغل عليه !!

نبدأ الحلقة :

هنرغي النهاردة عن المتغيرات .. لاحظت في كل الشروحات اللي شفتها إن درس المتغيرات بيكون دمه تقيل ورخم ؛ لأن كله بيكون غالبا نظري أكتر منه عملي وبيكون في درس واحد مرة واحدة . إحنا لأننا اتبعنا أسلوب مختلف تماما هنتكلم عنه واحدة واحدة متغير متغير ، وبالأمثلة والتطبيق ، ومش مهم الكم بقدر الكيف (ومحدش يفهم الكيف دي غلط)

نفهم الأول يعني ايه متغير .. يعني مش ثابت (صح يا حسام .. حد عنده إجابة تانية كله ساكت يعني مفيش غير حسام اللي عارف ..)!

لما نبدأ في عالم البرمجة ، مع الوقت هتلاقي نفسك محتاج الذاكرة إنها تخزن لك أرقام معينة أو نصوص ؛ عشان تستدعيها في وقت اللزوم ، وتبدأ تتعامل مع لما تستدعيها (ربنا يكفينا شر الاستدعاء)

عشان نقدر نخزن الأرقام والنصوص دي لازم نستعين بالمتغير .. ييجي المتغير ويقولنا تحت أمرك يا فندم أنا في الخدمة ، وطبعا الذاكرة بردو متأخرتش عننا في تقديم المساعدة.

بس المتغير له شروط عشان نقدر نستفيد منه ..أولاً عايز حاجة تسنده عشان بيتكسف يقف لوحده فبنستدعي كلمة اسمها Dim ، ومن غير الكلمة دي يبقا المتغير وحيد ومش هيرضى يساعدك (هي دي اللي بنعلن بيها عن المتغيرات)

ثانياً بنديله اسم تمام .. فاكرين شروط تسميه الإجراء الفرعي تقريبا نفس شروط تسمية المتغير .. يعني مينفعش يبدأ برقم لكن ممكن الرقم ييجي بعدين في الاسم بس في أول الاسم لا .. وممنوع الحروف الخاصة زي علامة # $ % ^ & * @ عموما لو فيه حاجة غلط محرر الأكواد هيظهر لك رسالة Syntax error تعرف إن فيه حاجة غلط..

دا كان الشرط التاني للمتغير إن يكون له اسم ، تالت شرط اللي هو نوع المتغير ( ودا ضروري بس اختياري )

فزورة دي ..>> أيوا هو اختياري يعني ممكن ميتكتبش ومفيش مشكلة ، بس طبعا ذوي الخبرة يعرفوا إن كدا محرر الأكواد بيحدد نوعه بردو ، بس بيحدده نوع اسمه Variant ودا له ميزة وعيب .. ميزته إنك لو مش عارف نوع المتغير بيكون دا الافتراضي وبيعفيك من تعريف نوع المتغير .. وعيبه إنه بيستهلك مساحة كبيرة في الذاكرة .. يعني لما ربنا يكرمكم وتكتبوا أسطر كتيرة من الأكواد لو معرفناش نوع المتغير ، هيكون الكود بطيء جدا مقارنة بإننا نعرف الكود بنوع محدد ..!

عشان كدا قلنا إنه ضروري يعني هو اختياري ، بس ممكن إحنا نخليه إجباري ؛ عشان نتعود على الصح من البداية (مش كدا ولا ايه!)

طيب إحنا هنعرف نوعه إزاي ؟؟ إنت اللي بتحدد نوعه حسب ما تريد وهنتعرف على الأنواع بس بالراحة عليا ..أنا أحب أرغي وآخد وقتي في الرغي قبل ما أكمل

بكدا نكون عرفنا شكل السطر اللي هيتم الإعلان فيه عن المتغير ، هيكون ببساطة بالشكل اللي جاي حالا

هنفترض إني هخزن في الذاكرة رقم صحيح وهنسميه MyNumber

Dim MyNumber As Integer

أيوا نحفظ بقا الشكل دا كويس ونشوف الشروط اللي قلنا عليها انطبقت ولا لا ! أول شرط الكلمة Dim اللي هتخلي المتغير ميخافش ، وتاني شرط اسم المتغير وهو هنا MyNumber ودا أنا اللي سميته مش محرر الأكواد عشان محدش يفكر إنه لازم يكون بالاسم ده يعني الاسم إنت حر فيه إن شا الله تسميه (مكرونة) ، وبعدين هنلاقي كلمة من حرفين As ودي متكلمناش عليها دي اللي بتفصل بين الاسم والنوع .. صحيح الاسم مرتبط بالنوع بس لسه في مرحلة الخطوبة والخطوبة هتطول فنفصل بينهم بمحرم اللي هو As وأخيرا النوع Integer ودا بيستخدم للأرقام الصحيحة (أول نوع خلصنا منه الحمد لله)...

يبقا خلاصة الكلام السطر ده بنقول لمحرر الأكواد إننا هنستخدم متغير باسم MyNumber وهيكون نوعه عدد صحيح (إحنا كدا بنوفر في الذاكرة مساحة وبنخلي الكود يكون أسرع لما نحدد النوع)

طبعا الطالب الناصح هيقولي هو فين الرقم اللي إحنا خزناه في الذاكرة دا ملوش أثر هقوله لسه الحتة دي جاية دلوقتي .. السطر دا بس كأننا بنكلم الذاكرة ونقولها : استعدي أيتها الذاكرة آتٍ إليكي متغير بهذا الاسم ومعاه بطاقة الرقم القومي بتاعته ابدأي اتعاملي معاه .. فالذاكرة تشوف اسمه لو كان اسمه صحيح تقوله اتفضل ، وتشوف نوعه وتحجز له مكان مناسب على أده .. ما هو كل نوع على أد حجمه (زي المثل اللي بيقول كل برغوت على أد دمه) ..يعني النوع Integer غلبان وصحته على أده هتحجزله مكان صغير ، أما Variant فربنا يديله الصحة هياخد مكان لا بأس به (يا ريت تكون النقطة دي بقت واضحة)

طيب بعد ما عرفنا المتغير .. نديله قيمة وعشان ندي قيمة قلنا قبل كدا لازم علامة = يساوي ، وتكون القيمة اللي عايزين نخزنها على اليمين بعد علامة يساوي مش قبليها ومينفعش نحط القيمة الأول كدا غلط .. عايزين نتعلم صح !

زي ما أخدنا في الخصائص إن كل خاصية ليها قيمة بنحددلها قيمة .. بردو المتغير بنحدد له قيمة زي كدا

MyNumber = 70

يبقا إحنا كدا حددنا قيمة المتغير بـ 70

طيب واحد يقولي يعني عشان أخزن الرقم 70 في الذاكرة هكتب سطرين ، طب ما نختصرهم في سطر واحد يا معلمي (طبعا هو مش معلمي بضم الميم لا دا بقولها بكسر الميم ، على أساس إننا قاعدين على قهوة) .. وبعدين يقولي هختصره كدا

Dim MyNumber As Integer = 70

هقوله جرب بنفسك هتلاقي محرر الأكواد أظهر لك رسالة خطأ .. اللي اشتغل على Visual Basic.Net الفكرة دي مقبولة لكن هنا في الـ VBA غير مقبولة..

طيب دلوقتي نطبق عملي السطرين اللي فاتوا .عايزين مثلا نحط قيمة المتغير في الخلية A1 >>

Range("A1").Value = MyNumber

الخلية A1 وبعدين نقطة متبوعة بخاصية أول مرة تقابلنا دلوقتي ، ودي مهمة جدا ومعناها القيمة Value .. يعني خلي قيمة الخلية A1 تساوي المتغير اللي اسمه MyNumber ، فيقوم محرر الأكواد يروح للذاكرة يسألها عندك متغير اسمه MyNumber ، ترد تقوله أيوا قاعد مرزوع هناك أهو .. يقوم المحرر يشده من قفاه (شكلها كدا أنا اللي هيتعمل فيا كدا النهاردة .. مش جايبها لبر من بدري عمال أقول 4 واستدعاء وشد من القفا ربنا يستر ..) المحرر يشوف قيمة المتغير اللي تم تخزينها ويحطها في الخلية A1 ..

اعذروني إذا كنت بشرح اللي بيحصل بالتفصيل بس التفصيل دا مهم ..

واحد تاني مخه شغال هيقولي طيب أنا أقدر أختصر الكود بتاعك اللي هو 3 أسطر في سطر واحد وهيطلع الناتج صح

Dim MyNumber As Integer
MyNumber = 70
Range("A1").Value = MyNumber

هيقولي بص بقا السحر أهو الكود بتاعك في سطر واحد

Range("A1").Value = 70

هقوله برافو عليك دا صحيح بس مش هو دا المهم إننا نحط القيمة 70 في الخلية A1 وخلصت الحكاية .. الفكرة إن المتغير هنستخدمه مثلا في أكتر من سطر .. وليكن هستخدمه 10 مرات .. لو أنا سمعت كلامك يا نبيه يبقا لو حبيت أغير قيمة المتغير لـ 100 مثلا هضطر أدور على القيمة 70 في كل أسطر الكود وأغيرها 10 مرات .. لكن بالطريقة اللي قلت عليها المتغير لو حبيت أغيره هغيره مرة واحدة بس في أول الكود وخلصت الحكاية!!

دي نقطة نقطة تانية إن ممكن يتم على المتغير عمليات حسابية متداخلة ، فلو استعملنا القيمة من غير المتغير هيكون صعب التعامل مع الكود

طيب نجرب نحذف كلمة Dim من الكود ونخلي الكود بالشكل ده

    MyNumber As Integer
    MyNumber = 70
    Range("A1").Value = MyNumber

شيلنا كلمة Dim الغريب إن محرر الأكواد مبيديش خطأ لما بتشيلها .. لكن ساعة التنفيذ يخضك برسالة ويقولك

معنى الكلام ده إن المتغير مينفعش يتم الإعلان عنه إلا بكلمة Dim ، وإلا سيتعبر الإعلان غير قانوني وسيتم إحالة الكود للمحاكمة (مش بقولكم مش جايبها لبر)

بكدا نكون اتعرفنا على أول نوع من المتغيرات اللي هو Integer !!

نتعرف سريعا على نوع تاني مشهور جدا اللي هو String ودا بيكون للقيم النصية

بالمثال يتضح المقال :

    Dim Myname As String
    Myname = "Yasser"
    MsgBox Myname

طبعا بقت الأمور أوضح دلوقتي المتغير اسمه Mname ونوعه String يعني نص .. وتم وضع القيمة النصية Yasser له ، ومننساش مع النصوص أقواس التنصيص ..

وآخر سطر مش محتاج إني أشرحه بس نلاحظ في آخر سطر فايدة تانية للإعلان عن المتغيرات .. هنا لما حطينا القيمة النصية Yasser وأسندناها للمتغير Myname ، لما نيجي بعد كدا نستخدمه خلاص هنرتاح من أقواس التنصيص .. وهنعتبر دي فايدة تانية

يلا بقا خدوا الواجب عشان أنا تعبت ...

1 - قم بالإعلان عن متغير بأي اسم يعجبك من أي نوع يعجبك وخليه يظهر في الخلية C5 ويظهر معاه رسالة مضمونها أنه قد تم وضع القيمة للمتغير اللي إنت سميته في الخلية C5

2 - قم بالإعلان عن متغيرين من النوع Integer وقم بعمل عملية جمع وناتج الجمع في الخلية E5

 

إلى لقاء مع حلقة جديدة من حلقات افتح الباب وزغردي يا رباب (دا إذا عدا اليوم بسلام ومكانش فيه استدعاء)

دمتم في عون الله وحفظه

[ياسر خليل أبو البراء]

الحلقة الخامسة

****************

السلام عليكم ورحمة الله وبركاته

نستكمل حلقاتنا للي متابعين .. وللي مش متابعين بردو!

هنتكلم النهاردة عن النطاقات في VBA وطرق تحديدها ... نبدأ الأول نعرف معنى كلمة نطاق : هل النطاق مجموعة خلايا متجاورة (جنب بعض) ولا مجموعة خلايا غير متجاورة (خلايا زعلانة ومتخاصمة فبعيد عن بعض) ؟

أعتقد إن فيه كتير فاهمين كلمة نطاق غلط .. أولا نطاق بالانجليزي Range والنطاق في الإكسيل بيكون مطاطي (مرن) بيشمل مجموعة كبيرة من المفاهيم ::

الخلية الواحدة اسمها نطاق .. واحد يقولي يعني A1 دي نطااااااااااق .. إنت كدا خليت الخلية تاخد أكبر من حجمها هي مجرد خلية ، أرد وأقوله .. الخلية نطاق

ومجموعة الخلايا المتجاورة نطاق ، ومجموعة الخلايا الغير متجاورة نطاق ، والصف الواحد نطاق ، ومجموعة صفوف نطاق ، والعمود الواحد نطاق ، ومجموعة أعمدة نطاق .. بس خلاااص (الحاجة الوحيدة اللي لا تصلح إنك تحدد نطاق في أكتر من ورقة عمل .. يعني الشغل كله في تحديد النطاقات بيكون في ورقة واحدة .. بمعنى آخر ميجيش واحد ويقول عايز أحدد مجموعة خلايا في الورقة الأولى + مجموعة خلايا في الورقة التانية دي لسه بيل جيتس معلمهاش)

جميل لحد دلوقتي يبقا كدا اتعرفنا على لفظ نطاق ..طيب كلنا عارفين إننا عشان نقدر ننفذ أمر معين لازم الأول نحدد النطاق اللي هيتم التنفيذ عليه .. مينفعش أقول مثلا نسق الخلايا ولونها وخلي حجمها 14 - طبيعي إن اللي بيفكر كدا يبقا فاهم إن الكمبيوتر بيسمعه وعارف عايز ايه ، مفيش خلاف إننا لما بنتعامل مع الكمبيوتر مننساش إننا بنتعامل مع آلة ، يعني مهما كانت درجة تفوقها فهي غبية ، والغباء هنا صفة مش مذمومة ، الغباء اللي أقصده إنه لازم تمشي خطوات منطقية ومنطقية جدا عشان تقدر تحقق هدفك .. فأول خطوة دايما للتعامل غالبا بتكون تحديد النطاق اللي هشتغل عليه .. عشان كدا هافرد الشرح عن تحديد الخلايا والنطاقات بشكل تفصيلي .. ادعوا لي ربنا يوفقني في توصيل المعلومة)

نبدأ على بركة الله ..

واحد هيقولي : كل دي بداية دا إنت هتطلع عنينا ، على ما نعرف المعلومة (بس أحب أوضح إن الأمور لما تكون مفهومة تمام الفهم والإدراك ، دا بيسهل عملية التعلم بشكل كبير ؛ عشان كدا متستغربوش إني برغي كتير .. الهدف في النهاية توصيل المعلومة بأسلوب غير تقليدي)

بصراحة أنا مش مرتب هشرح إزاي الموضوع نظرا لأن فيه معلومات كتير وخايف تتوهوا مني .. بس دلوقتي خطرت لي فكرة إننا نقسم الموضوع ، ونتعامل مع جزئية جزئية

أول جزئية هنتكلم عليها الخلية المفردة (الخلية : زي ما إحنا عارفين عبارة عن التقاء الصف مع العمود ..معلومة قديمة .. والصف بيكون عبارة عن رقم ، والعمود عبارة عن اسم حرف .. بردو معلومة قديمة .. والخلية لما بنسميها بتكون عبارة عن اسم العمود وبعديها رقم الصف .. بردو معلومة قديمة!!) (شكلي كدا معنديش معلومة جديدة أديهالكم النهاردة !!)

مثال : لو قلنا الصف الرابع والعمود الخامس ، هنعبر عنه إزاي ؟ نحسبها : نبدأ الأول بالعمود (نظرا لأن العمود رأسي وأنا رأسي مشغولة بالفكرة) ، العمود الخامس دا فين .. عشان نعرف يبقا لازم ناخد درس إنجليزي الأول ونركز على الحروف (أصلي معلم إنجليزي وعايز أسوق لنفسي دروس)

..نبدأ نقول مع بعض : A و B و C و D و E (بس خلاص وصلنا للحرف الخامس يبقا العمود الهدف هو العمود E .. بلغة البرمجة Target.Column=5 .. محدش يدقق أوي في الجملة دي ، بعدين هنعرفها ، دا كان حرف العمود ، والرقم مش محتاج نحسبه لأن الصف الهدف هو الرابع .. بلغة البرمجة Target.Row=4 (بكدا تكون عنوان الخلية الهدف هي الخلية E4 .. وبلغة البرمجة Target.Address=$E$4

السؤال الأول : كيف يمكن تحديد الخلية E4 في محرر الأكواد ؟

الإجابة : الإجابات متنوعة ، نشوف كل الطرق عشان نتعلم ...

أول طريقة : استخدام الخاصية Range >> نطبق على الخلية E4 مثلا

Range("E4").Select

هنا لازم بعد الخاصية Range بنفتح قوس ) وبعد القوس قوس تنصيص " وبعدين عنوان الخلية .. وزي ما اتعودنا القفلة يا رجالة ... كدا إحنا أشرنا للخلية E4 ، ونقول لمحرر الأكواد حددها بكلمة Select

تاني طريقة : استخدام الخاصية Cells ، ودي مختلفة شوية

Cells(4, 5).Select

هنا بنفتح قوس بعد الخاصية Cells وبنستخدم أرقام (رقم الصف الأول ، وبعدين رقم العمود) ودي شرحناها بالتفصيل وعرفنا إن رقم الصف 4 ، ورقم العمود E هيكون رقم 5 ، ونفس القصة بعد الإشارة للخلية الهدف نقول لمحرر الأكواد حددها بكلمة Select

تالت طريقة زي تاني طريقة ..إننا نستخدم Cells بردو (إزاي دي ؟؟!!)

Cells(4, "E").Select

هنا لو موضوع رقم العمود دا مضايقك ، ولا يهمك هنشوف لك بديل ، ممكن تكتب اسم العمود بس مننساش أقواس التنصيص !!

رابع طريقة : طريقة الباشمهندس طارق محمود (أنا سميتها كدا لأنها المفضلة عند الباشمهندس طارق)

[E4].Select

ويا ريت نعرف كل الطرق ، لأن كل طريقة وليها استخدامها في مواقف معينة .. دي بتيجي مع الخبرة ..

نقطة أخيرة قبل ما ننتقل للجزئية التانية .. افتراضيا الشغل بالشكل ده على ActiveSheet

يعني كل الأسطر اللي كتبناها ممكن نضيف قبل كل سطر كلمة ActiveSheet متبوعة بنقطة (عشان لما نبدأ نتعامل مع أكتر من ورقة نخلي بالنا .. بس لو شيلناها بيفهم محرر الأكواد إننا بنتعامل مع المصنف النشط الورقة النشطة)

@ انتهى الجزء الأول@

السؤال التاني : كيف يمكن تحديد النطاق A1:C10 في محرر الأكواد؟

الإجابة : أجب بنفسك (ارحموني شوية كله عليا لوحدي ، أنا تعبت!!)

Range("A1:C10").Select

هنا استخدمنا الخاصية Range (واحد هيسأل هي Range خاصية ولا كائن .. أقولك هي كائن وخاصية ، هي من ضمن خواص ورقة العمل ، وفي نفس الوقت كائن (يعني ممكن نقول تابع ومتبوع) ...هنا عشان نحدد نطاق الموضوع في منتهى البساطة بنحدد أول خلية في النطاق وآخر خلية في النطاق (لما نجرب نحدد بالماوس الخلية A1 وبعدين نضغط Shift من لوحة المفاتيح ونحدد الخلية C10 هنلاقي النطاق اللي ما بين الخليتين تم تحديده بالكامل ، أنا قلت الحتة دي ليه ؟ ؛ عشان أوصلكم معلومة إننا كل اللي بيهمنا عشان نحدد نطاق بدايته ونهايته ..... نلاحظ إننا فصلنا بين البداية والنهاية بالعلامة دي

:

طريقة تانية :

Range("A1", "C10").Select

زيها بس الفصل بين البداية والنهاية بيكون بفاصلة .. وهنا لاحظ الاختلاف بنفسك (مش كل حاجة لازم نشرحها بالتفصيل .. فيه ناس بدأت تحس بالملل والرتابة )

طريقة تالتة : اننا نستخدم Range و Cells مع بعض

Range(Cells(1, 1), Cells(10, 3)).Select

واحد هيبص للسطر اللي فات ويقولي ايه الكلكعة دي إنت كنت ماشي زي الفل والأمور واضحة ..مالها بقت ضلمة ليه كدا ؟؟

يا حاج سعد ولا ضلمة ولا حاجة إنت بس ركز كد .. الخاصية Range بيكون وراها قوسين بين القوسين بداية ونهاية ..

البداية

Cells(1, 1)

اللي هي مرادف الخلية A1

والنهاية

Cells(10, 3)

اللي هي الخلية C10

بكدا نكون حددنا البداية والنهاية داخل الخاصية Range ...أظن الأمور كدا بقت واضحة يا شوقي !!

طريقة رابعة إننا نسمي النطاق في ورقة العمل .. وطبعا دي أمرها بسيط ..داخل ورقة العمل بحدد A1:C10 وأسميها عن طريق وضع الماوس في صندوق الاسم ونكتب اسم وليكن Officena

Range("Officena").Select

ومننساش إن Officena دي اسم للنطاق ، والاسم نص ، والنص يؤكل إذاً الجبن يؤكل ..أعتذر (سرحت في الفلسفة : الخوف جبن والجبن يؤكل إذاً الخوف يؤكل ..دا منطق فاسد)

أما المنطق بتاعنا مش فاسد الحمد لله ... الاسم نص والنص يوضع بين أقواس تنصيص.

خامس طريقة (طريقة باشمهندس المنتدى .. من أحب الناس لقلبي)

[A1:C10].Select

@انتهى الجزء الثاني@

الجزء الثالث

عن طريقة تحديد خلايا أو نطاق في ورقة عمل أخرى داخل المصنف ..

ودي بسيطة بس ركزوا لأنها مختلفة شوية أد كدا (طبعا محدش شايف ايدي والحمد لله ، لأنكم لو شفتوا ايدي هتدعوا عليا !!..)

Application.Goto Sheets(3).Range("A1:C10")

الخاصية Goto دي مش خاصية يا متنورين ، دي Method لأنها حدث أو فعل (نسينا ..كله يراجع تاني ، وإلا مش هكمل )

معناها( اذهب إلى ) ، وبعدين مسافة ، وبنحدد المكان اللي هيروحله محرر الأكواد .. نخلي بالنا هنا مستخدمناش Select والله يا أبطال مستخدمناها ، ولو استخدمناها محرر الأكواد هيفضحنا برسالة خطأ

الـ Method هنا اللي اسمها Goto أغنت عن الـ Method اللي اسمها Select .. لأنه ببساطة مينفعش فعلين في نفس الوقت .. هو دا النظام إذا كان عاجبكم ...

مينفعش حدثين مع بعض يا إما Select يا إما Goto

طيب نجرب نستعمل Select ونشيل Goto اللي إحنا مش متعودين عليها كدا

نجرب ، وإحنا واقفين في الشيت رقم واحد وننفذ السطر التالي

Sheets(3).Range("A1:C10").Select

شكلها صح ، لكن للأسف غلط ..لأننا دلوقتي بنتعامل مع ورقة عمل تانية ، بالتالي لازم عشان نعمل سطر زي ده ، وميكونش فيه رسالة خطأ ، لازم ولابد وحتما إننا ننشط ورقة العمل اللي هنشتغل عليها بـ Method اسمها Activate (نشط)

Sheets(3).Activate
Sheets(3).Range("A1:C10").Select

كدا نتلاشى رسالة الخطأ ، والحمد لله ..خلاصة الكلام إننا لو استخدمنا Select أثناء التعامل مع ورقة عمل أخرى ، يبقا لازم ننشط ورقة العمل (نديها منشطات عشان متهنجش مننا .. ممكن نستعين بالأستاذ الغالي اللي غايب عننا رجب جاويش)

وحتى النطاقات المسماة زي النطاق اللي سميناه من بدري باسم Officena لو أنا في ورقة عمل تانية ، مش هينفع أستخدم Select معاها بردو .. فالأفضل في التعامل مع أوراق العمل الأخرى استخدام Goto

Application.Goto Range("Officena")

@انتهى الجزء التالت@

وانتهت الحلقة .. مش عارف إذا كنت استوفيت الموضوع النهاردة بالتفصيل ولا لا .. بس عموما لو حد عنده إضافات بالنسبة لتحديد النطاقات يفيدنا بيها .. أنا قلت اللي عندي ، قولوا إنتو اللي عندكو (بارك الله فيكم على حسن المتابعة ، وإلى لقاء مع حلقة جديدة ومعلومات جديدة ..أستودعكم الله)

الواجب : متروك لكم حرية عمل مصنف ، وتنوع فيه الطرق المختلفة للتحديد ..

كان معكم على الهواء تحديداً في الكرسي الأخير من الصف الأخير في قاعة أوفيسنا ..

قاعة أوفيسنا.الصف الأخير.الكرسي الأخير.تحديد(أبو البراء)

دمتم في رعاية الله

[ياسر خليل أبو البراء]

متابعة الواجبات :

**************

قام الأخ الفاضل الجموعي بعمل الواجب المطلوب على أكمل وجه .. بارك الله فيك أخي الحبيب الجموعي وجزيت خيراً على هذه المتابعة الجيدة

ممكن نستفيد معلومات جديدة من خلال الواجب مش هنصحح كدا ونقول صح ولا غلط وبس لا إحنا نضيف معلومة تضاف للحلقة الثالثة كملحق ليها . يا ريت المشرفين يقوموا بالمهمة دي .. عايز تجميع لكل الحلقات والملحقات للحلقات زي الملحق ده عشان يضاف للشرح لتسهيل المتابعة لمن أراد المتابعة بإذن الله .

طبعا الكود اللي تفضل به أخونا الفاضل بالشكل ده

Range("A1:B10").HorizontalAlignment = xlCenter
    Range("A1:B10").Font.Name = "Arial"
    Range("A1:B10").Font.Size = 14
    Range("A1:B10").Font.Bold = True
    Range("A1:B10").Font.Color = -4165632

لو لاحطنا هنلاقي الأسطر الخمسة كلها بتبدأ نفس البداية ودا طبيعي لأن كل الشغل على نفس النطاق . ممكن تضيف لمعلوماتك إنك ممكن تستغنى عن تكرار هذه البداية باستخدام جملة With .... End With ومننساش بردو القفلة مهمة جدا

نقطة تانية بالنسبة للون يمكن استبالها بقيمة vbBlue بدلا من الرقم اللي شكله يخض ده ..

الأسطر كلها تحتوي على Properties أي خصائص وطبعا كل خاصية بيكون ليها قيمة ..ممكن تكون القيمة نص زي اسم نوع الخط Arial وطبعا مننساش إن النص يوضع بين أقواس تنصيص .. وقد تكون القيمة رقم زي حجم الخط ودا طبيعي لأن الحجم بيكون برقم (افتكروا التلاجة الـ 10 قدم .. رقم 10 دا حجم) .. وممكن تكون القيمة حاجة اسمها Boolean أيوا يا شيرين اسمها بولين ، ودي يا إما 1 أو 0 واحد هيقولي غلط إنت بتدي معلومات غلط هي القيمة إما True أو False هقوله صحيح .. ما هي القيمة True =1 والقيمة False = 0

، وقد تكون القيمة عبارة عن تنسيق معين زي أول سطر xlCenter ودي شرحناها الحمد لله .. وقد تكون قيمة ثابتة vbBlue زي مثلا اللون الأزرق دا ثابت ومعرف في محرر الأكواد

هيكون الكود بهذا الشكل بعد التعديل عليه .. وبكدا نكون اتعرفنا على أشكال مختلفة للقيم اللي بتيجي بعد علامة يساوي

 

يعني دلوقتي الأخ الجموعي اختصر الكود اللي في تسجيل الماكرو بشكل رائع ، وإحنا كمان هنختصر اللي اختصره في الكود التالي فبكدا يكون دا مختصر المختصر (يعني دا المفيد)

    With Range("A1:B10")
        .HorizontalAlignment = xlCenter
        .Font.Name = "Arial"
        .Font.Size = 14
        .Font.Bold = True
        .Font.Color = vbBlue
    End With

آخر نقطة ممكن نتكلم فيها عشان دي أنا نسيتها إزاي نربط الماكرو بزر يقوم بالتنفيذ :

معلش نسيت النقطة المهمة دي - اعذروني بسبب الزهايمر - بنروح للتبويب ومش هقول اسمه لأن كل شغلنا عليه هنلاقي فيه كلمة Insert بنضغط عليها بيفتح معانا قايمة منسدلة فيها أدوات تحكم اختار أول واحد اسمها Button (Form Control ودا أول أداة تحكم موجودة وأكثرها استعمالا ..ارسمها ببساطة على ورقة العمل وبعديها كليك يمين ثم اختر الأمر Assign Macro وحدد اسم الماكرو المراد ربط الكود به

في المثال السابق مثلا دا مثلا شكل الكود بالكامل فيه اسم الإجراء الفرعي بعد كلمة Sub

Sub FormatRangeA1_B10()
    With Range("A1:B10")
        .HorizontalAlignment = xlCenter
        .Font.Name = "Arial"
        .Font.Size = 14
        .Font.Bold = True
        .Font.Color = vbBlue
    End With
End Sub

لما نعمل كليك يمين على زر التحكم هنلاقي اسم الإجراء الفرعي موجود نعلم عليه ونضغط أوك وبكدا نكون ربطنا الكود بزر تحكم

ما عليك الآن إلا أن تقوم بعمل كليك واحدة على الزر لتنفيذ الأمر بكل بساطة ..

 

الأخت الفاضلة morestudy

بالنسبة لأول ملف عندك مفيش أي خطأ لا في الكود ولا في التنفيذ .. وبعدين لما يظهر خطأ يا ريت نسرد محتوى رسالة الخطأ لتحليلها .. بس الملف مفيهوش أي مشكلة.

 

الملف الثاني أيوا فيه أخطاء المفروض إننا لازم قبل أي شيء الإشارة لنطاق محدد في الأسطر اللي في الكود خاصتك مفيش إشارة فطبيعي إنه يكون غط

راجعي الكود اللي تفضل بيه الأخ الجموعي وشوفي الفرق .. وصححي الخطأ بنفسك

 

 

أرجو ان تكونوا قد استفدتم إخواني الكرام

دمتم في رعاية الله وحفظه

تم تعديل نوفمبر 22, 2014 بواسطه YasserKhalil

[ياسر خليل أبو البراء]

متابعة الواجبات

*************

الأخ الفاضل صلاح 15 صلاح (مش كان كفاية علينا صلاح واحد) بسم الله ما شاء الله يبدو أنك متمكن ، مش بس عملت الواجب وكمان بتشرح كل جزئية فيه ..

أول ملحوظة كمعلومة جديدة كمان عشان الكل يستفيد .. فيه جملة اسمها Option Explicit دي يفضل الاعتياد على استخدامها ، ودي بتخلينا وتجبرنا لما نشتغل نعلن عن المتغيرات غصب عننا طول ما هي موجودة ، ودي بتتكتب مرة واحدة في أول الموديول وبتكون منفصلة عن الإجراء الفرعي يعني بتكون بالشكل ده

Option Explicit

Sub Officena()
    MsgBox "Hello Salah15Salah. Thank you very much"
End Sub

ولو حبينا نعلن عن متغير نصي هيكون بالشكل ده

Option Explicit

Sub Officena()
    Dim MyString As String
    MyString = "Hello Salah15Salah. Thank you very much"
    MsgBox MyString
End Sub

هنا فيه متغير نصي من النوع String وتم الإعلان عنه .. ممكن لو مفيش الجملة Option Explicit ممكن يتم الاستغناء عن الجملة الأولى ..جملة الإعلان وهنلاقي الكود تم تنفيذه ومفيش مشكلة نجرب الكود مرة تانية بس هنحط تعليق في بداية الجملة وفي بداية سطر الإعلان ونشوف النتيجة!!

'Option Explicit

Sub Officena()
    'Dim MyString As String
    MyString = "Hello Salah15Salah. Thank you very much"
    MsgBox MyString
End Sub

طيب دلوقتي بقا جرب تشيل التعليق من بداية جملة Option Explicit ونفذ الكود هتلاقي محرر الأكواد بيطلع لك رسالة خطأ ويقولك

معناها إن المتغير لم يتم الإعلان عنه ..اضغط على علامة المربع الأزرق اللي على يمين المثلث الأخضر الخاص بتنفيذ الكود .. المربع الأزرق ده اسمه Reset عشان الكود دلوقتي في حالة Break زي فاصل .. وهيفضل محرر الأكواد معلم لك على سطر باللون الأصفر إشارة إلى إن فيه شيء خطأ ، ومش هيسيبك لحد ما تصلح غلطك ..لكن ممكن نهرب منه مؤقتا بالضغط على Reset (أضف إلى معوماتك) طيب جرب تنفذ تاني يمكن يحن عليك المرة دي وينفذ لك الكود (والله لو قعدت جنبه من هنا للقرن الجاي) مش هينفذ كودك طول ما الجملة دي موجودة.

واحد هيقولي وأنا أربط نفسي بيها ليه سيبك منها دي باين عليها جملة رخمة وغلسة وهتقطع عليا ..! هقولك لا حاول تعود نفسك  ع الصح عشان تتعلم صح .. إحنا قلنا قبل كدا إننا لازم نفشل عشان ننجح .. عمر ما فيه نجاح من غير فشل (دا حتى كدا يبقا نجاح طعمه بايخ)!!

طيب معلومة تانية ..هل كل مرة أعمل موديول جديد هكتب الجملة دي بنفسي ؟

قولك لا عمنا بيل جيتس وضع في خيارات المحرر من قايمة Tools ثم Options اللي هي الخيارات اللي بيحب دائما إضافتها في البرامج بتاعته (أصله بيعز الخيار شوية)..

هنلاقي تبويب اسمه Editor وفيه تاني جملة جنبها مربع فاضي نحط فيه علامة صح

الجملة اسمها Require Variable Declaration

وبكدا لما نيجي نعمل إضافة موديول جديد هنلاقي الجملة موجودة في كل موديول كبداية إجبارية للإعلان عن المتغيرات..

طيب نرجع لصلاح الراجل زمانه خد برد مننا بسبب التذنيبة دي من بدري (حضرتك جملة option Explicit موجودة مرتين ..دا كلام !! أكيد إنت بتعزها شويتين ، بس معزتك ليها متخلكش تخرج برا القاعدة اللي بتقول إن الجملة دي تيجي مرة واحدة بس ) ، ودي الرسالة اللي هتظهر لك لما تبدأ التنفيذ

بس عموما برافو عليك ..إنت خلتني أعمل حلقة من غير حلقة وأضفنا للزملاء معلومات جديدة .

حاجة تانية أخي الحبيب صلاح

MyString = "ÓÈÍÇä Çááå æÇáÍãÏ ááå æáÇ Åáå ÅáÇ Çááå æÇááå ÃßÈÑ"

With æÑÞÉ1
 .Range("C5").Value = MyString
End With

يفضل إن تكون جملة الإعلان عن المتغير ووضع قيمة له في الأول قبل جملة With ... End With

على فكرة الكود اللي لصقته دلوقتي فيه حاجة مش مظبوطة ... أنا تعمدت إن أسيبه كدا عشان تشوفوا اللغة العربية لما نلصقها هنا بتكون بالشكل ده (لا هي إنجليزي ولا هي عربي ..هي تيجي على عبري شوية) .. طبعا كمعلومة جديدة بالنسبة لناس كتير عشان اللغة العربية تيجي معانا بشكل صحيح بنعمل حاجة بسيطة جدا بنخلي اتجاه الكتابة في الكود باللغة العربية وبعدين نعمل نسخ ولصق هنلاقي المشكلة اتحلت (شفتوا البطاطا أقصد البساطة)

Dim MyString As String
MyString = "سبحان الله والحمد لله ولا إله إلا الله والله أكبر"

With ورقة1
 .Range("C5").Value = MyString
End With

الحمد لله اتحلت المشكلة ..

بصراحة أشكر الأخ الغالي صلاح نظرا إنه ألهمنا بمعلومات جمة وجميلة (جمة وجميلة) من خلال متابعة الواجب الخاص بيه (بصراحة روعة يا صلاح) هو دا اللي فعلا بدور عليه إنت بالنسبة لي طالب مجتهد ومثالي!!

معلومة جميلة بيقدمها لنا الأخ صلاح إننا ممكن بدل ما نكتب سطرين لوضع قيمة لمتغيرين مثلا ..ممكن نخليهم في سطر واحد وبنفصل بينهم بنقطتين

i = 100: t = 150

وكمان الإعلان عن متغيرين ممكن يكون في سطر واحد زي كدا

Dim i As Integer, t As Integer

نشكر الأخ الحبيب صلاح من أعماق قلوبنا متمنين له دوام التوفيق (ومتحرمناش من الواجب الجميل ده .عايزين كل يوم من ده) بكدا نكون اتعلمنا من صلاح معلومات غاية في الأهمية..

 

الأخت الفاضلة morestudy

معلش اتأخرنا عليكي في التصحيح (صلاح خد وقتنا كله ، بس كله في النهاية بيصب ليكم)

المرة دي فيه تحسن ملحوظ .. الواجب جميل جدا والحمد لله مفيش أخطاء!

بالنسبة لسؤالك الأول : اللي هيجاوب عليه أخونا حماده عمر من خلال المشاركة دي

http://www.officena.net/ib/index.php?showtopic=56983#entry361677

السؤال التاني : نعم يمكن تنفيذ الأمر بدون أزرار لكن الزر لتسهيل التعامل مع التنفيذ ، ولكن يمكن الضغط على Alt+F8 هيطلع لنا نافذة فيها كل الأكواد اللي عملناه بنختار الكود ونضغط Run .

أما بالنسبة لمعرفة الكود تم تنفيذه أم لا فدا العين هي اللي تقرره .. يعني مثلا أنا هشتغل غلى الخلية C5 أقوم أمسحها وأنفذ الكود ، لو طلعت النتيجة في الخلية زي ما انا متوقعها يبقا كدا تم التنفيذ بنجاح ..لو حصل العكس براجع الكود مرة تانية عشان أعرف الغلطة فين (حد عرف الغلطة فين؟ الغلطة فين؟ ساب الباب مفتوح ! أكبر غلطة ممكن يغلطها المبرمج إنه يسيب الباب مفنتوح (شركة الرعب المحدودة)) .. طبعا قفلنا بقوسين عشان فتحنا قوسين ..ودي مهمة في البرمجة (إننا لو فتحنا قوس يبقا مننساش نقفل القوس

شفتوا الطالب النبيه اللي خد باله إني مقفلتش القوس في السطر اللي فات برافو عليك .. بس أنا كنت لسه بكمل كلامي)

السؤال التالت : هناك طرق أخرى يمكن فيها الاستغناء عن Run ولكن ليس هذا هو الوقت المناسب للحديث عنها ممكن نقول باختصار إنها أكواد مرتبطة بحدث الصفحة أو المصنف ودي هييجي الكلام عنها بعدين إن شاء الله

دمتم في رعاية الله وحفظه وعونه وتوفيقه

والسلام عليكم

[الجموعي]

بارك الله فيك استاذي شكر ممتاز

من بعد إذنك إسمح لي بهذه الإضافة للتحديد النطاقات

Range("A1:B5,D2:F10").Select

[الجموعي]

 بعد إذن الاستاذ إضافة لدرس الحلقة الخامسة

درس مصور

أول خطوة نقوم بها إنشاء موديل جديد

 

 

ثاني نكتب الكود التالي في الموديل

Sub تحديد()

End Sub

 

 

نرجع للصفحة

نقوم بإدراج زر تحكم ثم نقوم بتعين ماكرو

 

 

 

 

ندخل على الموديل ثم نقو بإضافة الاسطر التالية

Sub تحديد()
Range("E4").Select
End Sub

Sub تحديد()
Range("Officena").Select
End Sub

 

وهكذا مع بقية الكودات

 

أتمنى الشرح المصور ان ينال إعجابكم

دمتم في رعاية الله وحفظه

[ياسر خليل أبو البراء]

الحلقة السادسة

************

أهلا بكم إخواني الأحباب مع حلقة جديدة ، والحلقة دي استكمال لحلقة المتغيرات ..

كنا اتكلمنا عن نوعين من المتغيرين باستفاضة (3 مرات على ما الكلمة اتكتبت معايا ) ..اتكلمنا عن النوع Integer ودا بيكون للأرقام الصحيحة ، والنوع String ودا بيكون للقيم النصية.

نكمل رغي عن المتغيرات عشان نخلص منها ونخلص عليها ..

بداية أحب أعرفكم بدالة في VBA اسمها CINT ..الدالة دي وظيفتها إنها بتحول أي قيمة لعدد صحيح من النوع Integer (ودي اختصار Convert Integer..الحرف الأول من Convert وأول 3 حروف من Integer) >>

الكلام مش هيفيد بقدر التطبيق :: نجرب المثال التالي

    Dim LValue As Integer
    LValue = CInt(8.45)
    MsgBox LValue

لو نفذنا الكود هنلاقي إن القيمة أصبحت 8 .. طيب نغير الرقم إلى 8.5 ونشوف النتيجة بردو نفس القيمة 8 .. طيب نغير الرقم ونخليه 8.6 خلي بالك متتوقعش 8 ، القيمة بقت 9 (تسعى في الخير)

الملاحظات المستفادة : إن الكسر لو أقل من أو يساوي 0.5 .. القيمة بتتقرب لتحت ، أما لو الكسر أكبر من 0.5 يبقا يتقرب لفوق ..(يعني الدالة دي ممكن نستفيد منها في أمور تانية .. زي التقريب)

جرب القيمة 8.50001 .. جربتو : أكيد لا نازلين قراية وخلاص .. اللي جرب هيتأكد من إن : لو هفوة مفيش تفاهم!!

نراجع مرة تانية المتغير Integer بمثال عملي :

    Dim nRowCount As Integer
    nRowCount = Rows.Count
    MsgBox nRowCount

أولاً عايزين نتعلم شيء مهم جداً وإحنا لسه في البداية : إننا لما نيجي نسمي متغير يا ريت يكون الاسم وصفي (يعني كل المتغيرات عندي هسميها وصفي ..شكلك بتعزه يا أستاذ ...طيب ما نسميه شوقي أو مراد ..لازم وصفي ) .. يا جدعان انتو فهمتوني غلط أنا أقصد بكلمة وصفي إنه يوصف الاسم بشكل كويس .. يعني مثلا نشوف نوع المتغير نلاقيه Integer فنقوم في أول الاسم نحط مثلا n عشان يوضح لأي حد يقرا الكود إنه Interger ، وبعد الحرف الدلالي n نكتب اسم للمتغير يكون دال عليه .. أنا مثلا هعد الصفوف فاقوم أكتب RowCount .. يبقا في النهاية اسم المتغير nRowCount ...طبعا اللي بقوله ده مش الزامي ..دي عادة حسنة بيتبعها المبرمجون المحترفون ..مش الاقي ناس تكتب mghy حاجة كدا ملهاش دلالة على اسم المتغير ...!!

السطر التاني وضعنا قيمة للمتغير وهي Rows.Count وطبعا كلمة Count دي Method بمعنى (عد) ، ودي وظيفتها إنها تعد بس تعد ايه .. تعد الصفوف Rows

واحد يقولي طيب ممكن أعد الأعمدة أقوله أيوا Columns.Count مفيش مشكلة .. واحد يقولي يعني ممكن أعد الخلايا في نطاق معين زي A1:C5 ، بردو مفيش مشكلة

Range(Cells(1, 1), Cells(5, 3)).Count

المهم خلينا في السطر التالت (محدش يخرجني برا الموضوع)

.. مش محتاج شرح ..إظهار قيمة عدد الصفوف في رسالة

ننفذ الكود (رسالة خطأ .. ميهمكش من الفشل .!! )

واحد هيسألني طيب الغلطة فين ..كل حاجة زي الفل .. المحرر دا بيستعبط ! أنا مش هشتغل على المحرر دا تاني سلااام ..

هرد عليه وأقوله اصبر بس كل الحكاية إننا بنتعامل بقواعد وقوانين ..أنا لما عرفت المتغير حددت نوعه بـ Integer ودا بيكون للأرقام الصحيحة ما بين

32, 767

و القيمة السالبة

-32, 768

يعني ببساطة بيتعامل مع الأرقام دي وبس ..ميقدرش يتعامل مع أكبر من كدا ..

طيب ايه الحل ؟ ايه البديل ؟ البديل المتغير Long دا بيتعامل مع الأرقام الصحيحة بردو ، بس ما بين

2,147,483,647

-2,147,483,648

طيب نرجع للكود بتاعنا ..عدد الصفوف في إكسيل 2007 مثلا يساوي 1048576 ، والمتغير Integer قلنا إن صحته على أده ، فيقوم المتغير Long ييجي ويشيل..

يبقا كل اللي هنغيره كلمة واحدة عشان الامور تمشي تمام (نشيل Integer ونحط Long)

يعني ممكن الكود يكون بالشكل ده (لاحظوا أنا هغير البادئة في اسم المتغير إلى L اختصار Long)

    Dim LRowCount As Long
    LRowCount = Rows.Count
    MsgBox LRowCount

بكدا نكون اتعرفنا على Integer و Long في حالة التعامل مع الأعداد الصحيحة.

ننتقل لجزئية جديدة .. التعامل مع الأرقام اللي فيها كسور عشرية..

مش هنطول في الكلام ، هناخد باختصار مثال عملي عشان نفهم الدنيا ماشية إزاي

    Dim FloatingPoint As Single
    FloatingPoint = 10 / 3
    MsgBox FloatingPoint

طيب نغير كلمة Single بكلمة Double ونلاحظ الفرق..!!

مش هشرح الفرق لكن هقول إن اللي فهم الفرق بين Integer و Long ، هيفهم الفرق بين Single و Double ...

حازم رفع ايده وقالي لأ يا باشا اشرحها بردو (حاضر يا عم حازم حازم هنشرحها عشان نأكد المعلومة بس مش أكتر )

لما استعملنا النوع Single نلاحظ إن عدد الأرقام العشرية 6 بس ، أما Double فنلاقي إن اللي على يمين العلامة 14 رقم (جرب الكود مرة كدا ومرة كدا وعد بنفسك (فيه ناس هتكسل))

نقطع على الجماعة المدرسين اللي بدوا رياضيات ، ونقول إن مساحة الدائرة = ط نق2 ، والله مش عارف إذا كان صح ولا غلط

عموما القيمة ط = 22/7 ، ودي موجودة في الإكسيل باسم Pi ، يعني لو كتبنا في خلية

=PI()

هيديني قيمة الـ ط ... المهم نستفيد في المثال التالي معلومة جديدة (إننا ممكن سنتخدم بعض الدوال الموجودة في الإكسيل ونطبقها في الـ VBA)

Dim FloatingPoint As Single
FloatingPoint = WorksheetFunction.Pi
MsgBox FloatingPoint

نخلي بالنا إننا وضعنا قيمة للمتغير واستخدمنا WorksheetFunction عشان أقول لمحرر الأكواد إننا هنستخدم دالة ، وبعدين نقطة Period وبعدين اسم الدالة هنا Pi ومفيش أقواس (دا الاختلاف ..لما استخدمناها في ورقة العمل كان لازم أقواس أما هنا فلا يتم استخدامها ..

نجرب مرة المتغير Single ومرة المتغير Double ..(أي خدمة يا حازم حازم .. منستغناش عن خدماتك يا متسر ياسر ياسر )

نكمل كلام عن المتغيرات عشان نخلص منها :

نتكلم عن المتغير التقيل Variant ودا بنستخدمه لما نكون مش عارفين نحدد القيمة هل هي رقم ولا نص ولا كائن Object ولا ولا (ولى زمن الجهل وأقبل زمن التعلم) .. فبنستخدمها ..بس نخلي بالنا إنها بتستهلك مساحة من الذاكرة فكثرة استخدامها بتخلي التعامل مع الأكواد يكون بطيء ..

المتغير اللذيذ Boolean ودا يا أبيض يا أسود .. يا صح يا غلط .. يا True يا False .. يا 1 يا صفر

بتكون القيمة المخرجة إحدى قميتين فقط

Dim bOfficena As Boolean
MsgBox bOfficena

هنا حددنا نوع المتغير بـ Boolean .. لما ننفذ الكود هنلاقي رسالة فيها False (نفهم من كدا إن الاختيار الافتراضي هو False) يعني مش زينا بنفترض حسن النية ، لا دا ماشي بمبدأ المتهم مجرم حتى تثبت براءته ، فهنا وضع القيمة False للمتغير ..

نجرب نضع القيمة صفر

Dim bOfficena As Boolean
bOfficena = 0
MsgBox bOfficena

هنلاقي نفس الناتج اللي فات False ..!!

نغير شوية ونخلي القيمة أي قيمة غير الصفر ، هتلاقي الناتج True

فيه متغيرات تانية زي Date للتعامل مع التواريخ ، والمتغير Currency للتعامل مع العملات

وبكدا كفاية أوي على المتغيرات .. المهم في الموضوع الفكرة تكون وصلت .. للمزيد من الشروحات يرجى الإطلاع على الدورة الرائعة التي يقوم بها أخونا محمود الشريف (كلنا بنكمل بعض ..دا شعارنا في المنتدى ..أنا بس مجرد واحد معاه مفاتيح ..هديكم نسخة منها عشان تعرفوا تفتحوا الباب يا أحباب)

كان معكم صانع المفاتيح Keys Maker أخوكم أبو البراء

وإلى لقاء في حلقة جديدة من حلقات افتح الباب واهرب من الشباك ..

دمتم بود .. تقبلوا حبي وأشواقي وتحياتي القلبية

تم تعديل نوفمبر 27, 2014 بواسطه عبدالله باقشير

[ياسر خليل أبو البراء]

الحلقة السابعة

***********

السلام عليكم ورحمة الله وبركاته

عنوان حلقة اليوم (هيا بنا نلعب ونبني !)

النهاردة هنشتغل في البناء .. والبناء هنا هيكون بناء دالة Function .. ممكن يكون الدرس اللي زي كدا مرحلة متقدمة بس أنا تعمدت أشتغل فيها عشان نسبق ونتسابق للمراحل المتقدمة وإحنا في البدايات ، وعشان الناس اللي مستواها متقدم تشارك معانا ، ومتحسش بالملل من البدايات اللي هما شايفينها سخيفة.

 

** كلنا عارفين إن برنامج الإكسيل بيوفر لنا عدد كبير جدا من الدوال الجاهزة اللي نقدر نستفيد بيها بشكل كبير ، وكمان فيه إضافات Addins بتكون فيها دوال يمكن استخدامها .. لكن مع الوقت هتلاقي نفسك محتاج تعمل دالة (تبني دالة ) بحيث توفر لك الوقت والجهد ..

النوع ده من الدوال اللي بتبنيه بنفسك بيطلق عليه (الدوال المعرفة UDF ودي اختصار لـ User Defined Function ) ، وممكن نقول عليها (دوال مخصوصة .. يعني بالبلدي كدا دوال تفصيل .. بنفصلها بحيث تناسب احتياجتنا)

هناخد مثال بسيط عشان نفهم إزاي نتعامل مع بناء الدوال : أول شيء لازم يكون عندك المعطيات اللي هتشتغل بيها .. لو قلنا مثلا عايزين نعمل دالة نحسب بيها مساحة المستطيل ..يبقا الأول نعرف معادلة مساحة المستطيل Area = (الطول * العرض) (محدش يكون نظره ضعيف ويقرا العرض من غير نقطة ، لأحسن تودونا في داهية)

يبقا المعطيات عندي : الطول والعرض ، هنقول الطول Length والعرض Width .. دي طبعا هتكون متغيرات لأننا مش عارفين قيمتهم كام ، ولأن قيمتهم مش ثابتة ؛ فنطلق عليهم (المتغيرات)

ممكن نعملها على شكل معادلة ونقول :

Area = Length * Width

خطوات البناء :

هنفتح محرر الأكواد وندرج موديول جديد ونستعد لعملية البناء ..ركزوا معايا يا أحباب

Function Area()

End Function

أول شيء نكتب كلمة Function مش Sub يا صالح .. إحنا هنشتغل على دالة يبقا نكتب Function أما كلمة Sub فدي بتكون للإجراء الفرعي ..وبعدين نترك مسافة (بالمسطرة أكيد) ونكتب اسم للدالة .. هنسميها هنا اسم معبر Area لأننا عايزين نحسب المساحة وبعدين لما تضغط Enter هتلاقي محرر الأكواد عمل قوسين بعد اسم الدالة وقفل بالجملة End Function (ومننساش دايما القفلة مطلوبة ..لازم يكون تقفيلك مظبوط)

ما بين السطرين اللي اتكتبوا دول هتبدأ تكتب الأكواد المطلوبة لتنفيذ العملية الحسابية لحساب مساحة المستطيل ...

بس قبل ما نبدأ يا ريت نحط مؤشر الماوس بين القوسين (ايه ده هما القوسين دول طلعلهم لازمة .. أنا كنت مفكرهم زينة وشكل .. حاجة تحلي شكل المحرر زي غترة كدا !) ..

القوسين دول بنستخدمهم لتحديد متغيرات الدالة ودي بنسميها arguments ، زي المتغيرات Variables بس دي بيتم الإعلان عنها داخل الأقواس دي ..( يعني هيا متغيرات بس ممكن نقول إنها متغيرات من فصيلة الذوات .. بمعنى إنها مهمة وليها برستيج ، فأول ما نعلن عنها نعلن عنها في الأول قبل ما نبدأ نشتغل عليها).

هنكتب اسم المتغير ونوعه زي كدا

Function Area(Length As Double, Width As Double)

End Function

وإحنا بنكتب المتغير وبعديه كلمة As أول ما ناخد مسافة ، هنلاقي فيه قايمة ظهرت لي عشان أختار منها (ممكن نطنشها ..نتجاهلها) أو ممكن نستفيد منها إننا نشوف الكلمة اللي عايزينها ولما نلاقيها نضغط عليها Double Click يعني دبل كليك (شفتوا الترجمة دي .. مش أي حد يترجم خلوا بالكم) ، لما نضغط دبل كليك عليها هنلاقيها اتكتبت ، يا إما نضغط Tab من لوحة المفاتيح ..

أول متغير اسمه Length اللي هو خاص بالطول ، وحددنا نوعه بـ Double ودا زي ما عرفنا بيستخدم مع الأرقام العشرية الطويلة .

تاني متغير اسمه Width وبردو حددناه نفس النوع .. ومننساش عشان الأمور تكون صحيحة بنضع فاصلة بين المتغيرين ..عشان عمنا المحرر ميحصلش عنده لبس !!

 

بكدا نكون انتهينا الحمد لله .. عندك لسه مخلصناش ..دي كانت البداية والنهاية .. نيجي بقا للجد اللي هو هزار

نكتب السطر اللي جاي ده ما بين البداية والنهاية

Area = Length * Width

يا ريت بعد إذنكم بلاش كسل - محدش ياخد السطر كوبي ويروح يعمل Paste - لا أنا عايز أتعبكم - ما أنا تعبان من الكتابة - اتعبوا شوية انتو كمان .. كله يكتب (اكتب يا حسين .. سجل كل كلمة بيقولها !!) ..

الفايدة من الكتابة إننا أول ما نكتب كلمة Area وناخد مسافة ، نلاحظ مستطيل أصفر ظهر لي بيشرح لي متغيرات الدالة .. حلوة ولا ملهاش فايدة .. الفايدة إنها تعتبر زي وسيلة مساعدة ، عشان لما نحب نستخدم الدالة دي في كود تاني أو دالة تانية .. (معنى الكلام اللي بقوله إننا ممكن نبني دالة ونستخدمها في دالة تانية أو كود أو خلافه ..كنوع من التيسير)

لو كتبنا أول حرف في كلمة length أو width بحرف small ، هتلاقي المحرر بعد ما تخلص بيحول الحروف الأولى دي لحروف Capital ، ودي سببها إن الكلمات دي متعرف عليها قبل كدا في أول الدالة.

 

كدا تمام تم بناء الدالة (بالسهولة دي ! أيوا بالسهولة دي .. الفكرة مش معقدة .. كلنا اللي إحنا عايزينه مساحة المستطيل والمساحة = الطول * العرض (بس خلاص على رأي شعبولة)

نيجي بقا نشوف نتيجة الكلام اللي إحنا عملناه في ورقة العمل .. واحد يقول هنضغط Run (هقوله لا دا مش إجراء فرعي .. دي دالة ، ودلوقتي طالما كتبتها عندك في ملفك أصبح زيها زي أي دالة ، يعني زيها زي الدوال الموجودة في الإكسيل ..وببساطة شديدة تقدر تستعملها ..)

تطبيق على الدالة : قم بوضع القيمة 9 في الخلية A1 والقيمة 6.5 في الخلية B1 ، وبعدين في الخلية C1 قم بعمل معادلة للدالة اللي إنت بنيتها:

=area(A1,B1)

نخلي بالنا ..لما نستخدم الدالة بنستخدمها بنفس الشكل اللي بنيناها بيه ، يعني المتغير Length بييجي بعديه فاصلة ثم المتغير Width ..نشوف الناتج هنلاقية 58.5 .. وبكدا عرفنا مساحة المستطيل بدلالة الطول والعرض ..

نجرب نمسح الخليةB1 ونشوف الناتج ، هنلاقي الناتج صفر ، ودا طبيعي لأن أي رقم * فراغ = صفر

بس أنا عايز أحط شروط مختلفة ، أنا عايز الناتج ميكونش صفر .. لما يكون العرض مش موجود يضرب الطول في نفسه ..(ايه الكلام الصعب ده )

نرجع تاني للدالة ونبدأ نشوف ايه اللي ممكن نعمله ..؟

في الحالة دي طالما إن إنت عايز تخلي العرض اختياري وليس إجباري ، يبقا هتحدد الكلام ده للمحرر ، وتقوله Optional (اختياري)

Function Area(Length As Double, Optional Width As Variant)
    Area = Length * Width
End Function

هنا غيرنا نوع المتغير إلى Variant، تحسبا إنك ممكن تترك الخلية اللي فيها العرض فارغة ..

واحد هيقول : خلااص ، هرد أقوله : لسه !

طالما إننا خلينا العرض اختياري ، يبقا لازم نحط شرط ، ونشوف الشرط إذا تحقق يعمل ايه ، ولو الشرط متحققش يعمل ايه ..!!

نرجع لمرحلة الإعدادي لما كنا بناخد قاعدة IF بمعنى إذا أو لو (وعرفنا أيامها إن لو حرف شعلقة في الجو) ..

جملة IF في البرمجة : بييجي وراها شرط ، ولو الشرط اتحقق ايه اللي يحصل ، ولو متحققش ايه اللي يحصل .

الشرط اللي هنحطه .. في حالة عدم وجود العرض يعمل ايه ؟ يضرب الطول في نفسه (الطول * الطول) ، طيب لو كان موجود العرض ، يبقا يضرب الطول * العرض

Function Area(Length As Double, Optional Width As Variant)
    If IsMissing(Width) Then
        Area = Length * Length
    Else
        Area = Length * Width
    End If
End Function

ما هذا ؟؟ هذا ماذا ؟

هذا هو شكل الدالة بلغة البرمجة ، زي ما فهمناها نترجمها .. بعد كلمة If بييجي الشرط ، والشرط نخلي بالنا يا إما True يا إما False .. لو True ينفذ السطر اللي بعد كلمة Then مباشرة ، لو False ينفذ السطر اللي بعد سطر Else

وجملة If الشكل العام ليها زي كدا

    If الشرط Then
        الكود في حالة تحقق الشرط
    Else
        الكود في حالة عدم تحقق الشرط
    End If

محدش ياخد الكود ده في محرر الأكواد (دا للتوضيح .. واحد مش معبرني وبردو بياخد الشكل ده كوبي ورايح على محرر الأكود ..سيبوه يتصدم !!)

أعتقد الصورة كدا بقت واضحة ..

استعملنا في الشرط كلمة IsMissing ، الترجمة الحرفية ليها هل مفقود ؟ هل مفقود العرض ؟ -- يعني هل المتغير المسمى العرض مفقود ؟ لو كان مفقود هيتم حساب المساحة بضرب الطول * الطول ، ولو كان موجود يطنش الجزء الأول وينفذ الجزء التاني ، ويضرب الطول * العرض

نرجع لورقة العمل ونعدل المعادلة ونخليها :

=area(A1)

كدا مفيش المتغير الخاص بالعرض ، فتقوم الدالة تضرب الطول * الطول ، ويطلع الناتج 81

لو فضلت المعادلة زي ما كانت في الأول هيكون الناتج صفر ..

طيب دا هيكون واجب : عايزين نضيف شرط وهنستخدم فيه معامل الشرط OR ..بحيث لو كان العرض = 0 يضرب الطول * الطول ...

 

سامع واحد من اللي بيقروا بيدعي عليا ، وبيقول حرام عليك طلعت عنينا عشان نعرف مساحة المستطيل ، دا أنا أرحم لي إن أحسبها بايدي وأريح بالي ..

معلش استحملوني ! دا كان مجرد مثال عشان نفهم إزاي نقدر نبني دالة ..

واجب تاني غير الأولاني (مش هرحمكم!) : قم ببناء دالة بسيطة ، بحيث لو قيمة معينة أكبر من أو يساوي 100 يكتب ممتاز ، لو أقل من 100 يكتب جيد

وإلى لقاء مع حلقة جديدة من حلقات افتح الباب واجري ورايا

كان معكم البنا أبو البراء من شركة مؤسسة أوفيسنا لأعمال البناء ..

إلى أن ألقاكم بخير .. دمتم في حفظ الله

تم تعديل نوفمبر 27, 2014 بواسطه YasserKhalil

[ياسر خليل أبو البراء]

الحلقة الثامنة

***********

السلام عليكم ورحمة الله وبركاته

أسعد الله أوقاتكم إخواني الكرام في الصرح العملاق

هنتكلم النهاردة عن نافذة مهمة جدا ومهمشة في الشروحات إلى حد كبير .. النافذة اسمها (النافذة الفورية Immediate Window)

ودي بتفكرني بالخميرة الفورية .. تلاقي ست البيت مستعجلة ع العجين ، ومعندهاش صبر ، كتر خيرها وراها فيس بوك مش فاضية للعجين ، تقوم تستخدم الخميرة الفورية عشان العجين يخمر بسرعة ..(واحد هيقولي إنت شكلك شغال في فرن) !

نفس الفكرة معانا بردو مع النافذة الفورية اللي هنتكلم عليها ، بمعنى لو فيه سطر معين من الأكواد عايز تشوف نتيجته بشكل فوري ، يبقا هو دا المكان المناسب عشان تحصل على النتيجة السريعة ..

أولاً قبل ما ننسى وياخدنا الكلام ، إحنا بنظهر النافذة دي من قايمة View ثم Immediate Window ، واللي هيركز هيلاقي الاختصار الخاص بيها CTRL + G

بتظهر النافذة دي أسفل المحرر ودي من ضمن هيكلة محرر الأكواد ، ممكن تتحكم في حجمها من خلال سهم بيظهر في المربع الأحمر في الصورة دي :

المهم هي دي النافذة الفورية ، بصراحة أداة رائعة للي يفهمها كويس ، ممكن من خلالها تنفيذ الأكواد بشكل سريع ، وممكن تجاوبك على الأسئلة بشكل فوري وهنشوف الكلام ده بالأمثلة ، وبتستخدم لتصحيح الأخطاء البرمجية Debugging ، وكمان تستخدم لإظهار نتائج الكود ....

الكلام النظري مش هيفيد زي العملي .. فلنبدأ الحلقة :

أولا هنشتغل محققين (أخيرا الواحد ياخد وضعه - مش هنفضل كدا ملطشة دايما ، إحنا اللي دايما بنتسأل ) إحنا نسأل وهو يجاوب ، ومننساش الإجابة هتكون فورية ...

طبعاً كل اللي ظاهر قدامنا مجرد مؤشر الماوس واقف في أول النافذة .. إحنا اتعودنا إن السؤال دايما بيكون آخره علامة الاستفهام ، هنا الوضع مختلف ، إحنا هنحط علامة الاستفهام في الأول عشان نخض النافذة كأننا بنقولها انتبهي هسألك ، وجاوبي في الحال :

نكتب مثلاً السطر التالي (نكتبه يا كابتن حسام مش ننسخه)

?Rows.Count

أو

? Rows.Count

ممكن بعد علامة الاستفهام نترك مسافة أو لا نترك ، الأمر سيان ، وممكن مؤشر الماوس يكون في نهاية السطر أو في أي مكان داخل السطر ، الأمر سيان .. بعد ما نكتب نضغط Enter نلاقي الإجابة في التو وفي الحال (ونعم النافذة المطيعة)

السطر اللي فات هيعد عدد الصفوف في ورقة العمل (1048576) .. الإجابة هتكون من غير أقواس

? Columns.Count

عدد الأعدمة في ورقة العمل ، الإجابة (16384)

محدش يجرب يعد الخلايا لأن دا هيسبب حاجة اسمها Overflow (جرب بنفسك هيطلع لك رسالة خطأ)

نجرب نعد أوراق العمل

? Worksheets.Count

أو

? Sheets.Count

نجرب نفتح مصنفين مثلاً ونجرب السطر التالي

? Workbooks.Count

السطر الأخير لعد المصنفات المفتوحة!!

 

ناخد أمثلة تانية ، هو مفيش غير أسئلة العد دي .. لا طبعا الأسئلة كتير ، بس أنا بقول بالمرة نتعلم أسطر جديدة عشان نستفيد منها في التطبيق العملي

 

طيب نخلي نافذة الإكسيل ونافذة المحرر جنب بعض زي ما اتعلمنا قبل كدا ، ونضع في الخلية B4 القيمة 100 ، وبعدين كليك يمين وتنسيق خلايا ، ونخلي تنسيق الخلية كعملة بالجنيه المصري مثلاً ، ونلونها باللون الأصفر بلاش الأحمر اللي الناس هتبدأ تتعقد منه ،  ونخلينا واقفين في الخلية B4 بحيث تكون الخلية هي الخلية النشطة ActiveCell.. نرجع للفورية (النافذة الفورية إنتو لحقتو تنسوا !! ربنا يستر عليكم من الزهايمر) ، ونكتب السطر التالي لمعرفة قيمة الخلية B4 :

? Range("B4").Value

ونجرب السطر التالي لمعرفة تنسيق الخلية B4 اللي هي الخلية النشطة :

? ActiveCell.NumberFormat

ونكتب السطر التالي لمعرفة عرض العمود للخلية النشطة :

? ActiveCell.ColumnWidth

ونكتب السطر التالي لمعرفة عنوان الخلية النشطة :

? ActiveCell.Address

ونكتب السطر التالي لمعرفة رقم صف الخلية النشطة :

? ActiveCell.Row

ونكتب السطر التالي لمعرفة رقم عمود الخلية النشطة :

? ActiveCell.Column

ونكتب السطر التالي لمعرفة رقم اللون الداخلي للخلية النشطة (مش لون الخط Font ) :

? ActiveCell.Interior.Color

ونكتب السطر التالي لمعرفة اسم ورقة العمل اللي موجودة فيه الخلية النشطة :

? ActiveCell.Parent.Name

في السطر الأخير الكلمة Parent في اللغة الإنجليزية معناها (أحد الوالدين .. وأنا هترجمها الأم ؛ لأن الأم متوصي عليها 3 مرات) ، فالخلية النشطة جزء صغير من الحضن الكبير اللي هو ورقة العمل ، فبالتالي الخلية بمثابة الابن ، وورقة العمل بمثابة الأم ، ففي السطر اللي فات عايزين نعرف اسم الأم للخلية النشطة (واحد هيقولي النتيجة هتطلع كريمة مختار ..ما هي بتطلع بدور الأم دايما ) .. أنا بالفعل خليت اسم الشيت (كريمة مختار) فطلعت النتيجة (كريمة مختار) بس الاسم من غير أقواس ..

 

أنا طولت في الجزئية اللي فاتت عشان نقدر نستفيد كمان من الأكواد المختلفة عشان نبدأ نتقدم في مرحلة التعلم بشكل أسرع (وعشان كمان عجباني شغلانة المحقق دي بصراحة ..أنا أسأل وهو يجاوب !!)

 

ننتقل لجزئية تانية : النافذة دي ليها دور تاني غير اللي عملناه من شوية ، إننا نقدر من خلالها ننفذ الكود مباشرة ، بس بشرط يكون الكود سطر واحد

ناخد مثال تطبيقي عملي ، ونكتب السطر التالي لتغيير لون التاب Tab (التبويبات المختلفة لأوراق العمل) - مننساش قبل ما نضغط إنتر نبص على لون التبويب لورقة العمل النشطة ActiveSheet :

ActiveSheet.Tab.Color = vbRed

لو معجبكش اللون خليه vbYellow ، ولا تزعل نفسك يا منير !!

السطر ببساطة بيتعامل مع ورقة العمل النشطة (مش الخلية النشطة نخلي بالنا) وبعدين Tab للتعامل مع التبويبات لأوراق العمل ، وأخيراً Color لتحديد قيمة للون التاب ، ونخلي القيمة اللون اللي يناسبنا .. بكدا نعرف معلومة جديدة إننا ممكن ننفذ الكود من خلال النافذة الفورية ، ونشوف نتيجة تنفيذه في ورقة العمل مباشرةً..

نجرب السطر التالي لتنسيق عرض الأعمدة من A إلى D بمقدار 5 :

Columns("A:D").ColumnWidth = 5

ونكتب السطر التالي لجعل ورقة العمل المسماة Sheet1 مخفية :

Worksheets("Sheet1").Visible = False
أو
Sheets("Sheet1").Visible = False

ولإظهارها بنغير القيمة False إلى القيمة True .. وممكن نستغنى عن القيمتين دول ، لو عايزين نتعلم الصح هنا .. هنتعلم من خلال الأسطر القادمة التعامل مع الخاصية Visible >>

بالنسبة للخاصية Visible ممكن نحط لها قيمة من 3 قيم : -1 أو xlSheetVisible (لإظهار ورقة العمل ...)

* القيمة 0 أو xlSheetHidden (لإخفاء ورقة العمل ..)

* القيمة 2 أو xlSheetVeryHidden (لإخفاء ورقة العمل ..)

محدش منتبه ليه ؟ شكلي كدا هبطل الحلقات بسبب عدم التركيز .. القيمة 0 والقيمة 2 للخاصية Visible نفس الوظيفة (طبعا ً لا .. طبعاً لأ) أمال ايه الموضوع ؟ ايه الفرق؟

القيمة 0 ، دا إخفاء عادي ، يعني ممكن لو أي مستخدم عنده خبرة وعمل كليك يمين على التاب الخاص بأسماء أوراق العمل ، هيلاقي الأمر Unhide ، هيضغط عليه هيلاقي الورقة المخفية ، فيقوم يظهرها ..

أما القيمة 2 ، فدا الإخفاء السوبر (زي التطشيب السوبر لوكس) ، دا بقا يخلي المستخدم لو عمل كليك يمين في المكان اللي قلنا عليه ، هيلاقي الأمر Unhide مش أكتيف مش نشط ..!

ولإظهار الورقة في هذه الحالة لابد من الدخول على محرر الأكواد ، ومن النافذة properties (ودي لو مش ظاهرة بنضغط F4 تقوم تطل علينا بطلعتها البهية ) ، هنحدد ورقة العمل المسماة Sheet1 ونشوف نافذة الـ Properties في آخرها هنلاقي الخاصية Visible نختار منها أول اختيار الخاص بإظهار ورقة العمل ..

أو نستخدم الكود لإظهارها ..

السطر اللي المفروض نكتبه هيكون بالشكل ده :

Sheets("Sheet1").Visible = -1

خلاصة الجزئية اللي فاتت إننا ممكن ننفذ الأكواد عن طريق النافذة السحرية (أنا حر في تسميتها ..بلاش تعترض يا مدحت)

 

ننتقل لجزئية جديدة ، مع اسستخدام جديد للنافذة العبقرية ، ألا وهي تصحيح الأخطاء البرمجية (ودا الاستخدام الشائع ليها) ودا بيطلق عليه Debugging ..

الأخطاء البرمجية بيطلق عليه Bugs (بق : لأن البق حشرة ضارة ، زيها زي الخطأ البرمجي ضار بالكود)

قبل ما نسرد في الشرح نتعرف على كائن اسمه Debug ودا بيستخدم في الأكواد عشان يطبع (بس مش على ورق ..أمال هيطبع على ايه ؟؟ هيطبع النتائج في النافذة الفورية) ، والخاصية المرتبطة بهذا الكائن الخرافي اسمها Print ، ونرجع تاني بالذاكرة عشان نتذكر المعلومة اللي ذكرناها عن الفعل Print إنه Method ..

ناخد مثال عملي عشان نفهم إزاي نستخدم الكائن Debug ، أدرج موديول جديد ، وضع فيه هذا الإجراء الفرعي :

Sub ErrorCode()
    MyRandomNumber = Rnd() / 0
  End Sub

فيه دالة بالإكسيل اسمها Rand لعمل أرقام عشوائية بين الصفر والواحد ، ولو حبينا تكون الأرقام العشوائية بين الصفر والعشرة مثلاً نضرب * 10

داخل ورقة العمل قم بتحديد مجموعة خلايا واكتب المعادلة التالية ثم اضغط Ctrl + Enter ، ولتجربة المعادلة اضغط F9

=RAND()*10

المقابل للدالة دي في محرر الأكواد Rnd ووراها قوسين ، يعني الاختلاف في حرف واحد زيادة في الدالة (يا عم بيل جيتس يعني فرقت معاك في الحرف ده ، ما كنت خلتها نفس الحروف !!)

يرجع مرجعونا للكود : المتغير وضعنا له قيمة رقم عشوائي على صفر (وعارفين في الرياضيات أنه لا يمكن القسمة على صفر) يعني هذه القيمة تعتبر باطلة

ننفذ الكود هنلاقي رسالة خطأ بتقول : Divison By Zero ، نضغط على إنهاء للخروج من نافذة الخطأ

.. ممكن واحد مذاكر شوية يقول فيه جملة أنا حافظها عشان أتلاشى رسالة الخطأ :

On Error Resume Next

والجملة دي نحطها قبل السطر اللي فيه الخطأ البرمجي ..

دلوقتي لو نفذنا الكود هنلاقي إن مفيش حاجة حصلت ، طيب نضيف سطر أخير زي كدا :

Sub ErrorCode()
    On Error Resume Next
    MyRandomNumber = Rnd() / 0
    Debug.Print Err.Description
End Sub

السطر الأخير بيتعامل مع النافذة الفورية ، ننفذ الكود وعنينا على النافذة الفورية .. نفذتوا الكود :: نلاحظ الجملة دي ظهرت في النافذة الفورية Division by zero ، ودي وصف للخطأ البرمجي الموجود داخل الكود ..

كلمة Err دي اختصار لكلمة Error (خطأ) ، وبعدين نقطة فتظهر الخواص المرتبطة بكلمة Err ، هنلاقي كلمة Description ودي معناها وصف .. خلاصة لكلام وصف الخطأ .

والناتج هيظهر لي في النافذة الفورية ..

معلومة تانية ، ممكن ننفذ الكود من خلال النافذة الفورية عن طريق أمر اسمه Call وبعديه مسافة متبعة باسم الإجراء الفرعي أو الدالة بهذا الشكل

Call ErrorCode()

وممكن نكتب القوسين أو منكتبهمش الأمر سيان !!

 

ناخد مثال تاني على دالة UDF دالة معرفة ، ودي اتكلمنا عليها الحلقة اللي فاتت ..

هنعمل دالة بسيطة على السريع ، عشان نطبقها في النافذة الفورية :

Function MyName() As String
    MyName = "YasserKhalil"
End Function

نكتب ايه في النافذة الفورية ؟؟ في حالة الإجراء الفرعي من شوية كتبنا الأمر Call متبوع بمسافة وبعدين اسم الإجراء الفرعي عشان أقدر أنفذ الكود داخل النافذة الفورية ، أما بالنسبة للدالة Function فبنستخدم علامة استفهام في البداية

? MyName

جرب الأمر Call قبل MyName وجرب تشيله مرة ، هتلاقي مفيش نتيجة تظهر لك .. الشكل الصحيح في السطر اللي فات وبس

يبقا نخلي بالنا في حالة استدعاء الإجراء الفرعي بنستخدم Call ، أما في حالة الدوال فبنستخدم علامة استفهام قبل اسم الدالة ..

 

نرجع تاني للكائن Debug هل الكائن الخرافي ده مرتبط بالأخطاء فقط ؟؟ الإجابة لا ، هو بييجي وراه كلمة Print لطباعة أي نتائج .. وكمثال أخير عشان الحلقة طولت :

Sub PrintX()
    For X = 1 To 5
        Debug.Print X
    Next X
End Sub

في الكود الموجود يا عبد الودود فيه حاجة في الـ VBA اسمها الحلقة التكرارية ، ودي مش هشرحها ، لأن فيه موضوع في توقيعي خاص بالحلقة التكرارية For.. Next ، ومرفق بالموضوع ملف فيديو في المشاركات (يرجى الرجوع إليه ..)

ما بين سطرين الحلقة التكرارية الأمر اللي بيقوم بطباعة قيمة المتغير X في النافذة الفورية .. ركز في النافذة السحرية هتلاقي النتايج الفورية ، على ما خلصت الحلقة ديا أنا طلعت عينيا ..

يارب تكونوا استفدتوا بنسبة 100% ، وإلى لقاء مع حلقة مفيدة ومجدية ، أترككم في حفظ الله .

مثال آخر : لمزيد من التوضيح (مثال بدون شرح) >> حلقة تكرارية لأوراق العمل الموجودة داخل المصنف << (الواجب تنفيذ الكود وشرحه)

Sub List_Sheets()
    Dim WS As Worksheet
        For Each WS In Worksheets
            Debug.Print WS.Name
        Next WS
End Sub

كان معكم المحقق أبو البراء من نيابة أوفيسنا ..

والسلام حسن الختام ...

[ياسر خليل أبو البراء]

الحلقة التاسعة

************

السلام عليكم ورحمة الله وبركاته

النهاردة هنضرب 3 أشباح بحجر واحد (نشتغل قناصة) ، يعني الحلقة دي هنتكلم عن 3 أمور ..

هنراجع على كيفية بناء دالة (هنأكد عليها بمثالين) ، ومن خلال المثالين (الشبحين) هنتعلم إزاي نتعامل مع الشروط .. يبقا مراجعة + معلومتين !

حلقة النهاردة مفيهاش كلام كتير ، بس موعدكمش إنتو عارفين طبعي بحب الرغي! معظمها هتكون عملي .. لنبدأ الحلقة على بركة الله

الشكل العام لـ IF الشرطية .. عندنا 4 أشكال :

الشكل الأول والثاني : لو هنتعامل مع شرط واحد وكل اللي يهمنا إن الشرط يتحقق ، مثال :

If 100 > 90 Then MsgBox "The number 100 is greater than 90"

الجملة لازم تبدأ بـ IF وبعديها جملة الشرط ، جملة الشرط هنا 100 أكبر من 90 (واحد هيقولي مش دي علامة أصغر من ..هقوله متنساش إننا بنكتب من الشمال لليمين ، والعلامة ممكن تقراها حسب الاتجاه ، بالعامية كدا إحنا قرينا رقم 100 مثلا هنلاقي الفتحة نحية الرقم 100 يبقا كدا نقراها أكبر من ) عارف إنها معلومة بسيطة بس فيه ناس ممكن يحصل عندها Confusion.

الشرط اللي بنكتبه بيكون نتيجته حاجة من اتنين يا أبيض يا إسود (يا إما True يا إما False) ، لو كانت نتيجة الشرط True صحيحة بالمعنى البلدي يبقا اللي جاي هيتم تنفيذه ، أما لو كانت False المحرر مش هيعبر الجملة اللي ورا كلمة Then وهيعديها ، ويقول للسطر اللي بعد Then (عدي يا كود مفيش منك مصلحة)

نجرب نغير علامة أكبر من إلى أصغر من ، ونشوف النتيجة ، مفيش تنفيذ لسطر الكود لأن الشرط لم يتحقق !!

لاحظنا إننا كتبنا كله في سطر واحد .. ممكن اللي فات يتكتب في 3 أسطر في الحالة دي هيكون بالشكل ده :

If 100 > 90 Then
MsgBox "The number 100 is greater than 90"
End If

هنا الشرط في سطر متبوع بكلمة Then ، والسطر المراد تنفيذه في حالة تحقق الشرط (بقول تاني في حالة تحقق الشرط) دا السطر التاني ، طيب والسطر التالت ده جه منين (دا القفلة زي ما اتعودنا قفلة جملة If بتكون جملة End If ، ولاحظوا إننا في الشكل الأول مستعملناش القفلة لأننا كتبناها في سطر واحد فقط ..

 

الشكل التالت : لما نتعامل مع شرط واحد بردو ، بس في الحالة دي إحنا عايزين نحدد ايه المطلوب من المحرر لما الشرط يتحقق ، وايه المطلوب لما الشرط ميتحققش .. بالمثال يتضح الكلام المكلكع ده :

نفس المثال اللي فات بس هنزود عليه شرط إذا لم يتحقق الشرط ، بيتم استخدام جملة Else بهذا الشكل :

    If 100 > 90 Then
        MsgBox "The number 100 is greater than 90"
    Else
        MsgBox "The number 100 is less than 90"
    End If

محدش سألني لحد دلوقتي إزاي بيتم تنسيق الكود بهذا الشكل؟

التنسيق للكود بيخلي الكود أسهل إنك تقراه وتفهم معناه .. يعني لو كتبت الكود بالشكل اللي جاي كدا هيكون أصعب شوية في التعامل معاه لما تيجي تقراه :

If 100 > 90 Then
MsgBox "The number 100 is greater than 90"
Else
MsgBox "The number 100 is less than 90"
End If

طبعا الفرق واضح .. والفرق يوضح أكتر لما تتعامل مع أسطر كثيرة من الأكواد ..

اتعملت إزاي ؟ عن طريق الضغط على المفتاح tab بعد ما أضع المؤشر في أول السطر

المهم مش هنتكلم عن البداية ولا النهاية لجملة If ، إحنا بس هنركز على جملة Else ، هي دي اللي بتفصل بين السطر المراد تنفيذه إذا تحقق الشرط ، والسطر المراد تنفيذه إذا لم يتحقق الشرط ..

السطر اللي قبل Esle دا ليه الأولوية طبعاً بس في حالة تحقق الشرط ، أما السطر اللي بعديها بيكون في حالة عدم تحقق الشرط ..أظن كدا واضحة (عمال أقول الكلام بأكتر من أسلوب وأكتر من مرة ، لأن في الإعاة إفادة)

نجرب الكود مرة بالشكل اللي فات ، ونغير علامة أكبر من إلى علامة أصغر من ونجرب مرة تانية ونلاحظ الرسالة (أقصد مدى تحقق الشرط)

 

الشكل الرابع والأخير لـ IF دا بقا اللي تقدر من خلاله تضع شروط كتيرة زي ما إنت عايز (خد راحتك ..حط شروطك يا كبير ، والمحرر ينفذ)

 

هنا المثال هو أفضل شرح ، هنكتب دالة Function وهنستخدم فيها IF مع الشكل الرابع ؛ لأننا عندنا شروط كتير ..

الجماعة اللي بيشتغلوا في المدارس (ربنا يبارك فيهم) ، بيعملوا معادلة لتحديد المستوى أو التقدير (وشروطهم بتكون بالشكل ده :

لو الطالب غ يبقا الناتج غ (حد عنده اعتراض) .. لو درجة الطالب ما بين 0 و 49 يبقا تقديره دون المستوى .. ولو الطالب درجته ما بين 50 و 64 يبقا مقبول .. ولو الطالب درجته ما بين 65 و 74 يبقا تقديره جيد .. ولو الطالب درجته ما بين 75 و 84 يبقا تقديره جيد جداً .. ولو الطالب درجته ما بين 85 و 100 يبقا ممتاز (شفتوا الشروط ..حاجة كدا تحس إنها متشابكة) ..

بالمعادلات ممكن نعملها بالشكل ده :

=IF(A1="","",IF(A1="غ","غ",IF(AND(A1>=0,A1<50),"دون المستوى",IF(AND(A1>=50,A1<65),"مقبول",IF(AND(A1>=65,A1<75),"جيد",IF(AND(A1>=75,A1<85),"جيد جداً",IF(AND(A1>=85,A1<=100),"ممتاز","")))))))

هي دي المعادلة اللي هتأدي الغرض وتحقق المطلوب .. بس تعرفوا إن طول المعادلة بالشكل ده 188 حرف (الحرف مقصود بيه الحروف والرموز) .. طبعاً المعادلة ممكن نحولها لدالة تحقق لنا المطلوب ، خلينا نشوف ونجرب :

Function Grade(Mark As Variant) As String
    If IsEmpty(Mark) Then
            Grade = ""
        ElseIf Mark = "غ" Then
            Grade = "غ"
        ElseIf Mark >= 0 And Mark < 50 Then
            Grade = "دون المستوى"
        ElseIf Mark >= 50 And Mark < 65 Then
            Grade = "مقبول"
        ElseIf Mark >= 65 And Mark < 75 Then
            Grade = "جيد"
        ElseIf Mark >= 75 And Mark < 85 Then
            Grade = "جيد جداً"
        ElseIf Mark >= 85 And Mark <= 100 Then
            Grade = "ممتاز"
    End If
End Function

اتعرفنا قبل كدا على كيفية بناء الدالة ، ودا مثال تاني لتأكيد التعامل مع بناء الدوال :

بدأنا بكلمة Function لأننا بنتعامل مع دالة وليس إجراء فرعي ، متبوعة باسم الدالة (والتسمية قلنا إنت حر فيها مثلا هنسميها Grade) ، طيب إحنا لما نتعامل مع الدالة دي ، نشوف الدالة دي هتتعامل مع ايه ؟؟ الدالة هتتعامل مع درجة الطالب ، فنسمي المتغير الخاص بالدالة Mark ،والدرجة دي قد تكون أرقام من 0 إلى 100 وقد تكون حروف (غ) بالتالي نخلي نوعها Variant لأن النوع ده من المتغيرات Variables بيتعامل مع أي حاجة ، فهنا هيتعامل مع أرقام ونصوص ، طيب والناتج المفروض هيكون عبارة عن نص ، فدا نخليه String وممكن نخليه Variant بس إحنا عايزين الناتج نص وبس (دون المستوى - مقبول - جيد - جيد جداً - ممتاز - غ - فراغ "")

أعتقد إن الصورة واضحة ، هنا استخدمنا جملة ElseIf مش Else لأننا بنتعامل مع شروط متعددة ، ممكن نفضل نستخدمها لحد آخر شرط ، وممكن قبل الشرط الأخير نستبدلها بـ Else (إنت وراحتك)

بعد كل كلمة ElseIf وضعنا شرط وفي آخر الشرط مننساش كلمة Then

لما يكون فيه أكتر من شرط في نفس الوقت (بمعنى شرطين واجب تحققهم في نفس ذات الوقت بنستخدم المعامل Operator اللي اسمه And)

بمعنى آخر للي ميعرفش المعامل And (لما نستخدم المعامل ده يبقا الشرطين لازم نتيجتهم تكون True عشان ينفذ السطر اللي وراه)

----------------

ناخد مثال فرعي عشان نفهم And :

X = 10: Y = 20
If X = 10 And Y = 20 Then MsgBox "X = 10" & vbCrLf & "Y =20"

في السطر ده لو اتحقق الشرطين وكانت نتيجتهم صحيحة هيظهر الرسالة اللي مذكورة دي ، أما لو شرط واحد فيهم متحققش ، يبقا مش هيتنفذ الكود ..

معلومة إضافية لعمل سطر جديد في الرسالة نستخدم كلمة vbCrLf أو فيه كلمة أسهل منها بتؤدي نفس الوظيفة اسمها vbNewLine ..

ونلاحظ بردو في الرسالة إننا استخدمنا المعامل &  ودا بيستتخدم لربط أو دمج النصوص .. (أعتذر عن الخروج عن الموضوع الأصلي)

----------------

يرجع مرجعونا للدالة الخاصة بالتقدير :

وضعنا الشروط ، وكلما تحقق شرط معين يتم وضع قيمة نصية لاسم الدالة : فلو تحقق الشرط مثلاً إن الدرجة ما بين 50 و 64 ، بنقول ساعتها إن الدالة اللي سميناها Grade ساعتها تحمل القيمة النصية "مقبول" ، ووضعنا النصوص بين أقواس تنصيص كما تعودنا .. يبقا في الحالة دي لو درجة الطالب 55 يبقا التقدير "مقبول" (اللهم اجعلنا من المقبولين)

..

لتطبيق الدالة : اكتب القيم التالية في النطاق A1:A13

0    49    50    55   65    66   74     75    84     85    90    100   غ

في الخلية B1 اكتب المعادلة :

=Grade(A1)

ونسحب المعادلة لحد بعد آخر النطاق ، يعني خلي المعادلة لحد A15 مثلاً عشان نشوف لما تكون الخلية فارغة ايه اللي هيحصل ..

شوفوا بقا الفرق ما بين المعادلة اللي حطينها في الأول اللي طولها 188 حرف والمعادلة دي ، دي طولها يدوب 9 حروف بس (ادعوا لي !)

** ملحوظة : يا ريت لما نيجي نحط شروط ، نخلي شرط فراغ الخلية يكون في الأول (لأني جربت في دالة أخلي شرط الفراغ في الآخر بيعمل شوية كعبلة ، ودا سببه إننا لو حطينا الشرط مثلا الدرجة ما بين 0 و 49 .. الأول هيتم التعامل مع الخلايا الفارغة إنها صفر وليست خلايا فارغة)

المهم عشان ميحصلش توهااااااان خليكوا تكتبوا شرط الفراغ في أول الشروط (اللي عايز يجرب يحط الشرط ده في الآخر يجرب ويشوف الكعبلة بنفسه)

Function Grade(Mark As Variant) As String
    If Mark = "غ" Then
            Grade = "غ"
        ElseIf Mark >= 0 And Mark < 50 Then
            Grade = "دون المستوى"
        ElseIf Mark >= 50 And Mark < 65 Then
            Grade = "مقبول"
        ElseIf Mark >= 65 And Mark < 75 Then
            Grade = "جيد"
        ElseIf Mark >= 75 And Mark < 85 Then
            Grade = "جيد جداً"
        ElseIf Mark >= 85 And Mark <= 100 Then
            Grade = "ممتاز"
        ElseIf IsEmpty(Mark) Then
            Grade = ""
    End If
End Function

هوفر عليك وقت في التعديل ، جرب الدالة بهذا الشكل بنفسك ، وروح لورقة العمل واعمل دبل كليك في الخلية B1 عشان تشوف القيم الجديدة أو اضغط F9 لتحديث الدالة ..

المشكلة بتحصل لأن منطق الترتيب في الشروط موجود ، بمعنى آخر إنه ماشي شرط شرط ، وأول ما شرط يتحقق ينتهي تنفيذه للدالة ، فلو وضعنا شرط الدرجة ما بين صفر و49 .. أول ما يلاقي خليه فاضية هيعاملها على إنها صفر وليست فارغة لأننا وضعنا شرط الفراغ في نهاية الدالة ، فنلاقي ناتج المعادلة مع الخلايا الفارغة (دون المستوى) .. انتهت الملحوظة (أنا عارف إن فيه ناس هتدعي عليا بسبب الملحوظة اللي متعتبرش ملحوظة دي .. دي درس جوا درس)@

 

آخر نقطة نتكلم فيها جملة IsEmpty (ودي دالة مدمجة في محرر الأكواد لاختبار الفراغ :: هل الخلية دي فارغة أم لا ؟؟) ، وممكن نستغنى عنها ونقول :

If Mark = "" Then
            Grade = ""

نرجع للصح ونخلي شرط الفراغ في أول الدالة ..أظن بإذن الله كدا الأمور بقت واضحة تماماً...

 

ننتقل لمثال آخر وأخير عشان أنا تعبت لكم صراحة :

نفس المثال ولكن بصورة أخرى ..

هنعمل دالة ، هنغير اسمها بس عشان نطبقها في نفس الملف اللي إحنا شغالين عليه .. هنسميها Level

وهنا في المثال القادم بإذن الله هنستخدم حاجة شبيهة بجملة If بس بصراحة ألذ وشكلها أشيك وأسهل في الفهم ..

الجملة اسمها Select Case وبييجي وراها المتغير اللي هنشتغل عليه (اللي هو في الحالة دي Mark درجة الطالب)

وبعدين نبدأ نضع حالات الشرط بكلمة Case متبوعة بالشرط بس بشكل مختلف شوية

وقبل آخر شرط ممكن نستخدم Case Else وممكن نستغنى عنها (مش هتفرق) ، وفي النهاية مننساش القفلة يا عبد المولى (End Select) ..

Function Level(Mark As Variant) As String
    Select Case Mark
        Case ""
            Level = ""
        Case 0 To 49
            Level = "دون المستوى"
        Case 50 To 64
            Level = "مقبول"
        Case 65 To 74
            Level = "جيد"
        Case 75 To 84
            Level = "جيد جداً"
        Case 85 To 100
            Level = "ممتاز"
        Case "غ"
            Level = "غ"
    End Select
End Function

لتطبيق الدالة نروح للخلية C1 في ورقة العمل ونضع المعادلة بهذا الشكل ، ونسحبها لحد A15 مثلا ، عشان نقارن النتائج :

=Level(A1)

مش هشرح تفاصيلها ؛ لأنها واضحة وضوح الشمس في عز الليل ..(شكلي هنجت ...!!) .. (حد يضغط F5 عشان يعملي ريفرش .. الطالب المنتبه هيقولي كدا غلط لو ضغطنا هنا F5 ، وإحنا جوا محرر الأكواد كدا هينفذ أمر مش هيعمل ريفرش)

بكدا نكون انتهينا من شبحين من أهم أشباح عالم الأكواد (شبح If وشبح Select Case) ، وكمان شبح (بناء الدالة UDF)

أستودعكم الله ، أترككم في رعاية الله ..

كان معكم القناص أبو البراء (صائد الأشباح) من قلعة الرعب أوفيسنا

تم تعديل نوفمبر 30, 2014 بواسطه YasserKhalil

[ياسر خليل أبو البراء]

الحلقة العاشرة

************

السلام عليكم ورحمة الله وبركاته

أقدم لكم اليوم حلقة كاملة الدالة MsgBox (وقد قدم لها الأخ الحبيب حسام عيسى موضوعاً كاملاً ، مما أخرني في تقديم الحلقة) .. عموماً هنتكلم عنها مرة تانية ، وفي الإعادة إفادة..

كلمة MsgBox اختصار للكلمة الإنجليزية Message Box أي صندوق الرسالة .. ودي وظيفتها إنك بتعرض رسالة للمستخدم تفيده بأمر معين ..

لما نكتب الدالة MsgBox ، ونضغط مسطرة عشان ناخد مسافة ، بيظهر لنا مستطيل أصفر فيه توضيح لبارامترات الدالة .. كلها اختياري ما عدا البارامتر الأول اللي هو اسمه Prompt ، والبارامتر ده هو عبارة عن النص اللي هيظهر للمستخدم (وطبعاً مينفعش يكون اختياري وإلا مش هيكون فيه رسالة للمستخدم) بس إحنا ممكن نضحك على المحرر  ، ونكتب السطر بالشكل ده :

MsgBox ""

هو كل اللي يهمه أقواس التنصيص .. هودا كل اللي يفهمه ، أما النص اللي بين أقواس التنصيص فدا ميعرفوش وميهموش ، اكتب أي كلام ..

MsgBox "واخد على خاطري منكم"

دي الرسالة اللي عايز أوصلها لكم أحبابي .. ودا سببه عدم المتابعة الجيدة للحلقات .. عموماً دا مش وقت للعتاب..

طيب واحد هيسأل : طيب كدا موضوع الدالة بسيط ومش محتاج حلقة ؟ أقوله البسيط هنعقده ، والمعقد هنبسطه ..

تعالوا معايا نضع قيمة في الخلية D3 (كل اللي بيشرحوا مش عارف ليه مركزين على الخلية A1) أنا بحب التغيير - من باب خالف تعرف - ، وليكن القيمة 1500

عايزين نظهر القيمة الخاصة بالخلية في رسالة :

MsgBox Range("D3").Value

الرسالة هتظهر وفيها القيمة 1500 ، طيب ممكن نضيف عليها نص .. أكيد ممكن ! ليه لا!

    MsgBox "القيمة الموجودة يا أستاذ حسام في الخلية هي " & Range("D3").Value

نلاحظ هنا إننا استخدمنا المعامل Concatenate اللي هو شكله & ، ودا وظيفته إنه بيدمج النصوص .. طبعاً القيمة اللي موجودة في الخلية D3 حتى لو كانت قيمة رقمية ، هنا مع دالة الرسالة مش بتشوفها رقم ، لكن بتشوفها نص (هنبص بعيون الدالة الجميلة)

طيب ممكن نظهر قيمة خلية تانية .. أكيد ممكن ! ليه لا

نضع القيمة 2000 في الخلية E4 ونجرب :

    MsgBox Range("D3").Value & Range("E4").Value

هنلاقي إن قيمة الخلية D3 والخلية E4 لازقين في بعض ، دا لأنك مسبتش مسافة بينهم .. طيب المسافة هنعملها إزاي ؟ هو سؤال بسيط بس اعذروني أكيد فيه ناس بتسأله :: هنترك مسافة وبس .. لا .. هنعمل مسافة بالمسطرة بس بشرط تكون المسافة بين أقواس تنصيص زي كدا :

    MsgBox Range("D3").Value & "   " & Range("E4").Value

هنا نفس الكلام ربطنا بالمعامل & ، وعشان تكون المسافة مناسبة ضربت على المسطرة 3 مرات (معلش أصلي مضايق ومحتاج أضرب حد ، فملقتش غير المسطرة .. بس كفاية عليها 3 ضربات ..)

واحد هيقولي أنا جربت الكود بس أنا مش عاجبني شكلهم جنب بعض ، ممكن نخلي كل قيمة في سطر .. أكيد ممكن ! ليه لا!

    MsgBox Range("D3").Value & vbNewLine & Range("E4").Value

كلمة vbNewLine عشان نقدر ننزل لسطر جديد (وقلت قبل كدا بس محدش بيتابع إن فيه كلمة تانية بتؤدي نفس الغرض اسمها ايه يا شاكر؟ مش بقولكم محدش مذاكر .! اسمها vbCrLf ) يلا زيادة الخير خيرين .. وأضاف الأخ مختار كلمة جديدة أيضاً تؤدي نفس الغرض ألا وهي

Chr(10)

ربنا يسترها علينا وعليكم دنيا وآخرة.

نشوف السطر ده :

    MsgBox ("الحمد لله الذي بنعمته تتم الصالحات")

ايه الجديد يا أستاذ عبد المجيد ؟ الأقواس .. ممكن نستغني عنها ؟ آه ممكن .. ليه لا! .. بس الأقواس دي هنستفيد منها في إنك تخلي جملة MsgBox يمكن وضعها كقيمة في متغير (نصبر شوية هييجي الكلام عليها) .. طيب ايه هي الإضافات اللي نقدر نضيفها (هي زي البهارات حاجة كدا تحلي الأكله .. تخليها أحلى) ...

إحنا قلنا البارامتر الأول خاص بالنص ودا إجباري (بس ممكن نخدع المحرر) ، البارامتر الثاني خاص بالأزرار Buttons .. الأزرار دي زي OK و Cancel و Retry وهكذا..

نجرب السطر التالي :

    MsgBox "هل تحب حلقات افتح الباب؟", vbOKCancel

نلاحظ بعد نص الرسالة Prompt عملنا فاصلة , ودي عشان نقول للمحرر إننا هنضيف أزرار Buttons .. أول ما تعمل الفاصلة هتلاقي زي ما اتعودت قايمة فيها القيم اللي ممكن تستخدمها ..

طيب لو نفذنا السطر اللي فات هنلاقي إن زر OK أو زر Cancel لو ضغطت عليهم مش هيحصل حاجة غير إنه يقفل الرسالة .. (قلنا نصبر هييجي عليها الكلام يا مستر عبد السلام)

نتعرف على الأزرار الموجودة والمتاحة عندنا :

vbAbortRetryIgnore
vbOKCancel
vbOKOnly
vbRetryCancel
vbYesNo
vbYesNoCancel

ممكن نجرب القيم دي ... القصة كلها في البادئة vb ثم الأزرار اللي هنستخدمها..

ننتقل لجزئية أخرى : مع نفس البارامتر الخاص بالأزرار ممكن نضيف رموز (علامة تعجب - علامة استفهام - ..) والرموز عشان نضيفها نضع علامة + بعد الأزرار التي سيتم استخدامها .. بالمثال يتضح المقال :

    MsgBox "هل تحب حلقات افتح الباب؟", vbYesNo + vbQuestion

ممكن نتعرف على الرموز :

vbQuestion
vbInformation
vbCritical
vbExclamation

طيب ممكن نستغنى عن الأزرار ونستعمل الرموز فقط ؟ أو ممكن نستغنى عن الرموز ونستعمل الأزرار فقط؟ أكيد ممكن ! ليه لا! (النهاردة واخدين حريتكم ..مفيش تقيد)

هسيبكم شوية تجربوا الرموز دي ، وتشوفوا كل رمز شكله ايه؟ - فاصل ونواصل -

واحد بعد ما شاف الرسالة ، لاحظ إن فيها عنوان Microsoft Excel فسألني ممكن أغير العنوان ده ؟ رديت عليه وقلت له (طبعاً عارفين الإجابة)

عنوان الرسالة هو دا البارامتر التالت .. ود اسمه Title (ونلاحظ إن البارامتر لما يكون اختياري بيوضع بين أقواس بهذا الشكل [   ] )

نجرب السطر التالي :

    MsgBox "هل تحب حلقات افتح الباب؟", , "منتدى الأحبة"

ايه دا بقا إنت عامل فاصلتين ليه؟ يا سيدي ما أنا قلت لك إن البارامتر التاني الخاص بالأزرار والرموز دي اختياري ، بمعنى يمكن الاستغناء عنه ، بس عشان نعديه لازم فاصلة ، وبعد الفاصلة فاصلة تانية ، يقوم المحرر يفهم إنك استغنيت عن البارامتر التاني ، ويشتغل على البارامتر التالت .. اللي هو عنوان الرسالة.. نجرب ونشوف !

ننتقل لأهم نقطة في حلقة اليوم ألا وهي تعيين الرسالة كمتغير ، عشان ببساطة ننفذ كود معين لو المستخدم اختار زر وننفذ كود تاني لو اختار زر تاني (أكيد الكلام يتوه ..خلينا في التطبيق)

    Answer = MsgBox("هل تحب حلقات افتح الباب؟", vbYesNo + vbQuestion, "منتدى الأحبة")

نخلي بالنا إننا هنا هنستخدم متغير باسم Answer (ممكن تسميه بالاسم اللي يعجبك) ، والمتغير ده هيكون له قيمة (الرسالة مجرد ستارة .. والقيمة مخفية .. والقيمة دي هنعرفها حالاً)

لو حبينا ننفذ كود معين في حالة اختيار معين ، هنستخدم الجملة If الشرطية ، يعني ببساطة لو المتغير Answer قيمتة كذا اعمل كذا ، ولو قيمته كذا اعمل كذا ..

Sub Query()
    Answer = MsgBox("هل تحب حلقات افتح الباب؟", vbYesNo + vbQuestion, "منتدى الأحبة")
    If Answer = vbYes Then
        MsgBox "كدا حبيبي وصاحبي وكفاءة"
    ElseIf Answer = vbNo Then
        MsgBox "زعلت منك ..روح ربنا يسامحك"
    End If
End Sub

أظن المثال واضح ، في حالة إذا كانت قيمة Answer تساوي vbYes ، هينفذ السطر التالي ويظهر رسالة بمحتوى معين ، ولو كانت القيمة vbNo هيظهر رسالة تانية ..

واحد هيقولي هو كله رسايل رسايل مفيش شات .. طبعا الأسطر اللي هيتم تنفيذها مش شرط تكون رسالة ، دا مجرد مثال عشان تفهم كيفية استخدام المتغير .. لكن ممكن تنفذ مجموعة أسطر من الأكواد في حالة vbYes ، ومجموعة أسطر أخرى من الأكواد في حالة vbNo ...

ركز وخلي بالك من الكود التالي :

Sub Query()
    Answer = MsgBox("هل تحب حلقات افتح الباب؟", vbYesNo + vbQuestion, "منتدى الأحبة")
    If Answer = 6 Then
        MsgBox "كدا حبيبي وصاحبي وكفاءة"
    ElseIf Answer = 7 Then
        MsgBox "زعلت منك ..روح ربنا يسامحك"
    End If
End Sub

كلنا اللي عملناه شيلنا vbYes وحطينا رقم 6 ، وشيلنا vbNo وحطينا رقم 7 (ايه دا بقا ..طيب هنعرف منين اللي إنت بتقوله ده ..فيه جدول بقيمة كل زر من الأزرار .. يرجى عدم الحفظ)

 

 

فيه حاجة مهمة نسيت أقول عليها : لو لاحظتو إن الرسائل كلها وعنوان الرسائل بتظهر ناحية اليسار ، عشان نخليها يمين (ربنا يجعلنا من أهل اليمين) نجرب الكود التالي :

    MsgBox "هل تحب حلقات افتح الباب؟", vbMsgBoxRight, "منتدى الأحبة"

آخر جزئية هنتكلم فيها .. مش هنتكلم فيها (فيه ملف مرفق فيه توضيح لآخر جزئية .. أنا بس هشرح نقطة واحدة في الملف المرفق ، وإنتو إن شاء الله المولى هتفهموا الباقي)

الأزرار والرموز اللي عدت علينا في الحلقة ، ممكن نستغنى عنها بقيم ..إزاي ؟

    MsgBox "هل تحب حلقات افتح الباب؟", vbYesNoCancel

ممكن السطر ده يكون بالشكل ده :

    MsgBox "هل تحب حلقات افتح الباب؟", 3

يعني القيمة 3 = vbYesNoCancel ..

مثال تطبيقي :

------------

Sub Query()
    Dim Answer As String
    Answer = MsgBox("هل تريد الدخول لتطبيق الإكسيل لتطبيق الأكواد في حلقات افتح الباب؟", vbYesNoCancel)
    If Answer = vbYes Then
        MsgBox "تفضل بالدخول .. بيتك ومطرحك ، وإن شاء الله تستفيد"
        ThisWorkbook.Activate
    ElseIf Answer = vbNo Then
        MsgBox "أكيد مشغول عشان ناوي تقفل .. عموماً تصحبك السلامة وفي رعاية الله"
        ActiveWorkbook.Save
        Application.Quit
    End If
End Sub

وأخيراً أتمنى أن أكون قد وفقت في توصيل المعلومة لكم بشكل مبسط ..

 

 

دمتم في رعاية الله ..

MsgBox Values.rar

تم تعديل ديسمبر 4, 2014 بواسطه YasserKhalil

[ياسر خليل أبو البراء]

الحلقة الحادية عشرة

*****************

السلام عليكم ورحمة الله وبركاته

إخواني الكرام في الصرح العملاق أوفيسنا ، أقدم لكم اليوم موضوع في غاية الأهمية ، ألا وهو التعامل مع السلاسل النصية Strings والدوال الخاصة بالتعامل مع النصوص.

اتعرفنا في حلقات سابقة على المتغير String ، ودا بنستخدمه لتخزين النصوص .. أول شيء بنعلن عن اسم المتغير ونحدد نوعه كـ String بالشكل ده :

Dim strEmail As String

وقلنا إن الأفضل دايماً لما نسمي متغير يكون معبر ، ففي السطر اللي فات أنا نويت والنية لله إني أخزن نص ، والنص ده عبارة عن إيميل ، فسميت المتغير strEmail أول 3 حروف من كلمة String وبعدين كلمة معبرة عن النص Email ، وحددت نوعه إنه نص String.

طيب تاني سطر ببدأ أضع قيمة للمتغير اللي أعلنت عنه ، ودا بيكون بطريقة معينة ، إننا نحط اسم المتغير على اليسار ، وبأكد على اليسار وبعديه علامة يساوي ، وبعد علامة يساوي أفتح أقواس تنصيص وأكتب النص اللي عايز أخزنه وأقفل أقواس التنصيص (كل اللي بقوله يا حماده كلام قديم مفيش جديد ..دا في الإنجليزي بيسموه Warm-Up يعني تهيئة للحلقة)

strEmail = "yakh777@yahoo.com"

طيب هل دايماً لازم نحط نص في قيمة المتغير النصي ولا فيه طريقة تانية ؟ فيه طريقة تانية ..إن يكون النص في خلية معينة وليكن A1 ، ولما نيجي نضع قيمة للمتغير نشير لقيمة الخلية A1 زي كدا :

strEmail = Range("A1").Value

حط الايميل في الخلية A1 ، وجرب بنفسك .. جرب مرة تكتب النص ، وعن طريق الدالة Msgbox شوف النتيجة ، ومرة تانية جرب السطر الأخير وشوف النتيجة (النتيجة واحدة .. كل السبل تؤدي إلى حلقات افتح الباب) ...

خلصنا المراجعة يا مدحت .. نشوف ايه اللي هنقدمه في حلقة النهاردة ..

أنا صراحة مش مرتب في أفكاري .. ممكن تقول إني عشوائي جداً ، بس الحمد لله ، بتوفيق الله عزوجل بيخرج الموضوع منظم ومتسألش إزاي ..!

أنا همسك دالة دالة من دوال التعامل مع النصوص وهشرحها بالتفصيل ، والله المستعان

*-------------------------------------------------*

الدالة Len (دالة بسيطة وسهلة وكلنا عارفينها ، وبنستخدمها في ورقة العمل : طبعاً إنتو لما بتقروا الحلقات بيكون فيه ملف إكسيل مفتوح (مش كدا ولا مطنشين) ، عشان نطبق أول بأول ..
 في الخلية A1 إحنا كتبنا نص ، عايزين نعرف طول النص ده ، فبنستخدم الدالة Len ، مثلاً في الخلية B1 اكتب المعادلة بهذا الشكل :

=LEN(A1)

واحد هيقولي إنت مش بتشرح VBA إنت بتخدعنا ، الشغل دا إحنا عارفينه !!    أنا عارف إنكم عارفينه ، بس عايزين نربط بين الشغل في ورقة العمل والشغل في محرر الأكواد ، عشان تكون الصورة واضحة ..

نروح للمحرر .. ونكمل الكود اللي كتبنا منه أول سطرين ..

    Dim strEmail As String
    Dim X As Integer
    
    strEmail = Range("A1").Value
    X = Len(strEmail)
    MsgBox strEmail & " : " & X

أظن الكود واضح جداً ، إحنا الحمد لله وصلنا لمرحلة متقدمة نقدر من خلالها نفهم أسطر الكود .. هشرح الجديد بس عشان الناس متحسش بالملل : الجديد يا أستاذ عبد المجيد ، الدالة Len ، ودي وظيفتها إننا بنقدر من خلالها معرفة عدد أحرف النص ، والأحرف مش مقصود بيها الحروف العربية والإنجليزية فقط ، ولكن الرموز أيضاً بيتم حسابها زي علامة @ والنقطة .. لما ننفذ الكود هتطلع رسالة فيها النص الموجود في الخلية A1 وبعدين عدد أحرف النص .. وفصلت بينهم بـ : (Shift + ك)

الدالة أسندناها للمتغير X وخلينا نوعه Integer لأن عدد أحرف النص عدد صحيح (ولا يمكن يكون فيه حرف بنشوفه ربع حرف زي . طبعاً لا ... ، الحرف يمثل عدد واحد صحيح)

بعد كتابة الدالة وضعنا فتحنا قوس ووضعنا المتغير النصي اللي سميناه strEmail وقفلنا القوس (  ) ، ننفذ الكود هنلاقي النتيجة إن عدد الأحرف 17 (اتأكد بنفسك لو وقتك يسمح)

*-------------------------------------------------*

ننتقل لدالة تانية : الدالة InStr (شكلها صعبة .. لو عرفت اختصارها هتكون سهلة بإذن الله ..الحرفين In يعني (في) أو (داخل) .. والحروف Str اختصار String .. بمعنى تاني : الدالة دالة بحث عن نص داخل نص (فزورة .. وكلام معقد مش عايزين) .. بالمثال نفهم الكلام المعقد ..(نص فرعي أي جزء من النص داخل سلسلة نصية طويلة) ..بردو الكلام صعب

نفترض إننا في الإيميل اللي كتبناه عايزين نعرف علامة @ موقعها فين في النص ، في الحالة دي هنستخدم الدالة InStr عشان نقدر نحدد موقعها (مش هنحتاج لـ GPRS خاصية البحث عن طريق الأقمار الصناعية) .. ناخد مثال عشان منتوهش !!

    Dim strEmail As String
    Dim X As Integer
    
    strEmail = "yakh777@yahoo.com"
    X = InStr(strEmail, "@")
    MsgBox X

نفس المثال اللي فات تقريباً .. نركز على الجديد ، ونقول دا شكل الدالة ، تقريباً زي الدالة اللي فاتت بس نركز إن فيه بارامتر تاني ، البارامتر التاني هو عبارة عن النص المراد البحث عنه (يعني ممكن نقول إن النص عبارة عن كومة قش ، والنص الفرعي المراد البحث عنه عبارة عن إبرة ، فنشرح الدالة ببساطة إن الدالة بتقوم بعملية البحث عن إبرة في كومة قش .. !!)

الناتج يا جماعة يا متابعين الحلقات بيكون عبارة عن عدد صحيح Integer ، لو جربنا الكود هنلاقي الناتج 8 ، أي أن موقع الإبرة في كومة القش رقم 8 (عد من الشمال يا حاج كمال)

ممكن نكتب النص الأصلي مباشرةً بدل من إسناده لمتغير زي كدا :

    Dim X As Integer
    X = InStr("yakh777@yahoo.com", "@")
    MsgBox X

بس أنا أفضل دايماً الإعلان عن المتغير ، وإسناد قيمة له ، لسبب إننا لما بنكتب كود ، مش هنشتغل على النص مرة واحدة .. الشغل هيكون أكتر من مرة .. فبالتالي أفضل المثال السابق.

وجه الاستفادة من الدالة دي إنك تتأكد من وجود نص معين في النص الأصلي من عدم وجوده ، يعني لو مش موجود هتكون النتيجة ايه ؟ فكروا شوية قبل ما أقول الإجاية : أكيد صفر ، لأن النص الفرعي (الإبرة) مش موجودة ، بالتالي تكون النتيجة صفر..نجرب المثال التالي :

    Dim strEmail As String
    Dim X As Integer
    
    strEmail = "yakh777@yahoo.com"
    X = InStr(strEmail, "@")
    
    If X = 0 Then
        MsgBox "الإيميل غير صحيح  ؛ لأنه لا يحتوي على العلامة اللي متعودين عليها"
    Else
        MsgBox "الإيميل صحيح يا فصيح ؛ لأنه يحتوي على العلامة اللي زهقنا من شكلها"
    End If

نجرب ننفذ الكود مرة ، ونشوف النتيجة ، هنلاقي إن الرسالة التانية هي اللي هتظهر ، لأن قيمة X = 8 ، يعني أكبر من الصفر (ودا دليل على وجود الإبرة في كومة القش)

أما لو شيلنا علامة @ وجربنا الكود مرة تانية ، فهتظهر لنا الرسالة الأولى ، لأن قيمة X=0 ، (ودا دليل على عدم وجود النص الفرعي في السلسلة النصية)

بكدا يكون انتهى الكلام عن الدالة InStr ... لا لسه متستعجلش .. الدالة فيها بارامترات اختيارية واحد بيكون في الأول وواحد في الآخر ، الشكل العام لها كدا :

InStr(start, Text_To_Search, Find, comapre

إحنا أخدنا البارامتر التاني اللي هو كومة القش (النص المراد البحث فيه) ، والبارامتر التالت اللي هو الإبرة (النص المراد البحث عنه) ..

بالنسبة للبارامتر الأول دا نقطة البداية ، ولما مش بنكتبها بيكون الافتراضي فيها 1 أي بداية عملية البحث والتنقيب عن الإبرة في كومة القش تبدأ من أول حرف بالنص..

البارامتر الأخير بردو اختياري ودا نادر الاستخدام .. ودا له 4 قيم :

(vbUseCompareOption) , (vbBinaryCompare) , (vbTextCompare) , (vbDatabaseCompare)

ناخد مثال بسيط عشان نفهم جزء واحد من الخيارات للبارامتر الرابع :

    Dim X As Integer
    X = InStr("This is my heart", "t")
    MsgBox X

ننفذ الكود نلاقي إن الناتج 16 ، ودا موقع حرف t في النص ، نخلي بالنا إن فيه حرف الـ T في أول النص الأصلي ، طيب نفترض إننا عايزين نعرف موقع أول حرف T سواء كان Capital أي حرف كبير أو Small أي حرف صغير .. في الحالة دي هنستخدم البارامتر الرابع ، وهنستخدم الخيار vbTextCompare (وفي حالة استخدامه بيتم تجاهل حالة الأحرف)

    Dim X As Integer
    X = InStr("This is my heart", "t", vbTextCompare)
    MsgBox X

ننفذ الكود نتصدم برسالة خطأ .. الغلطة فين ؟ هي مش غلطة ، إنما قاعدة ، إنك لو هتستخدم البارامتر الرابع اللي هو أصلاً اختياري يبقا إجباري عليك تستخدم البارامتر الأول اللي هو اختياري -- أما لو استخدمت البارامتر الأول اللي هو اختياري ، فممكن عادي تستغنى عن البارامتر الرابع اللي هو اختياري (هدوخكم ورايا .. اقرا من الأول عشان تفهمها ) ..
يعني الشكل الصحيح يكون كدا :

    Dim X As Integer
    X = InStr(1, "This is my heart", "t", vbTextCompare)
    MsgBox X

الناتج هنا هيكون مختلف ، هيكون رقم 1 ، ودا موقع حرف الـ T في أول النص (هنا تم التغاضي عن حالة الأحرف .. يعني كأننا بنقوله ملكش دعوة الحرف كبير أو صغير .. ابحث عنه)

كفاية كدا على الدالة دي (خدت أكتر من وقتها) ..

*-------------------------------------------------*

ننتقل لدالة ثالثة اسمها StrReverse ودي من اسمها نعرف وظيفتها .. Reverse معناها عكس (مضاد : لا مش مضاد .. بقول عكس) يعني بص لها من الآخر ..

يعني مثلا كلمة (أوفيسنا) لما بنصلها من الآخر تبقا (انسيفوأ) كدا أكيد وصلتكم

ناخد مثال عملي :

        Dim strOfficena As String
    Dim strResult As String
    
    strOfficena = "أوفيسنا"
    strResult = StrReverse(strOfficena)
    
    MsgBox strResult

نجرب الكود ونشوف النتيجة .. كفاية عليها كدا ، مش مستاهلة نتكلم عنها كتير ..

*-------------------------------------------------*

هختم الحلقة بالدالة الرابعة (نظراً لأن رقم 4 بيغيظ ناس .. وأنا بصراحة من النوع الغياظ المستفز) ..

الدالة التوأم (دالتين هشرحهم مع بعض ) .. بس قبل ما نشرحهم نروح لورقة العمل ونكتب مثلاً yasser في الخلية B3 ، وفي الخلية المجاورة اكتب المعادلة :

=UPPER(B3)

والخلية B4 اكتب كلمة YASSER كلها حروف كبيرة ، وفي الخلية المجاورة اكتب المعادلة :

=LOWER(B4)

أظن الأمور واضحة بالنسبة لكم ، نرجع للمحرر ونشوف شكل الدالتين دول في المحرر :

الدالة LCase أول حرف منها L اختصار Lower يعني زيها زي الدالة Lower في ورقة العمل ، والتانية UCase وحرف U اختصار لكامة Upper يعني زيها زي الدالة Upper

بس خلاص .. مش محتاجة شرح .. ممكن ندعم الكلام بمثال فقط :

    Dim strName As String
    strEmail = "yasserkhalil"
    MsgBox UCase(strEmail)

نجرب نفس المثال ، بس نخلي النص كله حروف كبيرة ، ونستخدم الدالة التانية LCase زي كدا :

    Dim strName As String
    strEmail = "YASSERKHALIL"
    MsgBox LCase(strEmail)

نأتي إلى الواجب اللي الناس بطلت تعمله :

اكتب كود ، وأعلن عن متغير نصي ، على أن يكون النص المراد تخزينه فيه العلامة @ ، وفي رسالة أظهر النص المخزن في سطر ، وعدد الأحرف للنص في سطر ، موقع العلامة @ في سطر ، وقم بعكس النص في سطر ، وقم بتحويل حروف النص إلى أحرف كبيرة في سطر ، وتحويل حروف النص إلى أحرف صغيرة في نص .. وكفاية كدا عشان متتعبوش ، أنا يهمني راحتكم.

كان معكم أخوكم أبو البراء من منتدى أوفيسنا

إلى لقاء متجدد بإذن الله .. دمتم في رعاية الله (خدوا بقا شوية ورد لأحسن أخونا ابن مصر شكله ناوي يخلص على الورد اللي في المنتدى :fff: :fff:  .. كفاية 4 وردات)

والسلام عليكم ورحمة الله وبركاته

[ياسر خليل أبو البراء]

الحلقة الثانية عشر

***************

السلام عليكم ورحمة الله وبركاته ...

إخواني الكرام ..ها أنا قد عدت إليكم بعد طول عياب (والعود أحمد .. مش ياسر ولا حسام)

نبدأ حلقة جديدة معكم من حلقات افتح الباب ، وهات لي معاك كيلو كباب (عشان لسه العشا مجهزش)

نكمل في هذه الحلقة بإذن الله مشوار الدوال الخاصة بالتعامل مع النصوص - * -

 

كنا اتكلمنا عن الدالة LCase الخاصة بتحويل أحرف اللغة الإنجليزية إلى حروف صغيرة ، والدالة UCase الخاصة بتحويل أحرف اللغة الإنجليزية إلى حروف كبيرة ..

 

كلنا يعرف إن كتابة الأحرف باللغة الإنجليزية ليها تعامل خاص ..بمعنى آخر لو بنكتب اسم شخص ، مش مقبول إن يكون كل الحروف كبيرة ولا كل الحروف صغيرة ، إنما بيكون الحرف الأول في كل اسم حرف كبير والحروف المتبقية حروف صغيرة زي كدا Yasser Khalil

طيب هل فيه دالة تكفي لهذا الغرض ؟ نعم .. روح لورقة العمل الأول واكتب اسمي (اسمي الأول جرب عليه وبعدين جرب على اسمك .. شايف حسام مش معبرني وبيكتب اسمه هو الأول !!) اكتب في الخلية A1 مثلاً yasser khalil كل الحروف Small أي حروف صغيرة ، وفي الخلية المجاورة B1 اكتب المعادلة التالية :

=PROPER(A1)

الناتج إن الحرف الأول في اسم Yasser والحرف الأول في اسم Khalil أصبحا كلاهما Capital - والحمد لله -

نرجع لمحرر الأكواد .. ما هي الدالة البديلة لهذه الدالة في ورقة العمل ؟ هصدمك وأقولك مفيش .. وبعدين أفوقك من الصدمة وأقولك متقلقش فيه طريقة    ..وطريقة ممتازة لاستخدام معظم الدوال وليس كلها في محرر الأكواد ..

Sub ProperFunction()
    Dim strName As String
    strName = Range("A1").Value
    
    Range("B1").Value = Application.WorksheetFunction.Proper(strName)
End Sub

قمنا بالإعلان عن متغير نصي ، وقيمته هي قيمة الخلية A1 ، وفي السطر التالت .. عايزين قيمة الخلية B1 تساوي قيمة النص الموجود في A1 بس بشكل مختلف ، باستخدام الدالة Proper ، فنضع علامة يساوي (ومننساش اللي على الطرف الأيسر مجهول دائماً .. واللي على يمين علامة يساوي هو القيمة المراد وضعها للمجهول)

استخدمنا هنا كلمة Application للإشارة إلى تطبيق الإكسيل .. ممكن الناس اللي مش أد كدا في الإنجليزي أقولها على خدعة بسيطة .. الخدعة إنك متحفظش الكلمة لو صعبة عليك ، اكتب بس أول كام حرف منها وليكن Appl واضغط Ctrl + مسطرة هتلاقي المحرر المحترم كمل لك الكلمة ، أو هتظهر لك قايمة تختار منها الكلمة اللي إنت عايزها ..

بعد كلمة Application تم استخدام الخاصية WorksheetFunction وهذه الخاصية كأننا بنقول للمحرر إننا هنستعين بدوال الإكسيل المدمجة ، نستعين بها هنا في محرر الأكواد ، وبعديها نقطة وبعد النقطة وقفة (يعني قوم اقف واقعد تاني ..عشان تستعيد نشاطك) ، بعد النقطة هنكتب الدالة المراد الاستعانة بها ، وهي هنا الدالة Proper اللي فهمناها من شوية..

والدالة ليها بارامتر واحد بيتم استخدامه عن طريق فتح قوس (Shift + 9) ، وبين الأقواس بنكتب النص ، ومننساش إن الدالة بتتعامل مع النصوص !! ومننساش بردو قفلة القوس ()

ونكتفي بهذ القدر (فيه ناس رفعت ايديها وهللت خلصت الحلقة خلصت الحلقة ..متفرحوش أوي كدا ، إحنا لسه يدوب في بداية الحلقة .. انتهينا بس من الدالة Proper وكيفية استخدامها في محرر الأكواد) ..

******************************************************************************

ننتقل لدالة أخرى لذيذة جداً ومفيدة جداً ، ألا وهو الدالة Trim ودي دالة بسيطة جداً ، وظيفتها إزالة الفراغات الزائدة (بس خلاص .. انتهى الشرح)

نروح لورقة العمل أولاً ونطبق الدالة ، اكتب في الخلية A3 مثلاً اسمي ، اضرب بالمسطرة 3 مرات لا خليهم 4 مرات ، واكتب Yasser وبعدين بالمسطرة اضرب 4 مرات وبعدين اكتب Khalil واضرب المسطرة 4 مرات (كفاية ضرب المسطرة اشتكت) .. في الخلية المجاورة B3 اكتب المعادلة بالشكل التالي :

=TRIM(A3)

هنلاقي الدالة قامت بالواجب وحذفت كل المسافات الزائدة ..وتركت مسافة واحدة بين الكلمتين فقط..

ننتقل لمحرر الأكواد .. نفس الاستخدام تقريباً ونفس الشكل :

Sub TrimFunction()
    Dim strName As String
    strName = Range("A3").Value

    Range("B3").Value = Trim(strName)
End Sub

ننفذ الكود ، نلاقي الناتج في الخلية B3 يصدم (لم تؤدي الدالة عملها كما أدته في ورقة العمل) ، الدالة حذفت المسافات الزائدة في بداية النص وفي نهايته ، أما المسافات الزائدة بين الكلمتين فلم يتم حذفهم (مش عارف دا عيب في محرر الأكواد ، ولا بيل جيتس متعمدها ..عموماً هبقا أسأله في النقطة دي لما يطلبني في الاجتماع القادم يوم 30 فبراير القادم )

نفهم من كدا إن الدالة Trim في محرر الأكواد مختلفة عن الدالة Trim في ورقة العمل ..طيب ما الحل ؟ أشيروا علي إخواني الكرام ، الحل أبسط مما تتخيلوا (اللي فهم الدالة السابقة هيفهم إزاي هنحلها هنا ..)

Sub TrimFunction()
    Dim strName As String
    strName = Range("A3").Value

    Range("B3").Value = Application.WorksheetFunction.Trim(strName)
End Sub

تم حل المشكلة بحمد الله وعونه وتوفيقه ..

******************************************************************************

ننتقل لدالة جديدة ، ألا وهي الدالة Space (المسطرة) ..وظيفة الدالة دي ، إننا نريح المسطرة من كتر الضرب عليها ، حيث أن شكوتها قد وصلت للأمم المتحدة ، فقررت الأمم المتحدة النظر في شكوى المسطرة الضعيفة التي اشتكت من كثرة الضاربين عليها ، وتوصلت الأمم المتحدة لاتفاق مع بيل جيتس بإدراج دالة تحل محل المسطرة في محرر الأكواد (وأغلقت القضية) ..

في الخلية A1 اكتب Yasser Khalil وروح للمحرر واكتب الكود التالي :

Sub SpaceFunction()
    Dim strName As String
    strName = Range("A1").Value

    Range("B1").Value = Space(4) & strName & Space(4)
    Range("C1").Value = Len(Range("A1")) & ":" & Len(Range("B1"))
End Sub

لاحظ إننا استخدمنا الدالة وبين قوسين كتبنا 4 ، والرقم دا عدد المسافات ، واستخدمنا الدالة مرتين ، مرة قبل النص ومرة بعد النص ، وفي كل مرة 4 مرات بالمسطرة ، يعني مجموع المسافات = 8 ، يعني إحنا ريحنا المسطرة من إننا نضربها 8 مرات ، وفي الخلية C1 استخدمنا الدالة Len (واللي ميعرفهاش يترك الحلقة دي ويرجع للحلقة اللي فاتت ..مش ناقصة وجع قلب ، وكتر كلام ع الفاضي) ، عشان نحسب طول النص في الخلية A1 وطول النص في الخلية B1 ، هنلاقي الفرق بينهم 8 (انتهى الحديث عن قضية المسطرة التي تشتكي).

***************************************************************************

ننتقل إلى دالة ذات أهمية كبيرة ..الدالة Replace والكل يعرفها جيداً ، وربما الكل يستخدمها كثيراً ، وهي دالة الاستبدال (أي استبدال نص مش عاجبك بنص يعجبك ويدخل دماغك)

تقوم الدالة باستبدال النص القديم بآخر جديد ... ناخد مثال يا أستاذ جمال :

نفترض إني ادلعت شوية وأنا بكتب اسمي وكتبته في الخلية A1 بهذا الشكل Y a s s e r (من حق التلميذ يدلع ..مش الكبير لأ !!) .. المهم أنا من النوع الكسول ، أنا تركت مسافة بين كل حرف وحرف ، يا ترى هتعب نفسي وأشيل كل مسافة بين كل حرف وحرف (طبعاً مش هيحصل !! ولو حصل يبقا أنا مفيش ورايا شغل وقاعد بلعب)

المهم دلوقتي نخلي بالنا ونسأل ايه هو اللي مش عاجبنا (الإجابة المسافة بين كل حرف وحرف) ، طيب ونسأل سؤال تاني (ما هو لازم تمشي بمنطق السؤال والإجابة) نسأل ايه المطلوب ؟ (الإجابة إننا نحذف المسافة أو ممكن نقول الطلب بشكل تاني عشان نقدر نوصل للحل :: المطلوب إننا نستبدل المسافة " " بـ "" (ايه ده ؟ هي دي الإجابة ؟؟ أقولك أيون أيون هي دي الإجابة) .. نشوف المثال يا أستاذ عبد العال ..

الأول قبل المثال نشوف البديل ليها في ورقة العمل ، ضع المعادلة التالية في الخلية B1 :

=SUBSTITUTE(A1," ","")

الدالة تقوم باستبدال النص القديم بالنص الجديد (زي الفل ..نفس الكلام مع الدالة Replace في محرر الأكواد)

Sub ReplaceFunction()
    Dim strName As String
    strName = Range("A1").Value

    Range("B1").Value = Replace(strName, " ", "")
End Sub

البارامتر الأول للدالة عبارة عن النص المراد البحث فيه المراد البحث داخله .. والبارامتر الثاني النص المراد استبداله أي النص القديم .. والبارامتر الثالث النص الجديد (اللي عاجبنا وبيحب أكل الجبنه)  .. كدا انتهى الحديث عن الدالة Replace ..!

***************************************************************************

الآن مع دالتين جديدتان (أعتذر قديمتان) الدالة Right والدالة Left .. كلنا نعرف استخدام هاتين الدالتين في ورقة العمل ..

ناخد مثال في ورقة العمل أولاً لنفهم عمل الدالتين .. في الخلية A1 نكتب الإيميل yakh777@yahoo.com

وفي الخلية B1 نكتب المعادلة بالشكل التالي :

=RIGHT(A1,9)

الناتج هو yahoo.com وهو العدد الذي حددناه في المعادلة .. وتم استخراج النص من ناحية اليمين (اللهم اجعلنا من أهل اليمين .. أنا والأعضاء في المنتدى أجمعين)

في الخلية C1 اكتب المعادلة التالية :

=LEFT(A1,7)

فيكون الناتج النص من ناحية اليسار ، وهو yakh777 ,وحددنا عدد الأحرف 7 أحرف ..

لو قمنا بتغيير الإيميل بأي إيميل آخر .. أكيد النتائج ستختلف .. إذاً لابد من حل لتكون المعادلة أكثر مرونة (الحل هو الاعتماد - يا أستاذ عماد - هنا على علامة @ ) ..

دعونا نفكر بصوت عالي ..نفكر الأول ونشوف هنعمل ايه ؟؟؟ نبدأ بالدالة Right ..

الأول في خلية نكتب المعادلة:

=LEN(A1)

هنلاقي عدد حروف النص 17 ... تمام !! قول تمام يا أستاذ هشام - ونكتب المعادلة التالية في خلية أخرى (أي خلية)

=FIND("@",A1)

ودي بنحدد من خلالها موقع علامة @ داخل النص .. هنلاقي الناتج 8 (أي أن موقع هذه العلامة رقم 8 . لو عدينا من الشمال هنلاقي رقمها 8)

طيب نجرب نطرح طول النص بالكامل - موقع علامة @ هنلاقي الناتج 9 (تسعى في الخير يا كبير) هو دا المطلوب ...

واحد رفع ايده وقالي : مش فاااااهم (هقوله مش هكرر تاني .. إنت خدها قاعدة لو مش هتقدر تفهمها .. لو حبيت تستخرج النص من جهة اليمين ، يبقى تحفظ الشكل ده : طول النص بالكامل - موقع العلامة @)

يبقا ممكن نكتب المعادلة التالية في الخلية B1 :

=RIGHT(A1,LEN(A1)-FIND("@",A1))

جرب تكتب أحرف زيادة على يمين العلامة أو على يسارها ، وشوف النتائج بنفسك !! (هنلاقي النتائج دايماً صحيحة سواء كتبت أحرف زيادة في اليمين أو في اليسار) ..

طيب الدالة Left دي أسهل .. لأننا هنعتمد على موقع علامة @ وبس .. لو موقع علامة @ رقم 8 زي مثالنا ، يبقى المعادلة هتكون بهذا الشكل :

=LEFT(A1,FIND("@",A1))

هنلاحظ الناتج فيه علامة @ للتخلص منها (هات أستيكة وامسحها)    أو قم بطرح موقع العلامة @ - 1 ليصبح الناتج صحيح ..

=LEFT(A1,FIND("@",A1)-1)

نسينا شغل الأكواد ، واندمجنا في دوال الإكسيل . أعتذر ، لكن لابد من فهم المعادلة بشكل جيد ، حتى نتمكن من فهم العمل بالأكواد ... نروح للمحرر :::

Sub RightLeftFunction()
    Dim strEmail As String
    strEmail = Range("A1").Value
    
    Range("B1").Value = Right(strEmail, Len(strEmail) - InStr(strEmail, "@"))
    Range("C1").Value = Left(strEmail, InStr(strEmail, "@") - 1)
End Sub

أعتقد الموضوع أصبح واضح وضوح الشمس في نهار ملبد بالغيوم ..

نفس الدالة اللي استخدمتها في ورقة العمل أخدتها نسخ ولصقتها في محرر الأكواد .. وبدلت شوية حاجات بسيطة : شلت المرجع A1 ووضعت مكانه المتغير strEmail ، وشلت Find ووضعت مكانها الدالة InStr (بس اللي مركز هياخد باله إن الدالة InStr بتبحث عن كومة القش وتشوف الإبرة -- لكن الدالة Find بتبحث عن الإبرة في كومة القش .. بمعنى آخر النص الفرعي المراد البحث عنه يختلف مكانه بالنسبة للدالة Find في ورقة العمل ، والدالة InStr في محرر الأكواد # انتهى الحديث عن الدالتين Right و Left )

*************************************************************************

ننتقل لآخر دالة (عشان أنا تعبت لكم صراحة ..) الدالة Mid ، وبردو فيه ناس تعرف الدالة كويس جداً من خلال ورقة العمل ...

في الخلية A1 اكتب الإيميل yakh777@yahoo.com

في محرر الأكواد اكتب الكود التالي :

Sub MidFunction()
    Dim strEmail As String
    strEmail = Range("A1").Value
    
    Range("B1").Value = Mid(strEmail, 1, InStr(strEmail, "@") - 1)
End Sub

أنا بدأت بالمثال قبل الشرح .. الدالة ليها 3 بارمترات الأول هو النص المراد البحث داخله (كومة القش) ، والبارامتر الثاني هو بداية عملية التنقيب أو البحث وبيكون قيمة رقمية أكيد ، والبارامتر الثالث هو عدد الحروف المراد استخراجها .. في المثال النص هو المتغير strEmail وبداية عملية البحث 1 ، ولاستخراج عدد الحروف ولأنها غير معلومة أو أننا نريد استخراج الجزء الأول من النص قبل علامة @ قمنا باستخدام الدالة InStr لتحديد موقع علامة @ وطرحها من 1 لنحصل على عدد الأحرف على يسار العلامة (أظن مفهومة يا أخ سلومة)..

واستخدامها في ورقة العمل مشابه تماماً لمحرر الأكواد .. المعادلة التي يمكن استخدامها في ورقة العمل :

=MID(A1,1,FIND("@",A1)-1)

الدالة ببساطة تقوم باستخراج النصوص التي ترغب ، ولكن استناداً إلى نصوص أخرى ...

 

بهذا نكون قد انتهينا من دوال التعامل مع النصوص ... أرجو أن تكونوا قد وفقتم في فهم الحلقة على أكمل وجه ..

الواجب المطلوب : في الخلية E5 قم بكتابة النص Yasser Khalil ، وفي الخلية المجاورة لها ، قم بعمل الكود اللازم لجعل النص يبدو بهذا الشكل Khalil, Yasser (لتسيهل الحل قم باستخدام دوال التعامل مع النص لاستخراج الاسم الأول ، والاسم الثاني ...مفتاح الحل)

وإلى لقاء متجدد مع حلقات افتح الباب .. كان معكم أخوكم أبو البراء من مصمت أوفيسنا

 دمتم في رعاية الله

تم تعديل ديسمبر 23, 2014 بواسطه YasserKhalil

[ياسر خليل أبو البراء]

الحلقة الثالثة عشر

*******************

السلام عليكم ورحمة الله وبركاته

إخواني الأحباب في المنتدى الأغر ..نأسف على عدم فتح الباب الفترة اللي فاتت بسبب البرد الشديد ، وبعد ما الجو اتظبط شوية نقدر نفتح الباب عشان الشمس تدخل وتدفنيا..

من أول الحلقة دي إن شاء الله هنبدأ نتعامل مع مهارات التعامل مع محرر الأكواد ، عايزين نوصل للأحتراف ..

هنتكلم عن مهارة كتير بنحتاج نتعلمها ، ألا وهي الفرز أو الترتيب أو ما يطلق عليها باللغة اللي مش عربية Sort

هنشتغل عملي علطول (أو على عرض ..مش هتفرق كتير) ..نفتح مع بعض ورقة عمل ، ومحدش يستنى مني إني أرفق ملف ، لأنك عشان تتعلم يبقا لازم تشتغل بايدك سيبك بقا من شغل النظري اللي مبيوكلش عيش ده ! افتح يا محسن ، شعارنا في الحلقات افتح (مرة افتح الباب ..افتح مصنف جديد ..افتح الخيارات في البرنامج ..افتح محرر الأكواد .. وشوية واحد هيقولي لو مبطلتش رغي هآجي أفتح دماغك وأريح الناس من رغيك)

نفتح ورقة العمل ونكتب شوية بيانات عشان هنشتغل عليها ...وعشان أريحكو أدي شوية بيانات بدل ما تتعبوا ايديكم يا أحباب ، أنا بردو يهمني راحتكم

م	الاسم	النوع
1	ياسر	ذكر
2	احمد	ذكر
3	ابراهيم	ذكر
4	حسام	ذكر
5	سليم	ذكر
6	ماجدة	أنثى
7	هدى	أنثى
8	محمد	ذكر
9	دينا	أنثى
10	نور	ذكر
11	رضا	ذكر
12	سلمى	أنثى
13	فاروق	ذكر
14	شهد	أنثى
15	كمال	ذكر
16	طارق	ذكر
17	هدير	أنثى
18	سارة	أنثى
19	أميرة	أنثى

حدد البيانات وتعالى لورقة العمل في الخلية A1 ، واعمل كليك يمين ، ثم اختر Paste Special (لصق خاص) ثم اختر من النافذة اللي هتطلع لك Text ، بكدا هتلاقي عندك 3 أعمدة (عمود للمسلسل ودا عشان مسلسل افتح الباب ، وعمود الأسماء ، وعمود النوع.. )
ويا ريت ننسخ البيانات في نطاق تاني مرة تانية لأننا هنجرب عليها أكتر من تجربة (ضعها مرة أخرى في النطاق K1:M20 مثلاً )!!

 

المطلوب : ترتيب البيانات حسب الاسم ، ودا أمر بسيط جدا ومش معقد أبداً ..

طريقة الحل : نروح للتبويب Developer ثم نختار Record Macro ثم نقف في الخلية A1 في بداية البيانات ، ونروح للتبويب Data ثم الأمر Sort ونختار من الحقل اللي اسمه Sort By نختار الاسم (لأن هو دا الحقل المطلوب الترتيب على أساسه) ، وفي الحقل الثالث المسمى Order (ودا شكل الترتيب ونختار يا أستاذ مختار A to Z (هتلاقي هو دا الخص الافتراضي أقصد الخيار الافتراضي )
يعني الترتيب أو الفرز حاجة من اتنين يا إما تصاعدي A to Z (من تحت لفوق) ودا بيسموه الجماعة اللي ما يتسموا (Ascending)  أو تنازلي Z to A (من فوق لتحت) ودا اللي بيسموه في اللغة الأجنبية Descending ، وعشان ميحصلش عندك لخبطة الكلمة Ascending بتبدأ بحرف الـ A تبقا دي A to Z (الترتيب التصاعدي) !!

كل دا إحنا بنسجل يا حسين (اعدل الكرافتة عشان صورتك تطلع حلوة) ..Stop أنا المخرج وبقول Stop يعني وقف التسجيل ..

ياااااااه كانت حلقة صعبة أوي الحلقة دي ، التسجيل بيحتاج مجهود جبار عشان تطلع الحلقة حلوة ولذيذة !!!

دلوقتي جه وقت الجد ، اللي إحنا منعرفوش ، ندخل المغارة (على رأي الكبير حسام عيسى ..صقر المنتدى) ، هندخل المغارة عن طريق Alt + F11 معلومة قديمة ، طيب هندخل نعمل ايه ؟ أكيد هندخل عشان ندور على الكنز ..مش دي بردو مغارة ياسر بابا !!
هنلاقي الكنز بس مدفوووووووون تحت الأنقاض

Sub Macro1()
'
' Macro1 Macro
'

'
    Range("A1:C20").Select
    ActiveWorkbook.Worksheets("Sheet1").Sort.SortFields.Clear
    ActiveWorkbook.Worksheets("Sheet1").Sort.SortFields.Add Key:=Range("B2:B20") _
        , SortOn:=xlSortOnValues, Order:=xlAscending, DataOption:=xlSortNormal
    With ActiveWorkbook.Worksheets("Sheet1").Sort
        .SetRange Range("A1:C20")
        .Header = xlYes
        .MatchCase = False
        .Orientation = xlTopToBottom
        .SortMethod = xlPinYin
        .Apply
    End With
End Sub

دا اللي إحنا سجلناه ..إحنا طلعنا شطار وبنعرف نسجل كويس جداً ..الكنز فين يا نور العين؟ الكنز مدفون ما بين الأسطر ..إزاي نقدر نخرجه..

أقولكم دا كله هتش !! اللي عمله محرر الأكواد في سنين هنختصره إحنا في ثانية واحدة وبسطر واحد (وهي دي الشطارة !!)

Range("A1:C20").Sort Key1:=Range("B1:B20"), Order1:=xlAscending, Header:=xlYes

ضع هذا السطر اللذيذ في إجراء فرعي وجربه ، هنلاقي إنه يبنفذ نفس الكود الطويل اللي سعادة محرر الأكواد سجله .

طيب نهضم السطر اللي اتكتب : أول شيء عشان تقدر تتعامل في أي كود إنك تحدد الخلية أو النطاق اللي هتتشغل عليه ، وأظن دي واضحة جدا ، فالنطاق اللي هنشتغل عليه واللي فيه البيانات هو A1:C20 ، وممكن في الكود نحدد أول خلية في النطاق بس يعني ممكن يكون شكله كدا :

Range("A1")

بس أنا أفضل إننا نكتب النطاق بالكامل ، وبعد ما حددنا النطاق ، نطلق الحدث أي الفعل ، يعني السؤال المتوقع ايه المطلوب نعمله في النطاق : الإجابة نطبطب عليه وندلعه ، إجاية غير صحيحة ، الإجابة إننا نفرسه (هذه هي الإجابة الصحيحة ..نعم نفرزه ونرتبه زي ما إحنا عايزين)
والفرز بيكون بكلمة Sort ونترك مسافة واحدة بالمسطرة بعد الفرز .. ونبدأ نشوف حاجة اسمها بارامترات الحدث Method ، ودي ممكن نشوفها في تسجيل الماكرو اللي قام بيه محرر الأكواد ..

إحنا هناخد المهم وبس ، ميهمناش الدش الكتير !! أول بارامتر هو مفتاح الفرز أو الترتيب  Key، بمعنى آخر المقصود بيه العمود اللي هيتم على أساسه الفرز ، والعمود هنا هو عمود الأسماء B1:B20 ، ونفس الكلام ممكن نستغنى عن النطاق بالكامل ونذكر فقط أول خلية في العمود B1 بالشكل ده

Key1:=Range("B1")

طيب محدش سأل ايه الواحد اللي جنب المفتاح (دا الحارس الشخصي للمفتاح عشان محدش يسرقه) ..الواحد ده يا أساتذة هو المفتاح الأول لعملية الفرز ، وهنفهم الحتة دي لما ناخد مثال تاني ...

بعد كلمة Key1 نقطتين فوق بعض (Shift + حرف الكاف : ) وسواء وإنت بتكتب عربي أو إنجليزي (الاتنين سواسية).. يليها علامة يساوي ..

ومعروف إن علامة يساوي ييجي بعدها قيمة ، ونترجم الكلام ده إن قيمة المفتاح الأول هو النطاق B1:B20 (أفضل إنه يتكتب نطاق العمود بالكامل)

ناخد فاصل ، لا مش هنريح يا عبد الله ، أقصد فاصلة مش فاصل ، الفاصلة دي هي اللي بتفصل بين البارامترات يا أحباب ..

ننتقل للبارامتر الثاني والمسمى Order ودا ترجمته يا أخ ابو سليمان (الترتيب ..) دلوقتي هتدعي عليه ، وتقولي يا عم إنت مش قلت كلمة Sort دي معناها ترتيب ..أيوا مش هنكر ..بس عشان تتضح الصورة كلمة Sort هنا فعل أو حدث Method ، أما كلمة Order تعتبر زي الاسم وممكن نقول إن البارامترات دي وصف لكيفية حدوث الحدث ، أي الطرق المؤدية لحدوث الحدث !! أنا تهت زيكم بالظبط

   

المهم المقصود منها نوعية الترتيب هنا (هل الترتيب تصاعدي أم تنازلي) ، وبردو كلمة Order جنبها رقم واحد (الحارس الشخصي) ..يليها نقطتين وعلامة يساوي ، وقيمتها إما xlAscending أو xlDescending (أظن مفهومة يا أبو سليمان)

ناخد فاصلة تانية وأوعدك دي تكون آخر فاصلة في السطر ده ..البارامتر الثالث هو المسمى Header ودي ترجمتها حقول البيانات أو عناوينها ..
نسأل هل للبيانات اللي موجودة عناوين ولا لا ؟؟ م ، والاسم ، والنوع (دي عناوين أو حقول للبيانات) .. الإجابة نعم xlYes

معلومة جديدة نستفيد منها إن الحدث Mehod قد يتبعه بارامترات ، وتأتي هذه البارامترات بعد الحدث Method بمسافة بينهما ، يعني اللي بيفصل بين الحدث والبارامترات هي المسافة (دي المحرم..) ..أما البارامترات فبيتم الفصل بين كل واحد وأخوه بفاصلة ,  .. حاجة تانية لما تلاقي النقطتين فوق بعض وبعدين علامة يساوي تعرف إن دا بارامتر .. يا رب تكون المعلومة مفيدة.

طيب سؤال من الأستاذ طارق : هل البيانات لازم يكون فيها عنوان عشان نعمل فرز ؟؟ جاوب إنت يا عبد الكريم ، عبد الكريم : يا أستاذ طارق طالما فيه بارامتر بيسأل هل فيه عنوان أو مفيش ، يبقا أكيد ممكن إننا نفرز من غير عناوين البيانات ..
الله ينور عليك يا أستاذ عبد الكريم ، وميحرمناش منك ، فعلا الكلام دا صحيح .. نشوف السطر ده بيأدي نفس الغرض ، استغنينا عن صف العناوين :
 

Range("A2:C20").Sort Key1:=Range("B2:B20"), Order1:=xlAscending, Header:=xlNo

النطاق بدأ من A2 بعيداً عن عناوين البيانات ، والمفتاح كمان بدأ من B2 ، ونخلي بالنا من قيمة البارامتر Header هنلاقيه xlNo (يعني مفيش عناوين).
*********************************
ننتقل لجزئية تانية .. الجزئية اللي فاتت أخدت حقها وزيادة ، دلوقتي واحد بيبص لي وبيقولي ايه شكل البيانات الملخبطة دي ..حد يفرز الأسماء ويخلي كله مع بعضه (ذكور مع إناث) دا إنت راجل محترم حتى عيب عليك !! ..ردي : أنا آسف والله يا حاج محمد مكانش قصدي ، دا كان مجرد مثال عموما عنيا ليك هنعيد ترتيبهم زي ما إنت عايز (حضرتك أكيد عايز الذكور أولا وبعدين الإناث ) ..رد وقال : كدا عين العقل ..

بسيطة يا حاج محمد : السطر الخاص بالفرز هنزود عليه مفتاح كمان ، وشكل لترتيب المفتاح الجديد ...

قبل ما أضع السطر ..عايزين نعود نفسنا إننا ندي نفسنا مساحة من التفكير قبل التنفيذ .. الفرز المرة دي هيكون على عمودين (مين قبل مين .. يعني عمود الاسم الأول ولا عمود النوع ؟؟ الإجابة بسيطة عمود النوع عشان نفصل بين الذكور والإناث : أي خدمة يا حاج محمد)
إذاً الفرز هكيون لعمود النوع (ذكر ، أثنى ) ، نبص في أول حرف في ذكر وأول حرف في أنثى (محدش يبص على كل الحروف عيب) أول حرف هو حرف الذال في كلمة ذكر ، وألف في كلمة أنثى : طيب الكلمتين دول الألف الأول ، بمعنى تاني لو تركنا الخيار xlAscending اللي هو الترتيب التصاعدي بكدا هيكون الإناث الأول وبعدين الذكور حسب الترتيب الأبجدي ، إذاً في الحالة دي هنكتب xlDescending (عشان تتم عملية الفرز ذكر ثم أنثى)
نأتي للتطبيق العملي : ها هو السطر ...

Range("A1:C20").Sort Key1:=Range("C1:C20"), Order1:=xlDescending, Key2:=Range("B1:B20"), Order2:=xlAscending, Header:=xlYes

هنشبه السطر دا بشقة ليها بابين : أقصد بالبابين عمودين الترتيب (عمود النوع ثم عمود الأسماء) ، كل باب له مفتاح عشان يفتح بيه ..

الباب الأول عمود النوع ومفتاحه رقم 1 ، وشكل ترتيبه أو نوع ترتيبه تنازلي (عمود النوع)

Key1:=Range("C1:C20"), Order1:=xlDescending

والباب التاني ومفتاحه رقم 2 ، وشكل أو نوع ترتيبه تصاعدي (عمود الأسماء)

Key2:=Range("B1:B20"), Order2:=xlAscending

طبعا المفتاح ده ميشتغلش على ده ، ولا ده يشتغل على ده ، إنما ده لده وده لده (معلش هيست شوية)

مفتاح النوع هيعتمد على النطاق C1:C20 ، ومفتاح الأسماء هيعتمد على النطاق B1:B20 ، كل مفتاح يلعب في ملعبه أقصد في بابه ، أقصد في العمود الخاص بيه.
وبكدا لما ننفذ السطر اللي فات ، نقدر نحصل على النتيجة التي ينتظرها الحاج محمد..
الحاجة أم محمد شكلها مكشر وزعلت وبتقول بالإنجليزي : Ladies First يا مان (معلش أصلها مثقفة حبتين)

أوك يا حاجة ولا تزعلي نفسك .. الفكرة بأبسط مما تتخيلي غيري كلمة واحدة ، وألا أقولك متتعبيش نفسك شيلي حرفين وحطي حرف واحد بس
شيلي حرفي De في كلمة Descending وحطي حرف الـ A (شفتي بقا إنها بسيطة .. متنسيش الفطير عشان مستر حسام)
يا للروعة !! الحاجة أم محمد مش مصدقة نفسها .عموما جربوا (مش تجربوا الكود .. جربوا فطير أم محمد هيعجبكم جداً ، وبعد ما تاكلوا وتتمتعوا بالفطير جربوا الكود بعد التعديل ..)

*********************************
ننتقل لجزئية أخيرة تهم نفس الموضوع ...ألا وهي ألا وهي (تصدقوا نسيت) افتكرت .. إزاي أخلي النطاق غير محدد أو ديناميكي ..
إحنا لما اتعاملنا مع النطاق حددنا النطاق لحد الصف رقم 20 في المثالين اللي فاتوا ....

عايزين يكون الكود مرن ، يعني يمشي مع أي عدد من الصفوف ، لأن قواعد البيانات معروف إنها مش ثابتة .. يبقا المطلوب الجديد إننا نخلي آخر صف مفتوح ، أو من خلال الكود نخلي محرر الأكواد هو اللي يحدد آخر صف مش إحنا ..
مستر حسام عيسى تناول (الفطيرة بتاعت أم محمد) وأيضاً تناول هذه النقطة في شرح رائع له ..
نشرحها تاني ..ونخلي بالنا ، وخلينا جد بقا شوية ومركزين أوي لأن الحتة دي تقريبا مفيش مبرمج بيستغنى عنها (آه والله زي ما بقولكم كدا)
نفرض دلوقتي إننا مش عارفين آخر صف ..نجيبه إزاي .. الإجاية نسجل ماكرو (واحد مبرق ومش فاهم أيوا هنسجل ماكرو ..بردو مبرق )

بص يا مبرق : ابدأ تسجيل و تعالى في العمود الأول A واقف بعيد تحت بعد البيانات بمسافة كبيرة وليكن مثلا A100 ، وبعدين اضغط Ctrl + سهم لفوق من لوحة الأسهم .بس خلااااص انتهى التسجيل ، نروح لمحرر الأكواد هنلاقي الشكل ده

    Range("A100").Select
    Selection.End(xlUp).Select

وممكن نختصره في سطر واحد بس إننا نشيل كلمة Selection ونحط مكانها النطاق
 

Range("A100").End(xlUp).Select

عايز تطبق الكود ده ، روح لأي خلية بعيدة في أي عمود واضغط Alt+F8 وشوف الماكرو اللي فيه السطر اللي فات اسمه ايه واضغط Run..
نفهم إزاي هنستغل الحتة دي في إننا نعرف آخر سطر به بيانات في العمود A .. نقطة البداية هي A100 ، والكلمة
 

End(xlUp)

دي لما ضغطنا Ctrl وسهم لفوق المحرر ترجمها كدا ، يعني اطلع لفوق Up يا سفن أب يا لذيذ يا رايق (ما هو لازم نهضم الفطير اللي أكلناه)

طيب واحد بيقولي بس دا مش حل لأني أساسا معرفش البيانات دي آخرها فين ، بلاش استعباط .هرد عليه وأقوله : الله يسامحك ، ما هو لو صبر القاتل ع المقتول كان مات لوحده ... إحنا هنخلي رقم الصف 100 هو آخر صف في ورقة العمل ، بالنسبة لـ 2003 آخر صف 65536 ، أما في 2007 فما فوق فعدد الصفوف 1048576 (يا دي الحيرة ..يعني نغير رقم 100 لأي رقم فيهم) ..اللي يحيرك طيره ، يعني لا هنستخدم الرقم ده ولا ده

إحنا هنخلي المحرر هو اللي يعد الصفوف كلها بالسطر ده ، سبق وشرحناه في النافذة الفورية

MsgBox Rows.Count

بس إحنا مش عايزينها في رسالة ..دا بس عشان تتضح الصورة ، كلمة Rows تعني صفوف يا أبو سليمان ، وكلمة Count يعني يا محرر اتفضل عد.
هكيون الناتج لتنفيذ السطر اللي فات مختلف حسب إصدار الأوفيس اللي عندك ، لو 2003 هيطلع الناتج 65536 ، ولو الأوفيس 2007 فما فوق هيطلع الناتج 1048576 (أكيد فيه ناس تاااهت مني .. الفطير عمل عمايله معاكم)

يرجع مرجوعنا لموضوعنا الأصلي عرفنا عدد الصفوف من خلال محرر الاكواد ، يبقا هنشيل رقم 100 ونحط Rows.Count وبس

Range("A" & Rows.Count).End(xlUp).Select

نخلي بالنا الرقم 100 كان داخل أقواس التنصيص ، لكن لما استخدمنا الجملة Rows.Count الأقواس طردتها براها ، لأنها الأقواس مش بتقبل المتغير ، وعدد الصفوف هنا يا أحباب وركزوا متغير حسب الإصدار ، لكنها بردو حنينه مهانش عليها تطرده قامت حضنته بعلامة & عشان يكون جنبها
طيب نرجع تاني للهدف من دا كله إننا نعرف رقم آخر صف فيه بيانات ، إحنا بالسطر الأخير عرفنا نحدده لكن إزاي نعرف رقم صفه .. هنشيل Select ونحط Row وبس .. لا محدش يقولي بس !! كدا السطر دا بالشكل ده

Range("A" & Rows.Count).End(xlUp).Row

لو نفذت السطر ده هيقولك محرر الأكواد يا أهبل ايه ده ويطلع لك رسالة خطأ Invalid Use استخدام خاطيء..

السطر صحيح ، بس السطر عبارة عن رقم (اللي هو رقم الصف الأخير اللي فيه بيانات) بس الرقم دا مينفعش يقف لوحده يخاف ياخد برد .. لازم نحط الرقم ده في متغير ..
 

    Dim LR As Long
    LR = Range("A" & Rows.Count).End(xlUp).Row
    MsgBox LR

عملنا متغير باسم LR ودي اختصار Last Row أو الصف الأخير (بس التسمية اختياري يا شباب)
ووضعنا قيمة للمتغير اللي سميناه LR في السطر الثاني ، فأصبح المتغير LR يحمل الآن رقم الصف الأخير
وفي السطر الثالث عشان نختبر مدى صحة الكود ونشوف النتيجة عملنا رسالة يظهر فيها قيمة المتغير ..

** ملحوظة هامة : ممكن السطر الثاني نستخدم كلمة Cells بدلاً من كلمة Range بس هيكون التركيب مختلفة شوية ، لأن مع كلمة Cells بيكون فيه جزئين : الجزء الأول رقم الصف والجزء الثاني رقم العمود ، معنى الكلام ده إن Cells بتتعامل مع أرقام ، فيكون شكل الكود اللي فات لو استخدمنا Cells بهذا الشكل :
 

    Dim LR As Long
    LR = Cells(Rows.Count, 1).End(xlUp).Row
    MsgBox LR

طبعاً Rows.Count تمثل رقم آخر صف به بيانات ، ورقم واحد بيمثل رقم العمود الأول A

>>>>>
نفذ الكود سواء اللي فات أو اللي قبله !! هنلاقي رقم الصف الأخير طلع في رسالة (أنا طلعت عيني وأكيد إنتو كمان .. يعني اللفة الطويلة دي عشان نعرف رقم آخر صف به بيانات.)

دلوقتي جه الوقت إني أودعكم   .. نشوف شكل الكود في النهاية هيكون عامل إزاي

Sub SortData()
    Dim LR As Long
    LR = Range("A" & Rows.Count).End(xlUp).Row
    Range("A1:C" & LR).Sort Key1:=Range("C1:C" & LR), Order1:=xlDescending, Key2:=Range("B1:B" & LR), Order2:=xlAscending, Header:=xlYes
End Sub

دا الكود اللي هيرتب الذكور ثم الإناث ، وبعدين يرتب الأسماء ، في النطاق اللي بيبدأ من A1:C ورقم آخر صف ..لاحظ إننا شلنا رقم 20 من الكود الأصلي اللي شرحناه من بدري ، واستبدلناه بالمتغير LR والذي يحمل قيمة رقم آخر صف...!!

لتجربة الكود أضف اسماً جديدا ونفذ الكود مرة أخرى ستجد أن الاسم الجديد قد انتقل لترتيبه ، وإلى هنا توقفت دماغي (فااااااااااااااصل ومفيش نواصل)

 

أرجو أن أكون قد وفقت في توصيل المعلومة ، وإلى أن نلتقي أترككم في رعاية الله.

كان معكم الحاجة أم محمد صاحبة الفطير من منتدى أوفيسنا

تقبلوا تحياتي ودمتم بود

تم تعديل يناير 27, 2015 بواسطه YasserKhalil

[ياسر خليل أبو البراء]

الحلقة الرابعة عشر

*****************

السلام عليكم ورحمة الله وبركاته

وحشتكم !! أكيد لا .. لأني لو وحشتكم كنتو فتحتوا الباب وسألتوا عليا .. عموما إنتو وحشتوني ، وعشان وحشتوني هاقدم لكم حلقة جديدة يمكن تفتكروني.

النهاردة هتكلم عن حاجة ناس كتير شرحوها ، وشرحوها بشكل ممتاز ، ودا خلاني مش عارف أشرح إزاي ، لأن اللي شرحوها وفوا شرحها صراحة ..

هنتكلم عن الحلقات (بس مش حلقات افتح الباب) الحلقات اللي هنتكلم عنها الحلقات التكرارية ، ومن اسمها هي عبارة عن حلقات بتتكرر (إضافة عظيمة!)

اسمها بالإنجليزي Loops ودي مهمة جداً في عالم الأكواد ، محدش يقدر يستغنى عنها تقريباً ..

نفترض إني دخلت الفصل (بما إني معلم) ولسه دي أول مرة أتعرف على الطلبة اللي في الفصل ..يا ترى أنا عندي استعداد أخلى طالب طالب يقوم وأنا أقوله قول اسمك والطالب اللي بعديه قول اسمك .. أعتقد إن ريقي هينشف ودماغي هتصدع ودا طبعا مش يرضيكم (مش كدا ولا ايه) ..أنا من النوع الكسول فكل اللي هعمله هعمل تكرار من أول طالب في الفصل لآخر طالب ، وأعطي الأمر مرة واحدة ..

من أول طالب إلى آخر طالب
      قووووول اسمك يا حبيبي
الطالب التالي

هو دا شكل الحلقة التكرارية .. نبرمجها بلغة الـ VBA ...

هنقول إن الفصل فيه 60 طالب (معلش دا واقع الفصول في مصر) .. نقطة مهمة مننساش إن الطالب متغير مش ثابت ، فنرمز للطالب المتغير بالرمز X مثلاً ...

Sub Loops()
    Dim X As Long
    For X = 1 To 60
        'Say your name
    Next X
End Sub

طبعاً الكود دا شوية له علاقة بالبرمجة وشوية هتش .. ايه اللي هنعمله ..زي ما اتعودنا (دايما) إننا نعرف المتغير .. ونركز في السطر الثاني بدأ بكلمة For  متبوعة باسم المتغير اللي هو X وبعدين علامة يساوي عشان نحدد قيمة X المتغيرة (أو الطالب المتغير) وهنا القيمة ليها بداية وليها نهاية (كل شيء له بداية ونهاية) وبيفصل بين البداية والنهاية حرف الجر To

وفي آخر الحلقة التكرارية جملة Next X وممكن نقول Next ونسكت ، ومحرر الأكواد هيفهم لوحده .. بس أنا تقليدي شويتين فخلينا نكتب المتغير ، عشان الكود ممكن يكون فيه أكتر من حلقة تكرارية ..

الجزء المهم هو الجزء اللي بين السطرين ، وهو دا الأمر المطلوب تكراره ، السطر اللي هنا مجرد تعليق وهتش وملوش علاقة بالبرمجة .. بس حبيت أقرب لكم الفكرة بأسلوب جديد..

كدا لما أنفذ الكود اللي فات ، كل اللي عملته إني أعطيت الأمر مرة واحدة وبس (وأنا حاطط رجل على رجل ... الدورة تلف على طالب طالب ، ويقول اسمه ، ولما يخلص ، الدورة تنتقل للطالب اللي بعديه وهكذا إلى أن ينتهي الطلاب ، ولما الـ 60 طالب يخلصوا ..يتم إيقاف تنفيذ الكود...

 

ناخد أول مثال    بجد عشان نقدر نتعلم إزاي نستفيد من الحلقات التكرارية ::

لنفترض أننا عايزين نرقم النطاق A1:A10 بالأرقام من 1 إلى 10يعني الخلية A1 = 1  والخلية A2=2 وهكذا ..طبعا الموضوع بسيط جدا

Sub NumberRange()
    Range("A1").Value = 1
    Range("A2").Value = 2
    Range("A3").Value = 3
    Range("A4").Value = 4
    Range("A5").Value = 5
    Range("A6").Value = 6
    Range("A7").Value = 7
    Range("A8").Value = 8
    Range("A9").Value = 9
    Range("A10").Value = 10
End Sub

كود في منتهى الروعة .. شايف حسام بيضحك ويقولي عايزك ترقم النطاق من A1:A100 (وابتسم ابتسامة فيها شماته !!)

نفكر شوية .. بقول نفكر شوية (بلاش تكمل الحلقة غير لما تبص في الكود وتفكر شوية .. فكر شوية واكسب التوفير في الوقت والجهد)

ايه المشترك في أسطر الكود .. وايه المختلف .. المتشابه في كل الأسطر

Range("A ").Value =  

والمختلف هو الرقم بعد حرف الـ A ، والقيمة اللي بعد علامة يساوي ..

في السطر الأول الرقم اللي بعد حرف الـ A هو 1 ، والقيمة بعد علامة يساوي بردو 1 ، ونفس الكلام مع السطر رقم 2 ، ورقم 3 وهكذا

يبقا أول حاجة تفكر فيها إنك المختلف أو المتغير أو الشيء الغير ثابت تضعه في متغير ، ودا لأنه مش ثابت ومتغير .. فنضع متغير باسم X مثلاً

ونعمل حلقة تكرارية من 1 إلى 10 (دي القيم اللي هيحملها المتغير)

Sub NumberRange()
    Dim X As Long
    For X = 1 To 10
        Range("A" & X).Value = X
    Next X
End Sub

نفس الكود اللي شرحناه من شوية ، الاختلاف في السطر اللي بين سطري التكرار .. الحلقة هتدور 10 مرات ، وفي كل مرة المتغير X بيحمل قيمة مختلفة (نرررررركز في الجزئية اللي جاية لأنها مهمة جداً جداً )

مش هنفذ الكود مرة واحدة .. سنقوم بعملية التنفيذ واحدة واحدة ، اللي مستعجل يروح ينفذ الكود مرة واحدة ، واللي مش مستعجل أنا معاه ..عشان يعرف حاجة مش هيعرفها الأخ المستعجل ...

ضع مؤشر الماوس في أي مكان في الكود .. جميل >> اضغط F8 من لوحة المفاتيح ، وجمد قلبك وقول يا رب .. لاحظت ايه يا عبد المحسن؟

عبد المحسن ناااااااام مني (الله يسامحك) ..عبد المحسن : شايف الدنيا صفرا ليه ، هو فيه عاصفة النهاردة كمان؟ .. رديت عليه : لا يا عبد المحسن كمل نومك ، السطر الأصفر اللي ظهر ده سببه إننا ضغطنا F8 .. ودا فايدته إننا هنقوم بعملية التنفيذ واحدة واحدة .. سطر سطر ..

السطر الأصفر على أول سطر في الكود

Sub NumberRange()

اضغط F8 مرة تانية ، ايه اللي حصل انتقل السطر الأصفر للسطر التالت ، طيب والسطر التاني يا معلم .. ملوش لازمة !!!

أكبر خطأ إنك تعتقد إنه ملوش لازمة ، لما ضغطنا F8 للمرة التانية ، محرر الأكواد خزن في الذاكرة كل المتغيرات الموجودة في الكود

عايز تتأكد من كلامي ، حرك مؤشر الماوس اللي على شكل حرف I (فيه شرطة فوق وشرطة تحت) حرك الماوس من غير ما تدوس كليك .. واقف على المتغير X هتلاقي تلميح في مستطيل صغير بيقولك المتغير X=0 ، دي كدا القيمة المبدئية للمتغير ...

لما تضغط F8 للمرة التالتة ، روح شوف قيمة X مرة تانية هتلاقي قيمة X=1 (ايه اللي خلاها 1 مش كانت صفر من لحظة )

اللي حصل إننا انتقلنا من السطر

For X = 1 To 10

والسطر دا هيبدأ في عمل الحلقة التكرارية اللي بنقول عليها ، والحلقة بدايتها 1 زي ما حددنا (وطبعاً ممكن نغير نقطة البداية يا شباب .. مش شرط 1)

حرك مؤشر الماوس من غير ما تدوس على المتغير X في السطر المظلل بالأصفر

Range("A" & X).Value = X

هنلاقي زي ما قلت إن X =1

يعني محرر الأكواد هيعمل ايه دلوقتي ، هيشيل كل X ويحط مكانه القيمة 1 ، فيصبح السطر في الذاكرة بهذا الشكل

Range("A1").Value = 1

لحد كدا تمام التمام ، صغر محرر الأكواد بحيث تكون ورقة العمل ظاهرة بالنسبة لك واتأكد إن النطاق A1:A10 فارغ ليس به أي بيانات ، وركز في ورقة العمل ، واضغط F8 عشان تنقل السطر الأصفر إلى هذا السطر ، ولاحظ ورقة العمل

Next X

لاحظت يا منصور الخلية A1 وضعت فيها القيمة 1 ، نخلي بالنا إن السطر الأصفر بيتم تنفيذه بعد الخروج منه ، فلما خرجنا من السطر تم تنفيذ الأمر وأعطى القيمة 1 للخلية A1 ..

اضغط F8 مرة أخرى ، ونلاحظ إن السطر الأصفر انتقل للسطر اللي قبليه ، مش لبداية الحلقة التكرارية ، يعني ببساطة السطر اللي بيحدد بداية الحلقة ونهايتها بيعدي عليه مرة واحدة فقط ..

أما سطر الأمر والسطر اللي فيه كلمة Next بيبدل السطر الأصفر عليهم... نبص دلوقتي على قيمة المتغير X هنلاقيها بقت 2 فيتم تنفيذ السطر بمجرد الضغط على F8 ويضع القيمة 2 في الخلية A2 وهكذا ..جرب واضغط F8 وفي كل مرة شوف قيمة المتغير X وشوف النطاق A1:A10 في كل مرة

أول ما توصل قيمة المتغير X إلى الرقم 10 تتوقف الحلقة التكرارية ، وينتقل السطر الأصفر لجملة End Sub .. وينتهي عمل الكود ..

عارف إني طولت في النقطة اللي فاتت ، بس كان لازم أطول فيها ، عشان أنا فاضي ومفيش ورايا شغل ، فقلت أصدعكم شوية!!

 

ننتقل لمثال آخر

---------------

عشان نقدر نفهم إزاي نستفيد من الحلقات التكرارية .. عايزين نعد الاسم (أحمد) في النطاق A1:A10

نفترض إني عندي الأسماء دي في النطاق A1:A10

أحمد
ياسر
سليم
حسام
عيسى
أحمد
أحمد
خليل
عبد الله
أحمد

المطلوب : نشوف الاسم (أحمد) كم مرة تم تكراره .. المعطيات : استعن بالله ثم بالحلقة التكرارية ..

الفكرة : هنعمل اختبار صغير بقاعدة IF وهنقول لو قيمة الخلية بتساوي "أحمد" .. زود المتغير Counter بقيمة واحد

Sub CountName()
    Dim X As Long
    Dim Counter As Long
    For X = 1 To 10
        If Range("A" & X).Value = "أحمد" Then Counter = Counter + 1
    Next X
    MsgBox Counter
End Sub

عملنا متغير جديد باسم Counter عشان لما يتحقق الشرط ويلاقي الاسم "أحمد" يقوم يخلي المتغير Counter يساوي نفسه + 1

طيب ليه يساوي نفسه ، عشان في كل مرة يلاقي أحمد قيمته هتتغير فلازم نضيف واحد لكل Counter جديد

النتيجة في الآخر هتظهر في رسالة ، وهي 4 ..

طيب نجرب نشيل الواحد في هذا السطر

Counter = Counter + 1

لو شيلنا الواحد هتكون النتيجة 0 ، لأن المتغير قيمته المبدئية صفر ، فلما يتحقق الشرط مش هيزيد المتغير إلا لما نضيف واحد في كل مرة يتحقق الشرط.

 

هناخد مثال آخر

----------------

عندنا درجات في النطاق A6:A15  ، عايزين نكتب ناجح أوراسب في الخلية المجاورة للدرجة ، لو الدرجة أكبر من أو يساوي 50 يبقا ناجح ، مكانش يكون راسب ...

نخلي بالنا أنا غيرت بداية النطاق عشان الحلقة التكرارية بردو هتتغير بدايتها ونهايتها طبقاً للصفوف الجديدة

58
41
88
40
50
40
98
94
60
35

نجرب الكود التالي ..

Sub LoopsTest()
    Dim X As Long
    For X = 6 To 15
        If Cells(X, 1).Value >= 50 Then
            Cells(X, 2).Value = "ناجح"
        Else
            Cells(X, 2).Value = "راسب"
        End If
    Next X
End Sub

نلاحظ الحلقة التكرارية بدأت من 6 إلى 15 (ودا متغير للصفوف من الصف رقم 6 إلى الصف رقم 15)

ووضعنا الشرط بين سطري الحلقة التكرارية ، لو الخلية اللي في الصف X والعمود الأول أكبر من أو يساوي 50 يقوم يعمل ايه؟

يضع القيمة النصية "ناجح" في الخلية اللي في العمود الثاني والصف X (نفس الصف بالطبع لأن قيمة X في الحالة دي هي هي نفس القيمة لأننا في نفس اللفة) .. إذا لم يتحقق الشرط قام بتنفيذ الجزء الثاني بأن يكتب النص "راسب" ثم إغلاق جملة IF بالجملة End IF ومننساش القفلة زي ما اتعودنا..

 

ننتقل لآخر مثال في الحلقة دي (عشان أنا تعبت وإنتو كمان أكيد تعبتو)

في الأمثلة اللي فاتت عملنا حلقات تكرارية للصفوف .. واحد بيقولي طيب والأعمدة ملهاش نصيب في الدوخة اللي إحنا فيها دي .. أقوله أكيد ليها نصيب ..

المطلوب إننا في الصف الرابع ، نكتب معادلة

=COLUMN()

بس في الأعمدة من العمود رقم 1 إلى العمود رقم 15 (A To O)

نعقدها شوية ونقول في الأعمدة اللي رقمها فردي بس (الأعمدة اللي رقمها زوجي مش محتاجينها)

يعني ببساطة عايزين نحط المعادلة في الأعمدة A C E G I K M O

Sub ColumnsLoop()
    Dim X As Long
    For X = 1 To 15 Step 2
        Cells(4, X).Formula = "=COLUMN()"
    Next X
End Sub

الحلقة التكرارية بدأت من العمود الأول حتى العمود رقم 15 (البداية والنهاية)

معلومة جديدة Step 2 (دي معناها إننا هنقفز ..والقفز هيكون بمقدار 2 أي خطوتين) بدأنا بـ 1 فلما نقفز بمقدار 2 ، هنروح لرقم 3 ، أي أن المتغير سيكون رقم فردي في كل مرة 1 ، 3 ، 5 ، 7 ، 9 ، 11 ، 13 ، 15 (وهو دا المطلوب بالضبط)

سطر الأمر فيه الخاصية Formula ودي عشان نقدر نضع معادلة من خلالها .. والمعادلة ببساطة زي ما شفناها من شوية بس بتكون بين أقواس تنصيص ..

طيب الجزء الأول من السطر نلاحظ إننا استخدمنا Cells ودي بتكون متبوعة بقوسين ، وبين القوسين رقم الصف ثم فاصلة ثم رقم العمود ، وبما إن رقم الصف ثابت اللي هو رقم 4 ، فكتبناه زي ما هو .. اما رقم العمود فمتغير فوضعنا رقم العمود X ...

جرب الكود وشوف النتيجة بنفسك

أرجو أن أكون قد وفقت في توصيل المعلومة بأسلوب مبسط

كان معكم أخوكم أبو البراء من تراك أوفيسنا (لف على الحلقات من الحلقة رقم 1 إلى الحلقة رقم 14 .. لو عايز تتعلم الـ VBA)

ويا رب ميكونش فيه حد جاله دووووووووخة من كتر اللف .. والله أنا اللي دوخت

أستودعكم الله .. دمتم في رعاية الله

تقبلوا تحياتي .. دمتم بود